Nəriman Həsənzadə

NƏRİMAN HƏSƏNZADƏ
Həsənzadə Nəriman Əliməmməd oğlu
Doğum tarixi:	18 fevral 1931-ci il (1931-02-18)
Doğum yeri:	Qazax, Azərbaycan

Həyatı

Həsənzadə Nəriman Əliməmməd oğlu — şair, dramaturq, 1954-cü ildən Azərbaycan Yazıçılar Birliyinin üzvü, Azərbaycanın Əməkdar İncəsənət xadimi (1981), filologiya elmlər namizədi (1965), Azərbaycan Respublikası Ali Sovetinin deputatı (1990) - 1931-ci il fevralın 18-də Azərbaycanın Qazax rayonunda anadan olmuşdur. H.Zərdabi adına Kirovabad Dövlət Pedaqoji İnstitutunun dil və ədəbiyyat fakültəsində təhsil almışdır (1949-1953). Moskvada Maksim Qorki adına Ədəbiyyat İnstitutunda təhsilini davam etdirmişdir. "Ədəbiyyat və incəsənət" qəzetinin baş redaktoru vəzifəsində çalışmışdır (1978-1991). Dövlət Mətbuat Komitəsinin sədr müavini olmuşdur. (1991-1993).

Mükafatları

Azərbaycan Respublikasının "Şərəf" ordeni , Belarusiya SSR Ali Soveti Rəyasət Heyətinin Fəxri Fərmanı (1975) və bir medalla təltif edilmişdir.

Kitabları

• Yadına düşəcəyəm (1966)
• Nəriman (1968)
• Zümrüd quşu (1973)
• Bir az möhlət istəyirəm ömürdən (1981)
• Bütün millətlərə (1991)
• Taleyin töhfəsi (1993)

Şeirləri Xəzər Universiteti Nəşriyyatı tərəfindən çap olunan Azərbaycan Sevgi Poeziyası toplusunun İkinci kitabına (Bakı, 2009) daxil edilmişdir (Tərtibçi: Hamlet İsaxanlı).

Yaradıcılığı

Elə dayanırsan, elə baxırsan,
Elə bil qarşında quru bir daşam.
İpək saçlarını bir vaxt oxşayan
Elə bil hardasa mən olmamışam.

Səni dostlarımla, tanışlarımla,
Mən tanış edərdim nə vaxtsa bir-bir.
İndi özgələri yad ehtiramla,
Deyirlər tanış ol...
Nə qəribədir?!

Yuxuda görərdin nə vaxtsa hər dəm,
Yolumu gözlərdin yollardan uzaq.
Mən sənin yuxundan çıxıb gəlmişəm,
Bu da bir yuxudur, gəl tanış olaq.

Qoluna girərdim... bu, yadındadır,
gedərdik... yolumuz , arzumuz şərik.
Qolum qollarının lap yanındadır,
toxunsa biz indi üzr istəyirik.

Hayanda oldumsa səhər, ya axşam,
Aradın sən məni, gördün sən məni.
İndi gözlərinin qabağındayam,
Hayanda durum ki,
Görəsən məni?