Elektron Hesablayıcı Maşınlar zavodu

Elektron Hesablayıcı Maşınlar zavodu — Müdafiə Sənayesi Nazirliyinin tabeliyində müəsisə.

Tarixi

Elektron Hesablayıcı Maşınlar zavodu SSRİ Nazirlər Sovetinin 5 may 1972-ci il tarixli, 944 nömrəli qərarı ilə yaradılmış, tikintisi 1972-1986-cı illərdə aparılmışdır.

1993–2005-ci illərdə Dövlət Xüsusi Maşınqayırma və Konversiya Komitəsinin tərkibində fəaliyyət göstərmişdir.

2006-cı ildən Müdafiə Sənayesi Nazirliyinin tabeliyindədir.

Fəaliyət sahələri

Elektron Hesablayıcı Maşınlar zavodu yaradıldığı zaman vahid seriyalı (EC-1010-1061) elektron-rəqəm hesablama maşınlarının tərkibinə daxil olan elektron və elektromexaniki qurğuların hazırlanması üzrə ixtisaslaşmışdı.

Elektron Hesablayıcı Maşınlar zavodunun fəaliyyət istiqamətləri aşağıdakılardır:

• Elektron aparatların və qurğuların istehsalı
• Elektromexaniki və mexaniki qurğuların istehsalı
• Elektrik avadanlıqlarının istehsalı
• Elektrotexniki qurğuların və su təsərrüfatı texnikasının ehtiyat hissələrinin istehsalı
• Lokomotivlərin avtomatik bloklarının istehsalı
• Sənaye və məişət cihazlarının istehsalı
• Ağac emalı
• Texnoloji tərtibatların və alətlərin hazırlanması

Texnoloji imkanları

Elektron Hesablayıcı Maşınlar zavodunun fəaliyyəti aşağıdakı istehsal sahələrindən ibarətdir:

• Mexaniki yığma sahəsi:

1. müxtəlif materiallardan olan detalların mexaniki emalı
2. dairəvi şlifləmə
3. qaz mühitində yarımavtomat qaynaqlama

• Karkas ştamplama və qaynaqlama:

1. pressləmə
2. soyuq ştamplama
3. arqon-qövs qaynağı
4. qövs qaynağı
5. qaz qaynağı

• Metalların, alətlərin və tərtibatların termiki emalı
• Əlvan metalların, rezin və plastik kütlələrin tökülməsi və emalı
• Ağac emalı
• Qalvanik emal:

1. misləmə
2. kimyəvi oksidləmə
3. sinkləmə
4. xromlama
5. anodlama
6. passivləşdirmə

• Lak-boya ilə örtükləmə.
• Alət istehsalı:

1. ştampların və pres qəliblərinin istehsalı
2. alət və tərtibatların hazırlanması

• Qeyri-standart avadanlıqların hazırlanması
• Metroloji nəzarət:

1. zərbə və rəqsi sınaq parametrlərinin təyin edilməsi
2. elektrik və radioelektrik ölçmələri
3. kütlə, qüvvə və təzyiq ölçmələri
4. sürət, təcil və zaman ölçmələri
5. iqlim və metroloji sınaqlar.