Atilla Maralanlı
| ATİLLA MARALANLI | |
 |
|
| Doğum tarixi: | 1961-ci il |
|---|---|
| Doğum yeri: | Təbriz |
Mündəricat |
[redaktə] Həyatı
Atilla Maralanlı 1961-ci ildə Təbrizdə anadan olub. İbtidai və orta təhsilini Tehranda alıb. 1993-cü ildə Azərbaycan Respublikasına mühacirət edib. Həmin ildən Bakıda yaşayır. 1999-cu ildə Bakı Dövlət Universitetinin filologiya fakültəsini bitirib. Əsasən tərcümə ilə məşğul olur.
Azərbaycan Milli Elmlər Akademiyasının Şərqşünaslıq İnstitutunun Cənubi Azərbaycan elmi qrupu şöbəsində çalışır. Behruz Həqqinin "Koroğlu": tarixi-mifoloji gerçəklik", Həmid Dadizadənin "Ədəbiyyat problemlərinə dair", Səməd Sərdariniyanın "Arazın hər iki tayında müsəlmanların soyqırımı" kitablarını farscadan azərbaycancaya çevirib və Bakıda çap etdirib.
[redaktə] Yaradıcılığı
GÖRÜNTÜ
Nəyəsə bənzəyənlər içində,
heç nəyə bənzəməz,
görünməzdim mən.
Yapa-yalqız, tənha.
Ah! Harda qaldın, Atilla Maralanlı?
Hanı sənin izin,
Hanı sənin kölgən,
Hanı sənin səsin,
Hanı sənin
Qəbrin?!
İKİ RÜBAİ
(1)
Yol qarşıdadır, dalda qalan xatirələr,
Keçmişdə qalıb hey qaralan xatirələr.
Bir nəğmədir ancaq ki bu gün yadda qalır,
Hər an yoluma kölgə salan xatirələr.
(2)
Hər yer bürünüb qaranlığın rənginə ah,
Gül-çiçək düşüb dumanlığın çənginə ah.
Qəm etmə könül, bircə qulaq ver uzağa,
Karvan yanaşır, bax dəvələr zənginə ah!
BİRLİK
Son baharın bir axşamı.
Bulud gəldi,
Duman gəldi,
Qığılcımlar bağırdılar.
Dolu yağdı,
Yağış yağdı,
Sellər axdı,
Tufan qopdu.
Hər tərəfi sis bürüdü,
Gül boğuldu!
Yaşıl yarpaq xəzəl oldu,
Quşcuqları boran qırdı.
Yalqız bitən fidanları beldən əydi,
Meşəlikdən keçəmmədi.
Çalışdısa budaqları qıra bilsin,
Edəmmədi.
Bilər-bilməz,
Budaqlara düyünlədi budaqları.
Bir-birinə arxa duran dağlardan da aşammadı.
Başı daşa dəydi betər,
Bu dastanın ardı vardır,
Burayadək zənn edirəm
Bu gün yetər!
