Mohamed Abutreyka
 |
Bu məqalənin adının Azərbaycan dilində olmadığı, adın Azərbaycan dilinə düzgün tərcümə (transliterasiya) edilmədiyi və ya adlandırmada orfoqrafik səhvə yol verildiyi ilə bağlı şübhələr var. Bununla bağlı öz fikirlərinizi məqalənin müzakirə səhifəsində bildirin. Düzəliş etdikdən sonra bu şablonu məqalədən götürməyi unutmayın! |
 |
Bu məqaləni vikiləşdirmək lazımdır |
| Mohamed Abutreyka | ||
 |
||
| Şəxsi məlumatlar | ||
|---|---|---|
| Doğum tarixi: | ||
| Doğum yeri: | ||
FİFA Konfederasiyalar Kuboku 2009-da komandasının seçilən oyunçularından biri olan Abutreyka Misirin ən yaxşı oyunçusudur. Təəssüf ki, ona hələ də Avropada oynamaq nəsib olmayıb.
1978-ci ildə dünyaya gələn Abutreyka bir çox keyfiyyətlərinə görə digərlərindən seçilib. O, heç vaxt futbolu dərslərindən üstün tutmayıb. Təəccüblü deyil ki, Abutreyka böyük futbola yalnız 25 yaşında gələ bilib. Misirin "Əl-Əhli" klubunda oynayan yarımmüdafiəçinin demək olar ki, bütün yaşıdları Avropada oynamağa can atdıqları vaxtda o, "köhnə qitə" klublarından gələn təkliflərə "yox" cavabını verirdi. Onun əleyhdarları da həmişə buna görə, Abutreykanı tənqid edirlər. Lakin 30 yaşlı futbolçu Afrikada ardıcıl uğurlar qazanaraq tənqidlərə fikir vermir. İki dəfə Afrika çempionu olan Abutreyka 3 dəfə klubu ilə birgə Afrika çempionlar Liqasının kubokunu qazanıb. Bir çoxları üçün bu titullar çox da ola bilər. Abutreykanın istedadı və bacarığını görənlər tam tərsini düşünürlər. "Abutreyka özü üçün çox balaca olan gölməçədə yaşayan böyük balıqdır". Bu fikir misirli futbolçu barədə tez-tez səslənir. Onun uğurları isə o qədər də ciddi qəbul olunmur. Çünki Abutreyka heç də dünyanın ən güclü futbolçularına qarşı oynayaraq bu uğuru qazanmayıb. FİFA Konfederasiyalar Kuboku isə bədxahları susdurmağa bəs etdi. Abutreyka Braziliya ilə qarşılaşmada meydançada əsl şedevrlər yaradırdı. Onun Kakaya qarşı oynadığı futbol isə alqışa layiq idi. Məğlubiyyətə baxmayaraq, Misir yığması əla təsir bağışladı. Abutreyka meydançanın mərkəzində yaxşı oynamaqla yanaşı, hücuma da kömək edirdi. Bu qədər müsbət oyun keyfiyyətlərinə baxmayaraq, o, əsla özündənrazı deyil. Braziliyalılara qarşı o, sadəcə, işini görürdü və dünyanın ən güclü futbolçuları ilə başabaş mübarizə aparırdı.
Həyatda isə Abutreyka çox fərqlidir. Ona qısaca olaraq, yüksək insani dəyərlərlə yaşayan şəxs demək olar. Abutreyka əsl müsəlman kimi bu dəyərlərlə yaşayır və onlara riayət edir. Bunu sübut etməyə ehtiyac yoxdur. İki faktı diqqətinizə çatdıraq. 2006-cı ildə Misir yığması Afrika çempionu oldu. Bu zaman mətbuat onu milli qəhrəman elan etməyə tələsdi. Lakin bütün buna Mohamed elə bir cavab verdi ki, onu heç kim gözləmirdi. O, mətbuatın fikirlərini alt-üst edərək uğuru bir oyunçu deyil, bütün komanda qazandığını bildirdi. Daha sonra yarımmüdafiəçi onun haqqında bu qədər yüksək sözlər deyilməməsini tövsiyə etdi.
İkinci bir hadisə mətbuatda heç də birincidən az əks-səda doğurmadı. 2008-ci ildə Afrika Kubokunda Sudan yığmasına onun vurduğu qol qeyri-adi qeyd edildi. Qoldan sonra Abutreyka futbolkasını çıxardı. Maykasında isə "Qəzzada baş verənlərə görə təəssüf edirəm" yazılmışdı. FİFA-nın qaydalarına əsasən isə stadionda siyasi şüarlar səsləndirmək olmazdı. Abutreyka isə bu qaydanı pozaraq, həmin vaxt İsrail tərəfindən 10 gün blokadaya alınan Qəzza əhalisini açıq şəkildə dəstəkləməkdən çəkinmədi. Oyundan sonra isə Mohamed etdiyi hərəkətdən peşman olmadığını bildirdi. Onun gətirdiyi arqument də tutarlı idi: "Əgər mən bütün dünyaya müraciət edib kiməsə kömək edə bilərəmsə, bunu etməyə məcburam".
Mohamed Abutreyka elə futbolçudur ki, azarkeşlər onu sevir və əllərinin üstündə gəzdirməyə belə hazırdırlar. O, xalq içindən çıxmış bir qəhrəmandır. Lakin bir sual hələ də aktuallığını qoruyur. Abutreykanın Afrikanı tərk etməməsi nə deyir? Bəlkə o, kifayət qədər ambisiyalı deyil? Ya da özünü hər həftə Avropanın ən güclü futbolçularına qarşı oynamağa məcbur edə bilmir? Bəlkə də Misirdə oynamaqdan və yerli azarkeşləri sevindirməkdən zövq alır və ona Premyer Liqanın, Primeronun, A seriyasının milyonları lazım deyil? Bunun cavabını isə yalnız "filosof" özü verə bilər. O isə susur...
