Elşad Qoca
| Elşad Qoca | |
| İsayev Elşad Qoca oğlu | |
| Doğum tarixi: | 2 may 1959-cu il |
|---|---|
| Doğum yeri: | Ermənistan SSR, Noyemberyan rayonu, Yuxarı Körpülü kəndi |
| Atası: | İsayev Qoca Binnət oğlu |
| Anası: | İsayeva Məleykə Abbas qızı |
| Uşağı: | İsayev Orxan və İsayeva Əsmət |
| Milliyyəti: | Azərbaycanlı |
| Fəaliyyəti: | Yazıçı,tədqiqatçı-jurnalist, tərcüməçi |
Elşad Qoca — Yazıçı, tərcüməçi və tədqiqatçı jurnalist, ən yeni tariximizə dair bir sıra dəyərli kitabların müəllifi.
[redaktə] Həyatı
İsayev Elşad Qoca oğlu 02 may 1959-cu ildə Ermənistan SSR-nin Noyemberyan rayonunun Yuxarı Körpülü kəndində ziyalı ailəsində dünyaya gəlmişdir. Ailəlidir, 2 övladı var.
BDU jurnalistika fakültəsinin məzunu olan yazıçı bir müddət "Kənd həyatı" və "Səhər" qəzetlərində çalışıb, "Sərhəd" qəzetinin hərbi müxbiri olub, döyüş bölgələrindən yazdığı reportajlara görə mükafata layiq görülüb. Azərbaycan Yazıçılar və Jurnalistlər birliklərinin üzvüdür.
Elşad Qoca bir vaxt maraqlı uşaq nağılları və hekayələr yazar, dünyanın ünlü uşaq yazıçılarının əsərlərini bizim azyaşlı oxucular üçün dilimizə çevirərdi. Son on ildə daha ciddi mövzulara üz tutdu. "Cəllad etirafı" (1999), "Sibir dərsi" (2000) kimi kitabları çıxdı. Bu kitablarında 1920-1950-ci illərdə bolşevik terrorunun qurbanı olmuş onlarca milli ruhlu aydınlarımızın, o cümlədən tanınmış nəsillərdən Şahtaxtinskilər, Topçubaşovlar, Şamxorskilər, Aşurbəyovlar, Usubbəyovlar və digərlərinin acı talelərindən bəhs edirdi.
"Gizli xidmətin sirləri" (2000) kitabında isə gözə görünməyən cəbhədə - kəşfiyyat, əks-kəşfiyyat və xüsusi təyinatlı dəstələrdə çalışmış peşəkar insanların xatirələri dilimizə çevrilmişdir.
Şübhəsiz, "Azərbaycan təhlükəsizlik və xüsusi xidmət orqanları" (2000), "Tariximiz və taleyimiz" (2001) kitabları onun yaradıcılığında ayrıca yer tutur. Bu kitablarında 1918-20-ci illərdə xalq cümhuriyyətinin kəşfiyyat və əks-kəşfiyyat orqanlarında çalışmış leytenant Ağalarovun, yasovul Yusupovun, polkovnik İrza bəy Hacıbəylinskinin, Məmmədbağır bəy və Nağı bəy Şeyxzamanov qardaşlarının, Ələkbər xan Şahsuvarovun, Məmmədtağı Dadaşovun, Əli Razi Şamçızadənin və başqalarının, eləcə də Azərbaycandan kənarda fəaliyyət göstərən ilk kəşfiyyatçılarımız - polkovnik Məmməd bəy Əliyev və "Şahzadə Məmməd"in fəaliyyəti çoxsaylı arxiv materialları əsasında işıqlandırılır.
Hazırda "Körpülü və körpülülər" tarixi-publisistik kitabı üzərində çalışır. Burada indi "Ermənistan" adlanan ərazidə qalmış gözəl Körpülü kəndinin və onun sakinlərinin acı taleyindən danışılır.
[redaktə] Kitabları
- "Cəllad etirafı" (1999),
- "Sibir dərsi" (2000)
- "Gizli xidmətin sirləri" (2000)
- "Azərbaycan təhlükəsizlik və xüsusi xidmət orqanları" (2000),
- "Tariximiz və taleyimiz" (2001)
