Həsən Əliyev (güləşçi)

Həsən Əliyev
Həsən Əliyev 2021-ci ildə
Şəxsi məlumatlar
Tam adı	Həsən Həsən oğlu Əliyev
Vətəndaşlığı	Azərbaycan
Doğum tarixi	14 noyabr 1989(1989-11-14) (34 yaş)
Doğum yeri	Qazax, Qazax rayonu, Azərbaycan SSR, SSRİ
Boyu	168 sm. (5 ft 6 in)
İdman növü	Güləş
Karyera illəri	1997—2019
Məşqçisi	Vaqif Feyzullayev
Komandası	Neftçi İdman Klubu
Medallar Dünya Çempionatı Qızıl 2010 Rusiya 60 Kq Bürünc 2016 Macarıstan 60 Kq Avropa Oyunları Bürünc 2015 Azərbaycan 66 Kq Avropa Çempionatı Qızıl 2010 Azərbaycan 60 Kq Bürünc 2011 Almaniya 60 Kq Bürünc 2013 Gürcüstan 66 Kq Gümüş 2014 Finlandiya 66 Kq Bürünc 2016 Latviya 71 Kq Dövlət təltifləri

Həsən Əliyev (14 noyabr 1989, Qazax) — Azərbaycanı təmsil edən yunan-roma güləşçisi və məşqçisi, 2010-cu il Avropa Çempionatının və Dünya Çempionatının qalibi.

Karyerası

Həsən Əliyev 2006-cı ilin iyulunda İstanbulda yeniyetmələr arasında Avropa Çempionatının final görüşündə məğlub olaraq turnirin gümüş medalına sahib oldu. 2007-ci il ərzində gənclər arasında Dünya və Avropa Çempionatlarında uğursuz çıxış edən Həsən Əliyev 2008-2010-cu illərdə Azərbaycan idmanı tarixində bir sıra uğurlara imza atdı.

Həsən Əliyev 2008-ci ilin iyulunda Kosiçe şəhərində gənclər arasında Avropa Çempionatının qalibi oldu. Həsən Əliyev 2009-cu ilin iyununda növbəti dəfə gənclər arasında Avropa Çempionatının qalibi olan Həsən Əliyev həmin ilin avqustunda gənclər arasında Dünya Çempionatının da qızıl medalına sahib oldu.

Karyerasının zirvəsu isə 2010-cu ildə oldu. Həsən Əliyev ilin əvvəlində, yanvarda İstanbul şəhərində Vəhbi Əmri Turnirinin, martda isə Sombatxey şəhərində Macarıstan Qran-Prisinin qalibi oldu. Apreldə Azərbaycanda baş tutan Avropa Çempionatında bütün rəqibləri üzərində qələbə qazanan Həsən Əliyev Avropa çempionu adına sahib oldu. İyulda Qızıl Qran-Pri beynəlxalq turnirində də qızıl medala sahib olan Həsən Əliyev sentyabrda Rusiyada baş tutan Dünya Çempionatında da bütün rəqibləri üzərində qələbə qazanaraq turnirin qalibi oldu. Bir il ərzində Dünya və Avropa Çempionatıda daxil olmaqla mübarizə apardığı bütün beynəlxalq turnirlərdə qələbə qazanan Həsən Əliyev Dünya və Avropa çempionu olan birinci azərbaycanlı yunan-roma güləşçisi oldu.

2011-ci ildə Həsən Əliyev Almaniyanın Dortmund şəhərində baş tutan Avropa Çempionatını bürünc medalla başa vurdu. İyulda Qızıl Qran-Pri beynəlxalq turnirinin qalibi olan Həsən Əliyev sentyabrda İstanbul şəhərində Dünya Çempionatını yeddinci pillədə başa vurdu.

Həsən Əliyev 2012-ci ildə də uğurlu çıxış eləmədi. Yanvarda İstanbul Qran-Prisini 11-ci pillədə başa vuran Həsən Əliyev iyunda Almaniya Qran-Prisinin gümüş medalına sahib oldu. Avqustda isə Həsən Əliyev Azərbaycanı London şəhərində (Birləşmiş Krallıq) baş tutan XXX Yay Olimpiya Oyunlarında təmsil elədi.

−60 Kq. turnirində çıxış edən 22 yaşlı Həsən Əliyev Dünya və Avropa Çempionatlarının qalibi idi və Azərbaycan yığmasının əsas medal ümidlərindən biri hesab olunurdu. Həsən Əliyev olimpiadanın 1/8 final mərhələsində Norveç nümayəndəsi Stig Andre-Berge ilə üz-üzə gəldi. Görüşün birinci hissəsində Əliyev 1:0, növbəti hissəsində isə Berge 1:0 hesabları ilə qalib gəldi. Həlledici hissədə isə Həsən Əliyev rəqibi üzərində 2:0 hesabı ilə qələbə qazandı və nəticədə turnirin 1/4 final mərhələsinə adladı. Bu mərhələdə onun rəqibi 2004-cü il Afina Olimpiadasının qalibi Cənubi Koreya nümayəndəsi Yun Yu-Hyun oldu. Həmin görüşdə Həsən Əliyev rəqibinə 2:0 (2:0, 1:0) hesabı ilə qalib gəldi və olimpiadanın yarım-final mərhələsinə adladı. Finala gedən yolda onun rəqibi Avropa Çempionatının qalibi Gürcüstan nümayəndəsi Revaz Laşxi oldu. Gərgin idman mübarizəsi şəraitində baş tutan görüşün birinci hissəsində Əliyev 1:0, növbəti hissəsində isə Laşxi 4:0 hesabları ilə qalib gəldi. Həlledici hissədə isə rəqibinə minimal hesabla məğlub olan Həsən Əliyev mübarizəsini bürünc medal uğrunda görüşdə davam elədi. Bu görüşdə onun rəqibi Rusiya nümayəndəsi Zaur Kuraməhəmmədov oldu. Nəticədə Həsən Əliyev rəqibinə 0:2 (0:2, 0:4) hesabı ilə məğlub oldu və London Olimpiadasını beşinci pillədə başa vurdu.

Olimpiadadan sonra Həsən Əliyev Qızıl Qran-Pri beynəlxalq turnirini onuncu pillədə başa vursa da, 2012-ci ili Rusiyada Oleq Karavayev beynəlxalq turnirinin qalibi olmaqla başa vurdu.

Həsən Əliyevin uğursuz çıxışı 2013-cü ildə də davam elədi. Martda Gürcüstanın Tbilisi şəhərində baş tutan Avropa Çempionatının bürünc medalına sahib olan Həsən Əliyev iyulda İspaniya Qran-Prisinin qalibi olsa da, sentyabrda Budapeşt şəhərində (Macarıstan) Dünya Çempionatını beşinci pillədə başa vurdu.

2014-cü ildə isə Həsən Əliyev apreldə Finlandiyanın Vantaa şəhərində baş tutan Avropa Çempionatının final görüşündə məğlub olaraq turnirin gümüş medalına sahib oldu. İyulda Qızıl Qran-Pri beynəlxalq turnirinin qalibi olan Həsən Əliyev sentyabrda Dünya Çempionatında növbəti dəfə medalın bir addımlığında məğlub olaraq turniri beşinci pillədə başa vurdu.

2015-ci il də Həsən Əliyev üçün uğurlu olmadı. İyunda Azərbaycanda baş tutan Avropa Oyunlarının bürünc medalına sahib olan Həsən Əliyev sentyabrda Dünya Çempionatını 30-cu pillədə başa vurdu. Noyabrda Qızıl Qran-Pri beynəlxalq turnirində də uğursuz çıxış edən Həsən Əliyev turnirin bürünc medalına sahib oldu.

Azərbaycan Prezidenti İlham Əliyevin 29 iyun 2015-ci il tarixli 1299 nömrəli Sərəncamına əsasən I Avropa Oyunlarında qazandığı nailiyyətlərə və Azərbaycan idmanında xidmətlərinə görə Həsən Həsən oğlu Əliyev "Tərəqqi" medalı ilə təltif edildi.

2016-cı ilin martında Latviyanın Riqa şəhərində Avropa Çempionatının bürünc medalına sahib olan Həsən Əliyev sentyabrda hərbçilər arasında Dünya Çempionatının, noyabrda da Qızıl Qran-Pri beynəlxalq turnirinin qalibi oldu. İlin sonunda isə Macarıstamın Budapeşt şəhərində baş tutan Dünya Çempionatını bürünc medalla başa vurdu.

2017-ci ildə isə Həsən Əliyev üçün uğursuz oldu. Martda İstanbulda Vəhbi Əmri beynəlxalq turnirinin bürünc medalına sahib olan Həsən Əliyev həmin il Dünya və Avropa Çempionatlarını müvafiq olaraq 7-ci və 26-cı pillələrdə başa vurdu.

2018-ci ildə Həsən Əliyevin yeganə uğuru mayda Rusiyada baş tutan hərbçilər arasında Dünya Çempionatının qalibi olmaq oldu. 2019-cu ildə isə Həsən Əliyev Çində Hərbçilərin Dünya Oyunlarının gümüş medalına sahib olduqdan sonra idmanla vidalaşdı.

Karyerasını başa vurduqdan sonra Həsən Əliyev yunan-roma güləşi üzrə Azərbaycan yığmalarında baş məşqçi və məşqçi olaraq çalışdı.

Nəticələri

Sıra	İl	Yarış	Ev sahibi	Nəticə
1	2006	Yeniyetmələrin Avropa Çempionatı	Türkiyə	2.
2	2007	Gənclərin Avropa Çempionatı	Serbiya	12.
3		Gənclərin Dünya Çempionatı	Çin	15.
4	2008	Gənclərin Avropa Çempionatı	Slovakiya	1.
5	2009	Gənclərin Avropa Çempionatı	Gürcüstan	1.
6		Gənclərin Dünya Çempionatı	Türkiyə	1.
7	2010	Vəhbi Əmri Turniri	Türkiyə	1.
8		Macarıstan Qran-Prisi	Macarıstan	1.
9		Avropa Çempionatı	Azərbaycan	1.
10		Qızıl Qran-Pri	Azərbaycan	1.
11		Dünya Çempionatı	Rusiya	1.
12	2011	Avropa Çempionatı	Almaniya	3.
13		Qızıl Qran-Pri	Azərbaycan	1.
14		Dünya Çempionatı	Türkiyə	7.
15	2012	İstanbul Qran-Prisi	Türkiyə	11.
16		Almaniya Qran-Prisi	Almaniya	2.
17		Olimpiya Oyunları	Birləşmiş Krallıq	5.
18		Qızıl Qran-Pri	Azərbaycan	10.
19		Oleq Karavayev Turniri	Rusiya	1.
20	2013	Avropa Çempionatı	Gürcüstan	3.
21		İspaniya Qran-Prisi	İspaniya	1.
22		Dünya Çempionatı	Macarıstan	5.

Sıra	İl	Yarış	Ev sahibi	Nəticə
23	2014	Avropa Çempionatı	Finlandiya	2.
24		Qızıl Qran-Pri	Azərbaycan	1.
25		Dünya Çempionatı	Özbəkistan	5.
26	2015	Avropa Oyunları	Azərbaycan	3.
27		Dünya Çempionatı	ABŞ	30.
28		Qızıl Qran-Pri	Azərbaycan	3.
29	2016	Avropa Çempionatı	Latviya	3.
30		Hərbçilərin Dünya Çempionatı	KYRM	1.
31		Qızıl Qran-Pri	Azərbaycan	1.
32		Dünya Çempionatı	Macarıstan	3.
33	2017	Vəhbi Əmri Turniri	Türkiyə	3.
34		D. Kolov - N. Petrov Turniri	Bolqarıstan	7.
35		Avropa Çempionatı	Serbiya	7.
36		Dünya Çempionatı	Fransa	26.
37	2018	Kiyev Turniri	Ukrayna	3.
38		Hərbçilərin Dünya Çempionatı	Rusiya	1.
39		Vəhbi Əmri Turniri	Türkiyə	5.
40	2019	Kiyev Turniri	Ukrayna	11.
41		G. Kartozia & V. Balavadze Turniri	Gürcüstan	3.
42		Hərbçilərin Dünya Oyunları	Çin	2.