Namiq Hacıheydərli

Namiq Hacıheydərli (Namiq Ələkbər oğlu Heydərov) 1975-ci il sentyabrın 8-də Salyan rayonunun Varlı kəndində doğulub. 1997-ci ildə Azərbaycan Dövlət Pedaqoji Universitetini bitirib.

1994-cü ildən dövri mətbuatda çap olunur. 1999-cu ildə Salyanın Qaraçala ərazisini əhatə edən "Dan yeri" Ədəbi Birliyini yaradır. 2000-ci ilin payızında Salyanda "Kürün töhfəsi" Ədəbi Birliyinin sədri seçilir. 1999-cu ildə Dünya Gənc Türk Yazarlar Birliyinin üzvü, 2000-ci ildə məclis üzvü, 2002-ci ildə Azərbaycan Yazıçılar Birliyinin üzvü seçilir. 2004-cü ildə Dünya Gənc Türk Yazarlar Birliyinin Rumınyanın Köstəncə şəhərində keçirilən qurultayında bu qurumun Mərkəzi Təftiş Komissiyasının üzvü, 2009-cu ilin avqustunda Krımın Yalta şəhərində keçirilən qurultayında isə Mərkəzi Təftiş Komissiyasının sədri seçilir.

2008-ci il iyulun 11-də Azərbaycan Yazıçılar Birliyi Muğan Bölməsinin Salyanda keçirilən təsis konfransında Bölmənin sədri seçilir. 2009-cu ilin dekabrında "Vektor" Beynəlxalq Elm Mərkəzi tərəfindən "Türk ədəbiyyatının inkişafındakı xidmətlərinə görə" Şahmar Əkbərzadə Beynəlxalq Mükafatına layiq görülüb. AYB-nin dəstəyi, "Bizim söz" qəzetinin təşkilatçılığı ilə keçirilən 2009-cu ilin ədəbi yekunlarına həsr olunmuş mükafatlandırma mərasimində, rəhbərlik etdiyi AYB Muğan Bölməsi "Azərbaycan Yazıçılar Birliyinin ən fəal Bölməsi" nominasiyasının qalibi elan edilib.

Dünya Azərbaycanlılarının I Qurultayının, Azərbaycan Gənclərinin III Forumunun, Azərbaycan Yazıçılar Birliyinin XI Qurultayının, Krımın Yalta şəhərində keçirilən XIV Türk Dünyası Gənclik Günləri və Qurultayının və digər mühüm tədbirlərin iştirakçısıdır. 8 kitabın, 50-dən artıq elmi, publisistik və pedaqoji məqalənin müəllifidir.