Naxçıvan Beynəlxalq Hava Limanı

Naxçıvan Beynəlxalq Hava Limanı
Tipi:	mülki
Ölkə:	Azərbaycan
BMAT kodu:	UBBN
BHNA kodu:	NAJ
Yerləşməsi:	Naxçıvan şəhərinin mərkəzindən 4 kilometr cənub-şərqdə
Hündürlüyü:	+873 m
Yerli vaxt:	UTC +4/+5
Əməliyyatçı:	Azərbaycan Hava Yolları

Naxçıvan Hava Limanı Naxçıvan Muxtar Respublikasının eyni adlı şəhərinin hava limanıdır. Şəhərin mərkəzindən 4 kilometr məsafədə yerləşir və ölkənin blokadada olan bu regionunun yeganə hava qapılarıdır.

Tarixi

Naxçıvan Hava Limanı 1970-ci illərdə tikilmiş və 3-cü dərəcəli təyyarələri (Yak-40, An-24 və onlara oxşar) qəbul etmişdir. Bakı şəhərinə reyslər həyata keçirilirdi. Hava Limanı 1990-cı illərin ikinci yarısında inkişaf etməyə başladı: Naxçıvan Muxtar Respublikasının Ermənistan tərəfindən blokadaya alınması nəticəsində aviasiya nəqliyyat əlaqəsi üçün yeganə vasitə olmuşdur. Bu səbəbdən, 1992-ci ildə, həmin dövrdə Naxçıvan Muxtar Respublikasının Ali Məclisinin (Parlamentin) sədri olan Heydər Əliyev Naxçıvan Hava Limanının uçuş enmə zolağının yenidən qurulması təşəbbüsünü irəli sürdü və bu iş yerli mütəxəssislər cəlb olunmaqla qısa müddət ərzində həyata keçirildi. Uçuş enmə zolağının uzadılması nəticəsində hava limanı Tu-134 tipli təyyarələri qəbul etmək imkanı əldə etdi. 2002-2004-cü illər ərzində yeni təyyarə vağzalı tikildi, 2004-cü ilin aprel ayında isə Naxçıvan Hava Limanı Beynəlxalq Hava Limanı statusunu qazandı. Naxçıvan hava limanı burada rüşvətxorluğun və bürokrasiyanın həddən artıq yüksək olmasına görə tez-tez mətbuat tərəfindən kəskin tənqidə məruz qalır.

Texniki göstəriciləri

Hava limanının uçuş-enmə zolağının uzunluğu 3300 metr, örtüyün materialı isə betondandır. Naxçıvan hava limanından Bakı aeroportuna, Moskvanın Domodedovo və Vnukovo aeroportlarına, həmçinin İstanbulun Sabiha Gökçen Beynəlxalq Hava Limanına uçuşlar həyata keçirilir.