Qardabani
Qardabani (gürcücə: გარდაბანი)- Gürcüstan Respublikasının Borçalı bölgəsində rayon inzibati vahidi və onun mərkəz şəhəri. Toponimin hərfi mənası gürcü dilində "sis (tüstü) görürəm" anlamına gəlir. Rayon 1938-ci ildə təsis edilmiş və 1947-ci ilədək Qaratəpə adını daşımışdır.
Mündəricat |
[redaktə] Fiziki-coğrafi mövqeyi
Qardabani cənub-şərqdən Azərbaycan Respublikası, şimal-şərqdən Saqareco rayonu, şimaldan Msxeta rayonu, qərbdən isə Marneuli və Tetriskaro rayonları ilə həmsərhəddir. Rayon mərkəzi olan Qardabani şəhəri Rustavidən 25 km., paytaxt Tiflisdən 42 km. məsafədə yerləşir.
Rayon ərazisinin əksər hissəsi dəniz səviyyəsindən hündürlüyü təqribən 300 metr təşkil edən Qarayazı düzündə yerləşir. Ən hündür nöqtəsi 1499 metr olan Sanişno dağıdır.
[redaktə] İnzibati bölgüsü
Sahəsi 1304,1 km2[1] olan Qardabani rayonunun ərazisi 1 səhər (Qardabani şəhəri - 11786 nəfər), 2 qəsəbə (Lilo-2132 nəfər, Kocor-1358 nəfər) və 47 kənddən ibarətdir. Kəndlərin 33-də gürcülər, 14-də isə azərbaycanlılar üstünlük təşkil edir. Kəndlərin 6-nın əhalisinin sayı 5000 nəfərdən çoxdur: Martkofi (7666 nəfər), Sərtiçala (7041 nəfər), Nəzərli (5808 nəfər), Soğanlıq (5698 nəfər), Kosalı (5612 nəfər) və Qamarcveba (5282 nəfər).
[redaktə] Əhalisi
2006-cı ilin əvvəlinə olan məlumata əsasən Qardabani rayonunun əhalisinin sayı 116,4 min nəfər olmuşdur. 2002-ci il əhali siyahıyaalmasının nəticələrinə görə rayon əhalisinin 53,2%-i gürcülər, 43,7%-i azərbaycanlılar, 0,9%-i ermənilər, 0,9%-i ruslar, 0,2%-i isə yunanlardir. Əhalinin 13,6%-i şəhər əhalisi, 86,3%-i isə kənd əhalisidir. Qardabani Borçalının yeganə rayonudur ki, 1989-cu ildən etibarən əhalisi nəinki azalmamış, hətta 1,3% artmışdır.
[redaktə] Təsərrüfatı
Qardabani rayonu Gürcüstanın aqrar-sənaye rayonudur. Energetika sənayesi, xüsusilə istilik energetikası kifayət qədər yüksək inkişaf etmişdir. 2006-cı ildə Gürcüstanda toplanmış yulafın 24,4%-i, tərəvəzçilik məhsullarının 14%-i, günəbaxanın 5,6%-i, qarğıdalının 5,3%-i, yumurta istehsalının 17,4%-i, yun istehsalının 8,6%-i, ət istehsalının 4,6%-i, süd istehsalının 4,4%-i, diri ev quşlarının 10,6%-i, davarın 7,9%-i, mal-qaranın isə 3,8%-i Qardabani rayonunun payına düşmüşdür.
