Azərbaycan Futbol Akademiyası

Vikipediya, açıq ensiklopediya
Keçid et: naviqasiya, axtar

Açılış[redaktə]

2009-cu il Fevralın 23-də UEFAAFFA-nın maliyyə vəsaiti hesabına inşa olunmuş «Futbol akademiyası»nın açılış mərasimi keçirilib. Tədbirdə AFFA prezidenti Rövnəq Abdullayev, FİFA İcraiyyə Komitəsinin üzvü, UEFA-nın vitse-prezidenti Şenes Erzik, FİFA-nın texniki direktoru Jan Mişel Benezet, gənclər və idman nazirinin müavini İsmayıl İsmayılov, Azərbaycan Milli Olimpiya Komitəsinin vitse-prezidenti Çingiz Hüseynzadə, İcraiyyə Komitəsinin üzvləri, futbol veteranları və digər rəsmi şəxslər iştirak ediblər. «Futbol akademiyası»nın açılış mərasimini AFFA prezidenti Rövnəq Abdullayev açaraq deyib:«Hörmətli mərasim iştirakçıları! «Futbol akademiyası»nın açılış mərasimində iştirak etdiyinizə görə sizə dərin təşəkkürümüzü bildirir və bu münasibətlə futbol ictimaiyyətini təbrik edirəm. Hər birimizə yaxşı məlumdur ki, ölkəmizdə idmanın bütün növlərinin, o cümlədən futbolun inkişafı üçün dövlət tərəfindən hərtərəfli şərait yaradılıb. Respublika Prezidenti cənab İlham Əliyev tərəfindən imzalanmış «Azərbaycan Respublikasında 2005-2015-ci illərdə futbolun inkişafına dair Dövlət Proqramı» ölkəmizdə futbola dövlət səviyyəsində diqqətin və qayğının göstəricisidir. Dövlət Proqramının müddəalarına əsasən AFFA tərəfindən həyata keçirilən tədbirlər nəticəsində futbolumuzda bir sıra uğurlar qazanılıb və daha böyük nailiyyətlərinin təməli qoyulub.
Bu gün açılış mərasimini keçirdiyimiz «Futbol akademiyası»nın inşası Azərbaycan futbolunun tarixində çox əlamətdar bir hadisədir. UEFAAFFA-nın maliyyə vəsaiti hesabına tikilən «Futbol akademiyası» Azərbaycanda uşaq futbolunun inkişafında əhəmiyyətli rol oynayacaq. Akademiyanın inşasında göstərdiyi köməkliyə görə UEFA-nın rəhbərliyinə minnətdarlığımızı bildirirəm».
Qeyd olunub ki, «Futbol akademiyası» ən müasir tələblərə cavab verən şəraitə malikdir. Burada eyni vaxtda 27 nəfərdən ibarət komanda məskunlaşa bilər. Akademiyada 12 yataq otağı, müasir texniki avadanlıqlarla təchiz olunmuş konfrans zalı, yüksək sürətli İnternetə qoşulmağa imkan verən kompüterlərlə təchiz olunmuş kompüter otağı, həkim otağı, massaj otağı, fitness zalı, üzgüçülük hovuzu, sauna var. Burada təhsil alacaq uşaqların və təlim-məşq toplanışı keçirəcək yığma komandaların üzvlərinin fiziki hazırlığının yüksəldilməsi üçün fitness zalında ən müasir trenajor alətləri quraşdırılıb.

AFFA prezidenti bildirib ki, məşqlərdən sonra akademiyada təhsil alan uşaqların formalarının yuyulub təmizlənməsi, qurudulması üçün burada müasir avadanlıqlardan ibarət mexanizm quraşdırılıb. Bir sözlə, «Futbol akademiyası»nda gənc futbolçuların hazırlanması üçün yüksək səviyyəli şərait yaradılıb. İnanıram ki, Azərbaycan futbolunun tarixində ilk dəfə inşa olunan bu «Futbol akademiyası»nda təhsil alan uşaqlar gələcəkdə Azərbaycanı beynəlxalq yarışlarda yüksək səviyyədə təmsil edəcək, milli komandamızın və klublarımızın bacarıqlı futbolçularına çevriləcəklər.

FİFA İcraiyyə Komitəsinin üzvü, UEFA-nın vitse-prezidenti Şenes Erzik fikirlərini bildirib:«Dörd illik fasilədən sonra yenidən Azərbaycana gəldiyim üçün özümü xoşbəxt hiss edirəm. Sizlərə FİFA prezidenti cənab Yozef Blatterin və UEFA prezidenti cənab Mişel Platininin salamlarını çatdırıram. Son illər Azərbaycan futbolunda irəliyə doğru atılmış addımları böyük sevinc hissi ilə müşahidə edirik. Yaxşı xatırlayıram ki, AFFA-nın inzibati binasının təməlqoyma mərasimində Yozef Blatter və Mişel Platini ilə yanaşı, mən də iştirak etmişəm. Bu gün isə Azərbaycan futbolu üçün daha bir əlamətdar hadisənin şahidiyik. İnanıram ki, bu «Futbol akademiyası» Azərbaycan futbolunun inkişafına öz dəyərli töhfələrini verəcək. Başda AFFA prezidenti cənab Rövnəq Abdullayev olmaqla, Azərbaycan futbol ailəsinin hər bir üzvünü bu əlamətdar gün münasibətilə təbrik edirəm».

Gənclər və idman nazirinin müavini İsmayıl İsmayılov çıxış edərək ölkəmizdə idmanın bütün növlərinin, o cümlədən futbolun inkişafı üçün məqsədyönlü tədbirlər həyata keçirildiyini mərasim iştirakçılarının diqqətinə çatdırıb. Ölkəmizdə idmana dövlət tərəfindən böyük diqqət və qayğı göstərildiyini deyən nazir müavini idmançılarımızın beynəlxalq yarışlarda ildən-ilə daha çox uğur qazandığını vurğulayıb. O, «Futbol akademiya»sının fəaliyyətə başlamasını Azərbaycan futbolunun tarixində xüsusi bir hadisə olduğunu qeyd edib.

Çıxışlar başa çatdıqdan sonra AFFA prezidenti Rövnəq AbdullayevUEFA-nın vitse-prezidenti Şenes Erzik «Futbol akademiyası»nın ön divarındakı UEFA-nın xatirə lövhəsinin örtüyünü açıb, ardından isə akademiyanın qarşısındakı rəmzi lenti kəsiblər. AFFA rəhbərliyi və qonaqlar «Futbol akademiyası» ilə tanış olublar. Akademiya ilə tanışlıqdan sonra assosiasiya rəhbərliyi qonaqlarla birgə AFFA-nın inzibati binasının ərazisində inşa olunmuş süni örtüklü meydançaya baxıb, burada hazırlıq keçən uşaqların məşq prosesini izləyib və penalti zərbələri vurublar.

Tədbirin sonunda jurnalistlər üçün brifinq keçirilib.

Mənbə[redaktə]