Ayaz Vəfalı

AYAZ VƏFALI
Ayaz Rza oğlu Cəfərov
Doğum tarixi:	1 aprel 1937-ci il (1937-04-01)
Doğum yeri:	Cəlilabad Sabirabad (kənd)

Cəfərov Ayaz Rza oğlu – şair, tənqidçi, ədəbiyyatşünas, 1967-ci ildən Azərbaycan Yazıçılar Birliyinin üzvü, filologiya elmləri namizədi (1972), Azərbaycanın Əməkdar mədəniyyət işçisi (1984).

Həyatı

Ayaz vəfalı 1937-ci il aprelin 1-də Azərbaycanın Astraxan-bazar (indiki Cəlilabad) rayonunun Sabirabad kəndində anadan olmuşdur. Burada orta məktəbi bitirdikdən sonra ADU-nun filologiya fakültəsində təhsil almışdır (1954-1959). Əmək fəaliyyətinə "Ədəbiyyat və incəsənət" qəzeti redaksiyasında başlamışdır: burada texniki katib, ədəbi işçi, tənqid və ədəbiyyatşünaslıq şöbəsinin müdiri, baş redaktorun müavini olmuşdur (1960-1976). "Ulduz" jurnalı redaksiyasında ədəbi işçi vəzifəsində işlədikdən sonra (1976-1977), yenidən "Ədəbiyyat və incəsənət" qəzeti redaksiyasında tənqid və ədəbiyyatşünaslıq şöbəsinin müdiri (1977-1978), məsul katib (1978-1993), baş redaktorun müavini (1993-1996) vəzifələrində çalışmışdır.

Ayaz Vəfalı qəzetçilik — jurnalistlik fəaliyyəti ilə yanaşı, "Füzuli və folklor" mövzusunda elmi araşdırmalar aparmışdır. Azərbaycan EA Nizami adına Ədəbiyyat İnstitutunun qiyabi aspiranturasını bitirmişdir. "Füzuli və folklor" mövzusunda namizədlik dissertasiyası müdafiə etmişdir. O, "Füzuli öyrədir", "Sənətkar və xalq", "Füzuli xəlqiliyi" kimi elmi kitabların müəllifidir. Nəvainin "Leyli və Məcnun" (54 səhifəlik) poemasını Azərbaycan dilinə tərcümə etmişdir.

Hazırda "Ədəbiyyat qəzeti"nin baş redaktorudur (1996-cı ildən).

Bədii yaradıcılığa "Lenin tərbiyəsi uğrunda" çoxtirajlı universitet qəzetində çıxan ilk şeirləri ilə başlamışdır.

Dövri mətbuatda şeirləri, tərcümələri və ədəbi-tənqidi məqalələri ilə çıxış edir. "Məhəmməd Füzuli" Beynəlxalq Ədəbi Əlaqələr Fondunun sədridir (1994-cü ildən). Azərbaycan Yazıçılar Birliyi İdarə Heyətinin (1991) və məclisinin üzvü seçilmişdir (1997).

Əsərləri

• 1.İllər və nəsillər. Bakı: Azərnəşr, 1964, 46səh.
• 2.Ürək və od. Bakı: Gənclik, 1968, 108 səh.
• 3.Turacın mahnısı. Bakı: Azərnəşr, 1973, 142 səh.
• 4.Füzuli öyrədir. Bakı: Gənclik, 1977, 148 səh.
• 5.Bəlkə onda öyrənmişik. Bakı: Yazıçı, 1979, 170 səh.
• 6.Sənətkar və xalq. Bakı: Gənclik, 1983, 192 səh.
• 7.Özü oda yana-yana. Bakı: Yazıçı, 1988, 160 səh.
• 8.Füzuli xəlqiliyi. Bakı: Gənclik, 1994.

Tərcümələri

(ruscadan)

• 1.T.Şevçenko. Kor qadın. Bakı: Gənclik, 1970, 54 səh.
• 2.O.Tumanyan. Rübailər. Bakı: Gənclik, 1974, 48 səh.
• 3.Atalar sözü, ağlın gözü. Bakı: Azərnəşr, 1976, 212 səh.
• 4.A.B.Çakovski. Qələbə (siyasi roman). I kitab, Bakı: Azərnəşr, 1987, 326 səh.

(özbəkcədən)

• 1.Ə.Nəvai. "Leyli və Məcnun" poeması. "Dünya uşaq ədəbiyyatı" seriyası, Bakı: Gənclik, 1990, 544 səh.