Aşıq Əhməd
| AŞIQ ƏHMƏD | |
| Doğum tarixi: | XIX əsr |
|---|---|
Mündəricat |
[redaktə] Həyatı
Aşıq Əhməd - XIX əsr aşıqlarındandır. Güvəndik kəndində anadan olan aşığın doğum və ölüm tarixi dəqiq məlum deyil. Şeirlərində çar rejimini tənqid etdiyi üçün ömrü boyu təqiblərə məruz qalmış, bu səbəbdən dövrün digər qaçaqları kimi ömrünün çoxunu dağlarda keçirmiş və şeirlərinin çoxu günümüzə gəlib çatmamışdır. Əlimizdə olan şeirləri o dövrün aşıqlarının yaddaşlarında qorunub saxlanılanlardır. Şeirlərində əsasən bəxtindən, sevdasından, istəklərinə, arzularına qovuşa bilmədiyindən şikayət edir.
[redaktə] Yaradıcılığı
VARMOLA?
Dəryayi-ümmanda qərq oldu gəmim,
Aşnadani adını anan varmola?
Soldu gülüstanım, yoxdu həmdəmim,
Yarəb, bu sevdanı qanan varmola?
Mənim rəhimimdi Xudayi-əzim,
Eyyub kimi dərdə düşmüşəm özüm,
Məclis yiğılıban düşəndə sözüm,
Əl dizinə vurub yanan varmola?
Mən Əhmədəm sığınmışam Mövlaya
Tifil ikən fələk saldı sevdaya,
Bu dünyada yetirmədi üqbaya,
Mənim kimi bəxti dönən varmola?
KÖNÜL
Ay həzərat gəlin sizə söyləyim,
Qabaqdan kəsilmiş tel istər könül,
Mən neylərəm xoryat üzən qönçəni,
Yarpağı solmamış gül istər könül.
Səhərdən gülşənin gülünü dərim,
Camalın görməyə təsəddüq verim,
Tamaşana gəlsin Hind ilə Urum,
Əmməyə ləbindən bal istər könül.
Üzün çox nazikdi dişə dodağa,
Sənə qurban canım, sərim sadağa,
Yusifi-Kənana vermiş qadağa,
Qırmızı yanaqda xal istər könül.
Hüsnünün kitabı gəlməz nəzərə,
Məh camalın məni salıb azara,
Arif sərrafıyam, girim bazara,
Cəvahir qoynundan ləl istər könül.
Gözləri xumarsan, qaməti ərər,
Tamaşana gəlsin Şəms ilə Qəmər,
Əhməd deyər, yarın sinəsi məxmər,
Sərv boylu, incə bel istər könül.
[redaktə] Mənbə
Telli Saz Ustadları, Bakı, 1964,87-89.
