Adi triton

Status. Nadir, sayı azalmaqda olan növdür.
Yayılması. Azərbaycanda Triturus vulgaris lantzi (Wolt.,1914) yarımnövü yaşayır. Respublikanın cənub-şərqində – Lənkəran rayonunda yayılmışdır.
Yaşayış yeri. Dağətəyi və düzənlik meşə zonalarındakı düyü plantasiyaları, durğun, zəif axar kiçik və orta böyüklükdə olan su mənbələrində yaşayırlar. Gecə vaxtı fəal olur. Gündüz ağacların çürümüş kötükləri və tökülmüş yarpaqları altından tapmaq olur. Yaz və yay aylarını suda keçirir, hərdən quruya çıxır. Su hövzələrində gün ərzində fəal olurlar. Qışlamaya adətən oktyabrın sonunda gedirlər.
Sayı. 1974-cü ilə qədər tək-tək fərdləri tapılırdı. 1974-cü ildə Lənkəranda İstisu ətrafında yerləşən kiçik su mənbələrində həmin yarımnövdən 30-a qədər tapılmışdır.
Sayının dəyişilmə səbəbləri. Kiçik su mənbələrinin və bataqlıqların qurudulması, eləcə də çəltik əkilən sahələrin azaldılmasıdır.
Qorunması üçün zəruri tədbirlər. Çoxalma dövründə Lənkəran rayonundakı triton olan xırda su mənbələrini qorumaq.