Aqşin Hacızadə

AQŞİN HACIZADƏ
Aqşin Şiruyə оğlu Hacızadə
Fotoqraf Vüsal Mayıloğlu
Doğum tarixi:	17 oktyabr 1969-cu il (1969-10-17)
Doğum yeri:	Yeni Daşkənd, Bərdə

Hacızadə Aqşin Şiruyə оğlu - şair.

Həyatı

Aqşin Hacızadə 17 оktyabr 1969-cu ildə Bərdə rayоnunun Yeni Daşkənd kəndində şair Sərraf Şiruyənin ailəsində anadan оlub.
1976-1986-cı illərdə Bərdə rayоnunun Yеni Daşkənd kənd оrta məktəbini əla qiymətlərlə bitirmişdir.
1987-1989-cu illərdə Murmansk vilayətində Sоvеt Оrdusu sıralarında nümunəvi hərbi хidmət kеçmişdir.
Qarabağ hadisələri başlayandan sоnra, 1993-1996-cı illərdə könüllü оlaraq Milli Оrdu sıralarına daхil оlmuş və ən ağır döyüşlərin iştirakçısı оlmuşdur. Qarabağ Vətən Müharibəsi vеtеranıdır. 1990-cı ildən mədəniyyət işçisidir.
Aqşin Hacızadə yaradıcılığa çох еrkən başlamışdır. Şеirləri müхtəlif qəzеtlərdə, jurnallarda və bədii almanaхlarda çap оlunmuşdur.
Aqşin Hacızadə atası Sərraf Şiruyənin yоlunu layiqincə davam еtdirir. Şеirləri şеirsеvərlərin dillər əzbəridir.
Еl məclislərinin mahir aparıcısıdır. Aşıq sənətini çох böyük dəyərləndirir. Vətənpərvərlik və məhəbbət mövzularında şеirləri daha çох üstünlük təşkil еdir. Zəngin çap оlunası külliyyatı vardır. İri həcmli yeni şеirlər kitabı nəşrə hazırlanır.
Hal-hazırda Bərdə rayоnunun Yеni Daşkənd kəndində yaşayır və ədəbi-bədii yaradıcılıını davam еtdirir.

Əsərləri

• "Tanrı bizi bağışlamaz". Bakı, "Elm və təhsil"-2010. səh.204 + 8 səh. şəkil. 500 tiraj.
• "Sənsizliyi duyacağam". Bakı, "Nurlan"-2011. səh.136, 500 tiraj.

Şəkilləri

Mustafa Məmmədov, Aqşin Hacızadə və İkram Əsədov. 6 sentyabr 1993-cü il. Ağdam cəbhəsi

Mustafa Məmmədov, Aqşin Hacızadə və arxadakı (?) 6 sentyabr 1993-cü il. Ağdam cəbhəsi

Aqşin Hacızadənin çap olunmuş kitabı

Yaradıcılığı

Şeir yazmaq istəyirəm

Yenə coşub şair təbim,
Şeir yazmaq istəyirəm.
Qəlbim, ruhum gəlib dilə,
Deyir yazmaq istəyirəm.

Atıb daşı keçmişlərə,
Könül yıxan hər işlərə.
Olmaz deyib şər işlərə,
 Xeyr yazmaq istəyirəm.

Həm dinclikdi, həm rahatlıq,
Harda varsa xoş abadlıq.
Könüllərə sevinc, şadlıq,
Xeyir yazmaq istəyirəm.

Nəsib olsun qoy səadət,
Pozulmasın əhd-sədaqət.
Sevənlərə eşq-məhəbbət,
Mehir yazmaq istəyirəm.

Öndə vərəq, həm qələmi,
Var Aqşinin öz aləmi.
Sehirlidir söz aləmi,
Sehir yazmaq istəyirəm.
Şeir yazmaq istəyirəm.

22.07.2007


Vaxtında ağla ömrü

Ölən anda ağlama,
Vaxtında ağla ömrü.
Xoş günlərə, aylara,
İllərə bağla ömrü.

Halalı bil bəhərli,
Haram olar zəhərli.
Zənn eyləmə dəyərli,
Ya az, ya çoxla ömrü.

Düz de, düzə daş atma,
Düz adama sataşma.
Bəzəməyə çalışma,
Şərlə, nahaqla ömrü.

Gəzmə özgə bir canan,
Aqşin olmaz dərd qanan.
Yaşa doğma, mehriban,
Oğul-uşaqla ömrü.


Səni

Gecələr yuxusuz, gündüz narahat,
Mən necə sevmişəm gör, necə səni.
Onbeş ilin həsrətinə güc gəlib,
Mən səni demişəm, təkcə səni.

Eh, nədən ayrıldı tən gələn yollar,
Neylədi de səni, çən gələn yollar.
Bilirəm dağılıb sən gələn yollar,
Yenə gözləyirəm hər gecə səni.

Tale qismətidi, neyləyə billəm,
Ta əlim çatanmaz heç nəyə, billəm.
Nə aça bilirəm, nə deyə billəm,
Sevirəm hamıdan gizlicə səni.

07.11.2010


Ağar, qara saçım, ağar

Gecə-gündüz timsalısan,
Ağar, qara saçım, ağar.
Gündən-günə ağarırsan,
Ağar, qara saçım, ağar.

Qorxmuram ki, qocalıram,
Baxıb sənə, güc alıram.
Sanıram ki, ucalıram,
Ağar, qara saçım, ağar.

Ömür yolu bir anlıqdı,
Bu gün, sabah o yanlıqdı.
Qara rəng bir qaranlıqdı,
Ağar, qara saçım, ağar.

Yoxdu canda ağrım, acım,
Varsa dərdim, var əlacım.
Ağ günümdü hər ağ saçım,
Ağar, qara saçım, ağar.
14.03.2010


Bir düşün

Həm kədərdi, həm düyün,
Nəbzini tut hər günün.
Həyat qurtarmır bu gün,
Sabahını bir düşün.

Ömür ki var, saatdı,
Bir də gördün ki, yatdı.
Səvab elə səvabdı,
Günahını bir düşün.

Bəsdi, sitəm etdiyin,
Bəddi sonu bəddiyin.
Dar əyaqda çəkdiyin,
Öz ahını bir düşün.

Aqşinəm, oyan daha,
Gəc yoldan dayan daha.
And veririəm Allaha,
Allahını bir düşün.
Günahını bir düşün.
15.02.2010

Türk oğlu, azər oğlu
Azərbaycanın Milli Qəhrəmanı Mübariz İbrahimovun misilsiz əfsanəvi şücaətinə

İgidlikdə, cəsarətdə sənin tək,
Gərək olmur öz xalqına hər oğlu.
Bu gün millət sənin ilə öyünür,
Ey vətənin, ey yurdunun nər oğlu.

Qisas üçün öz əhdində dayandın,
Bir örnəkdi hər bir kəsə bu andın.
Ölümünlə ölməzliyi qazandın,
Yaşa sən ey türk oğlu, azər oğlu.

Görməmişdi yağı belə tamaşa,
Döyüş etdin düşmən ilə başbaşa.
Hələ yenə səsləyəcək savaşa,
Vətən sən tək neçə-neçə ər oğlu.

Vətən adlı bir zirvədə qarsan sən,
Milyon qəlbə doğmasan sən, yarsan sən.
Nə qədər ki, bu dünya var varsan sən,
Unudarmı millət hünərvər oğlu.

Yol açmısan zəfərlərə çatmağa,
Qarabağa bayrağımı saçmağa.
Qoymayacaq qanınızı batmağa,
Baş komandan ər İlham, Heydər oğlu.
6 noyabr 2010-cu il.

Döyüş, vuruş qələbəylə üz döyüşü

Yorulmuşuq, usanmışıq dinləməkdən,
Yetər daha kürsüdəki söz döyüşü.
Qələbəyə, zəfərlərə çatmaq üçün,
Gecdi sabah, başlayağın tez döyüşü.

Sülh gətirməz, yad gətirər xəta bizə,
Qoya bilməz qarşımızda "veto" bizə.
Gərək deyil "ATƏT" bizə, "NATO" bizə,
Ey millətim, meydanlarda çöz, döyüşü.

Ömrümüzü dərd etməsin yurd-yuvasız,
Yurdumuzu yurd etməsin yurd-yuvasız.
Ərlərimi pərt etməsin yurd-yuvasız,
Bu ərlərim görüb qanlı yüz döyüşü.

Var cürətin, cəsarətin, sonsuz gücün,
Var qüdrətin düşmənini əzmək üçün.
Bir millət tək başı uca qəzmək üçün,
Döyüşlərdə udmalıyıq biz döyüşü.

Bəsdi daha gözlədiyin, qalx millətim,
Yetər daha bu həsrətin, bu zillətin.
Silah götür, səngərində dayan mətin,
Döyüş, vuruş qələbəylə üz döyüşü.
Yetər daha kürüsüdəki söz döyüşü.
25.05.2010


Bənzədin

Həyat umdum Günəş sanıb mən səni,
Sənsə günsüz bir kölgəyə bənzədin.
Sən bu dönük eşqin ilə amansız,
Əsib keçən bir küləyə bənzədin.

Əlac umdum, azaltmadın ağrımı,
Nə od oldun yandırasan bağrımı.
Nə su oldun söndürəsən yanğımı,
Heç bilmirəm kimə, nəyə bənzədin.

Tay sanırdım səni gülə, çiçəyə,
Yan baxırdım səndən gözəl-göyçəyə.
Mən ki səni sevmiş idim sən deyə,
Özünə yox, sən özgəyə bənzədin.

Özün olsan, huş kamallı olardın,
Daha gözəl, xoş camallı olardın.
Saf amallı, həm vəfalı olardın,
Sən özgəyə söylə, niyə bənzədin?

Səssiz getdin, xoş növrağım dağıldı,
Həsrətinlə qəlbim yandı, yaxıldı.
Sənli günüm sanırdım ki, nağıldı,
Nağıl deyil, sən kələyə bənzədin.
22.04.2010


Gəzdirir

Dar vaxtda Vətənə gərək olmayan,
Gen gündə belində yaraq gəzdirir.
Qəpiyə dəyəsi ağlı da yoxdu,
Başında beş minlik papaq gəzdirir.

Bir dərdi, bir qəmi, kədəri yoxdu,
Pislikdə heç bundan betəri yoxdur.
Özünün özündən xəbəri yoxdur,
Özgədən özgəyə soraq gəzdirir.

Aqil var ey Aqşin, otuzdur yaşı,
Bu nadan qırxında həyata naşı.
Ağlı yox başında, axı o başı,
Bu yazıq nə bilsin nahaq gəzdirir.
10.03.2010

 
Dərdimi

Söyləmədim kimsəyə,
Qəlb dağlayan dərdimi.
Öz qəlbimdə əbədi,
Yurd bağlayan dərdimi.

Gözüm baxmır sözümə,
Yaş gəlməyir gözümə.
Dərd saymıram özümə,
El ağlayan dərdimi.

Çəkdim haqdan pay təki,
Çəkmədim dərd, vay təki.
Bulaq təki, çay təki,
Hey çağlayan dərdimi.

Dərdim sayını aşıb,
İçimdən aşıb-daşıb.
Sevdim məni sarmaşıb
Qucaqlayan dərdimi,
El ağlayan dərdimi.
17.12.2009

Qabardı

Soruşma nədir bu hal,
Qardaş, olmuşam bihal.
Çəkdiyim fikir, xəyal,
Məni məndən qopardı.

Kimsənin suçu deyil,
Dərdim dilucu deyil.
Tək əlim içi deyil,
Ürəyim də qabardı.

Demirəm ki, yan mənə,
Xoş gəlmir zaman mənə.
Hər açılan dan mənə,
Bəd xəbərli çapardı.

Qırılıbdı inancım,
Kəsmir içimdə sancım.
Dünənimdən qazancım,
Pul deyil ki, qübardı.

Ha söyləyim ay hayıf,
İş-işdən ta adlayıf.
Ötən günü saxlayıf,
Qaytarsaydım nə vardı.
28.12.2009


Şad görüm
Taleyindən gileyli bir gözələ

Kədər sənə yaraşmır,
Gül, üzünü şad görüm.
Gözəl nədi, dərd nədi,
Dərdi-qəmi at görüm.

Hələ sənin yazındı,
Həyat yolun uzundu.
Ömür boyu arzumdu,
Dərdi sənə yad görüm.

Gözəl yox sən biçimdə,
Nə Təbrizdə, nə Çində.
Çiçəklərin içində,
Gül-çiçəyə bat görüm.

Nə küs bəxtdən, nə inci,
Deyilsən sən birinci.
Gülüşünlə sevinci,
Sevincimə qat görüm.
Dərdi-qəmi at görüm.


Gözəl Göyçəyə
Təcnis

Heyif ki, pozulubdu, yaraşıq idi,
Göyçə gözəllərə, gözəl Göyçəyə.
Kor olsun çoxları, göz görə-görə,
Kor oldu Göyçə tək gözəl-göyçəyə.

Yazda behişt olan Göyçənin dağı,
Payızda olardı göy çənin dağı.
Çəkilməz dağ oldu Göyçənin dağı,
Nə görmür, nə çatmır göz, əl Göyçəyə.

Düşsə Aqşin, min qovxaya, min qala,
Çıxmaz yaddan, Göyçə girov min qala.
Yüz yurd ola, yüz el ola, min qala,
Gözəllikdə çatmaz gözəl Göyçəyə.
05.03.2010

Mənbə

• Əli Vəkil, "Ot kökü üstə bitər". Ekspress qəzeti. № 225(2403). 8 dekabr 2007-ci il.
• Araz Yaquboğlu, Bir kökün budaqları, Bakı, "Nurlan", 2006. səh.145-158.
• Araz Yaquboğlu, Daşkənd aşıqları və şairləri, Bakı, "Nurlan", 2008.
• Araz Yaquboğlu. "Aqşin Hacızadə poeziyası". Dünya qəzeti. № 30-31. 25 dekabr 2009-cu il.