Nightwish

Vikipediya, açıq ensiklopediya
Keçid et: naviqasiya, axtar

Nightwish (bəzən NW olaraq qısaldılır) — Finlandiya musiqi qrupu. 1996-cı ildə Kiteedə yaradılan bu qrup 1997-2001-ci illərdəki mahnılarında pauer-metal musiqi nümunələri yaratsa da, 2002-ci ildən sonrakı albomlarında bu tərzə simfonik musiqi elementləri də əlavə etməklə simfonik-metal musiqisinin yaradıcılarından olmuşdur. Bu günə qədər 4 milyon nüsxədən çox musiqi albomu satan Nightwish, qurulduğu gündən bəri 40-dan çox ölkədə konsert vermişdir. İlk albomu "Angels Fall First" və ilk mahnısı "The Carpenter" 1997-ci ildə yayılandan sonra öz ölkəsində məşhurlaşan qrup 1998, 2000 və 2002-ci illərdə satışa çıxardığı "Oceanborn", "Wishmaster" və "Century Child" albomları ilə bütün dünyada tanındı.

2004-cü ildə buraxdıqları və 1 milyon nüsxə satılan "Once" albomundakı "Nemo" və "Wish I Had An Angel" mahnılarına çəkilən kliplər MTV kanalında nümayiş olunmuş, eləcə də ABŞ filmlərində səsləndirilərək qrupa Amerikada böyük satış uğuru qazandırmışdır. Bundan sonra qrup "Once" Dünya Turuna çıxmışdır. Turun sonlarına yaxın - 2005-ci ilin sentyabr ayında qrupun "Highest Hopes" adlı seçmə mahnılarından ibarət musiqi albomu buraxılmışdır.