Əhməd İsayev

ƏHMƏD İSAYEV
Əhməd Məmməd oğlu İsayev
Doğum tarixi:	30 avqust, 1940
Doğum yeri:	Suvagil, Zaqatala
Milliyyəti:	saxur

İsayev Əhməd Məmməd oğlu - yazıçı-publisist, 1964-cü ildən Azərbaycan Jurnalistlər İttifaqının, 1992-ci ildən Azərbaycan Yazıçılar Birliyinin üzvü, respublikanın Əməkdar Jurnalisti (1987), "Qızıl qələm" (1974), "Ustad" Ali jurnalistika (1995), "Həsən bəy Zərdabi" (1996) və "Araz" (1999) ali ədəbi mükafatları laureatı, 2003-cü ildən AKTA-nın fəxri doktoru, 1992-ci ildən "Gəncə və gəncəlilər" Xeyriyyə Cəmiyyətinin sədri.

Həyatı

Əhməd İsayev 30 avqust 1940-cı ildə Zaqatala rayonunun Suvagil kəndində anadan olub. Orta məktəbi bitirən kimi təsərrüfatda əmək fəaliyyətinə başlayıb. Suvagil kənd klubunda müdir işləyib.

1959-1965-ci illərdə Azərbaycan Dövlət Universitetində əvvəl qiyabi, sonra əyani oxuyub. Hələ tələbə ikən – 1963-cü ildən "Kommunist" qəzeti redaksiyasında işə başlayıb: kiçik ədəbi işçi, baş ədəbi işçi, şöbə müdiri olub. 1970-1990-cı illərdə Gəncə-Qazax bölgəsi üzrə xüsusi müxbir vəzifəsində çalışıb. 1990-1991-ci illərdə "Respublika" qəzetinin təşkilatçısı və ilk baş redaktoru olub. Bir müddət "Həyat" və "Səhər" qəzetlərində işləyib. 1995-ci ildən "Azərbaycan" qəzetinin bölgə müxbiridir.

1957-ci ildən mətbuatda çıxış edir. Tarixi mövzulara, sənədli publisistikaya daha çox üstünlük verir. İki minədək qəzet və jurnal məqaləsinin, otuzdan çox kitabın müəllifidir. Jurnalist axtarışlarına əsasən 1985-ci ildə Leninqrad Sənədli Filmlər Studiyasında "Cəbhədən məktublar" adlı qısametrajlı film çəkilib, "Boş barılar" pyesi (1988) Gəncə Dövlət Dram Teatrında tamaşaya qoyulub.

Hökumət nümayəndə heyəti və jurnalist qrupları ilə Türkiyədə (1974, 1992), Yunanıstanda (1977), Fransada (1985), Bolqarıstanda (1987), İngiltərədə (1994) olub. İtaliyada (1981) "Unita" qəzetinin festivalında və Misirdə (1995) beynəlxalq informatika kurslarında Azərbaycanı təmsil edib. 1999-cu ildə Səudiyyə Ərəbistanına Həcc ziyarətinə gedib.

Nailiyyətlər

Dəfələrlə yaradıcılıq müsabiqələrinin qalibi olub. 1986-cı ildə ona SSRİ Jurnalistlər İttifaqı tərəfindən "İlin ən yaxşı jurnalisti" adı verilib. Moskvada çıxan "Jurnalist" jurnalının üç dəfə (1977, 1981, 1982) xüsusi diplomunu alıb. Respublika Ziyalılar Cəmiyyəti İdarə heyətinin qərarı ilə (1999) "XX əsrin fəxri ziyalısı" diplomu, Qafqaz-Mediya ictimai birliyi tərəfindən "Peşəkar jurnalist" (2008) mükafatı verilib. Ə.İsayev 1970-ci ildə "Rəşadətli əməyə görə" və 2005-ci ildə isə "Tərəqqi" medalı ilə təltif edilib.

"Azərbaycan Respublikasının ictimai və mədəni həyatındakı böyük xidmətlərə görə" ölkə başçısı İlham Əliyevin 11 dekabr 2006-cı il tarixli sərəncamı ilə ölkə prezidentinin fərdi təqaüdünə layiq görülüb.

Ə.İsayev dəfələrlə Azərbaycan jurnalistlərinin, 1982-ci ildə isə SSRİ Jurnalistlər İttifaqının beşinci qurultayının nümayəndəsi olub. On altı il dalbadal Respublika Jurnalistlər ittifaqının İdarə heyətinə üzv seçilib.

Ə.İsayev bu gün də "Azərbaycan" qəzetinin təmsilçisi kimi fəaliyyətini uğurla davam etdirir. Ölkənin ictimai həyatında fəal iştirak edir. Qərb bölgəsinin həyatının respublika mətbuatında obyektiv və ədalətli işıqlandırır. Operativliyi, prinsipiallığı, saf-sağlam mövqeyi, dövlətə, dövlətçiliyə, sədaqəti ilə fərqlənir. Müntəzəm sürətdə Gəncənin tarixini-taleyini araşdırır, Bəndər üsyanın, Azərbaycan Xalq Cümhuriyyəti Gəncə dövrünün, Azərbaycanın ilk Sovet İttifaqı Qəhrəmanı İsrafil Məmmədovun, neçə-neçə eloğlumuzun, şəhid övladlarımızın döyüş yolunun tədqiqi, Ələkbər Ruhinin, Şirzad Əliyevin, Fərrux Həsənlinin və digər söz-sənət sahibinin ədəbi irsinin öyrənilməsi yazıçı-jurnalist Əhməd İsayevin adı ilə bağlıdır.

Əsərləri

• 1. Yeniliyin sorağında. 1967
• 2. Biz yanmasaq. 1971
• 3. Dağlar da baş əyir. 1979
• 4. Göyərçin pərvazlanır. 1980
• 5. Sevgi saxladı bizi. 1982
• 6. Nə yaxşı ki, sən varsan. 1983
• 7. Эхо дальных боев. 1985
• 8. Bir bulaq çağlayırdı. 1987
• 9. Üsyan. 1989
• 10.Gəncədən ucalan yol. 1992
• 11.Əli bulağı. 1996
• 12.Səni kim unudar? 1999
• 13.Nigaran qalma ana. 2001
• 14.El ağsaqqalı. 2003
• 15.Vaxtsız sönən üç ulduz. 2004
• 16.İlisu Sultanı Daniyal bəy. 2005
• 17.Gəncə şəhidləri. 2006
• 18.Gəncə və gəncəlilər. 1991, 1998, 2002, 2008
• 19.Восстание. 2008