Baba Vəziroğlu

Vikipediya, azad ensiklopediya
Naviqasiyaya keçin Axtarışa keçin
Baba Vəziroğlu
Doğum adı Baba Vəzir oğlu Məsimov
Doğum tarixi 10 yanvar 1954(1954-01-10) (70 yaş)
Doğum yeri
Vətəndaşlığı
Milliyyəti Azərbaycanlı
Uşağı 3
Təhsili
Fəaliyyəti yazıçı, şair
Fəaliyyət illəri 1976-cı ildən
Əsərlərinin dili Azərbaycan dili
Mükafatları "Azərbaycan Respublikasının əməkdar incəsənət xadimi" fəxri adı — 2005 Azərbaycan LKGİ mükafatı — 1988
"Şərəf" ordeni — 2024 "Şöhrət" ordeni — 2020
Vikianbarın loqosu Vikianbarda əlaqəli mediafayllar

Baba Vəziroğlu (Baba Vəzir oğlu Məsimov; 10 yanvar 1954, Mollaisaqlı, İsmayıllı rayonu) — nasir, şair, tərcüməçi, kinodramaturq, 1981-ci ildən Azərbaycan Yazıçılar Birliyinin üzvü, Azərbaycan SSR Lenin komsomolu mükafatı (1988), Azərbaycan Respublikasının əməkdar incəsənət xadimi (2005).[1]

Həyatı[redaktə | mənbəni redaktə et]

Baba Vəziroğlu 1954-cü il yanvarın 10-da İsmayıllı rayonunun Mollaisaqlı kəndində anadan olmuşdur. Həmin rayonun Hacatamlı kənd orta məktəbini bitirdikdən sonra "Pravda" kolxozunda işləmiş, oradan ADU-nun hazırlıq fakültəsinə göndərilmişdir (1971–1972). Universitetin jurnalistika fakültəsində təhsil almışdır (1972–1977). Azərbaycan LKGİ MK RTİD qərargahında ədəbi işçi, Azərbaycan Yazıçılar İttifaqında bədii ədəbiyyatı təbliğ bürosunda təlimatçı (1979) olmuş, Azərbaycan Yazıçılar İttifaqında məsləhətçi işləmişdir (1979–1991). "Molla Nəsrəddin" jurnalının baş redaktoru olmuşdur (1989)[2]. Azərbaycan Yazıçılar Birliyi İdarə Heyətinin üzvü seçilmişdir (1991).[3]

Ədəbi fəaliyyətə "Ulduz" jurnalında (1976, № 8) çap etdirdiyi "Bir yaz axşamı", "Mağazinçi Dadaş" hekayələri ilə başlamışdır.[4] Həmin vaxtdan dövri mətbuatda şeir və nəsr əsərləri ilə fəal çıxış edir. Klassik rus şairlərindən tərcümələr etmişdir. Əsərləri xarici ölkə xalqlarının dillərinə tərcümə olunmuşdur. Uzun illər teleşirkətdə aparıcı olmuşdur. "Mir" Dövlətlərarası Teleradio Şirkətində redaktor (1997–1998), Azərbaycan Kinematoqrafçılar İttifaqında baş redaktor (1998–2002) olmuşdur. Hazırda orada idarə heyətinin katibidir (2002-ci ildən). Sonra orada ədəbi proqramlar studiyasının müdiri (1991–1992), "Yurd" jurnalının məsul katibi (1993–1994), "İstedad" jurnalının baş redaktorunun müavini (1994–?) işləmişdir.[5]

Mindən artıq şeirinə mahnı bəstələnmişdir. "Həsən Seyidbəyli", "Yeri boş qalan adam" (Rəşid Behbudov), "Sənsiz və ya ömrün son axşamı" (Həsən Turabov), "Haradan başlanır vətən", "Elegiya" (Zərifə Əliyeva), "Beş nəğməlik ömür" (Oqtay Kazımov) və s. sənədli filmlərin ssenari müəllifidir. İ. Karacalenin "İtirilmiş məktub" dram əsərini Azərbaycan dilinə müvəffəqiyyətlə tərcümə etdiyinə görə SSRİ Mədəniyyət Nazirliyi və Ümumrusiya Teatr Cəmiyyətinin diplomuna layiq görülmüşdür (1983).[6] Azərbaycan Yazıçılar İttifaqında gənc nasirlər birliyinin rəhbəri olmuşdur. M. Qorki adına Ədəbiyyat İnstitutunun nəsr şöbəsini qiyabi bitirmişdir (1985). Sovet nümayəndə heyətinin tərkibində Bolqarıstanda tərcüməçilərin beynəlxalq müşavirəsində iştirak etmiş (1982), ADR Yazıçılar İttifaqının dəvəti ilə ADR-də yaradıcılıq ezamiyyətində olmuşdur (1984). Gənc yazıçıların Moskvada keçirilən VIII Ümumittifaq müşavirəsində nümayəndə kimi iştirak etmişdir (1984).

Baba Vəziroğlu Azərbaycan SSR Lenin komsomolu mükafatı (1988) və "Humay" mükafatı (2000) laureatıdır. Azərbaycan Respublikasının əməkdar incəsənət xadimidir (2005). 10 yanvar 2020-ci ildə Azərbaycan ədəbiyyatının inkişafında xidmətlərinə görə "Şöhrət" ordeni,[7] 11 yanvar 2024-cü ildə isə "Şərəf" ordeni ilə təltif edilmişdir.[8]

Ailəlidir, iki qızı, bir oğlu var.

Əsərləri[redaktə | mənbəni redaktə et]

  1. Səhər qatarı (hekayələr). Bakı: Yazıçı, 1980, 125 səh.
  2. Yaddan çıxan görüş (povest və hekayələr). Bakı: Yazıçı, 1985, 152 səh.
  3. Ocaq (povestlər). Bakı: Gənclik, 1989, 280 səh.
  4. Yol (povestlər və hekayələr). Bakı: Yazıçı, 1992, 352 səh.
  5. Dünya dəyməz göz yaşına. Bakı: İşıq nəşriyyatı, 1998, 144 səh.

Filmoqrafiya[redaktə | mənbəni redaktə et]

  1. Nəsrulla Nəsrullayev (film, 1999)
  2. Kinorejissor Həsən Seyidbəyli (film, 2002)
  3. Bahar oğlu (film, 2004)
  4. Qonşular (film, 2006)

İstinadlar[redaktə | mənbəni redaktə et]

  1. Azərbaycan Respublikasının Prezidentinin "Azərbaycan kino xadimlərinə fəxri adlar verilməsi haqqında" 1 avqust 2005-ci il tarixli, 928 nömrəli Sərəncamı. Arxivləşdirilib 2022-10-25 at the Wayback Machine  (az.)
  2. "Baba Vəziroğlu: "Mən bir adam deyiləm"". 2022-04-07 tarixində arxivləşdirilib. İstifadə tarixi: 2014-03-05.
  3. "Baba Vəziroğlu — 60. oxu.az". 2018-11-16 tarixində arxivləşdirilib. İstifadə tarixi: 2018-11-16.
  4. Mədəniyyət TV. "Nəğmələrdə dil açan şair ömrü" (az.). Youtube.com. 11.01.2024. 2024-01-13 tarixində arxivləşdirilib. İstifadə tarixi: 2024-01-13.
  5. ""Səni tərk edirəm bir liman kimi…" — Baba Vəziroğlunun şeirləri. parafr.az". 2018-11-16 tarixində orijinalından arxivləşdirilib. İstifadə tarixi: 2018-11-16.
  6. "Baba Vəziroğlu: "Maraqlı ömür yaşamışam". xalqinfo.az". 2018-11-16 tarixində orijinalından arxivləşdirilib. İstifadə tarixi: 2018-11-16.
  7. "B. V. Məsimovun (Baba Vəziroğlunun) "Şöhrət" ordeni ilə təltif edilməsi haqqında Azərbaycan Respublikası Prezidentinin Sərəncamı". 2020-09-20 tarixində arxivləşdirilib. İstifadə tarixi: 2020-01-10.
  8. "B.V.Məsimovun "Şərəf" ordeni ilə təltif edilməsi haqqında Azərbaycan Respublikası Prezidentinin Sərəncamı » Azərbaycan Prezidentinin Rəsmi internet səhifəsi". president.az (az.). 2024-01-11 tarixində arxivləşdirilib. İstifadə tarixi: 11 yanvar 2024.