Turqut Özal

Turqut Özal türk. Halil Turgut Özal
Türkiyə Respublikasının 8-ci prezidenti
9 noyabr 1989 — 17 aprel 1993
Baş nazir:	Yıldırım Akbulut Məsud Yılmaz Süleyman Dəmirəl
Sələfi:	Kənan Evrən
Xələfi:	Süleyman Dəmirəl
Türkiyə Respublikasının 27-ci baş naziri
13 dekabr 1983 — 31 oktyabr 1989
Sələfi:	Bülənt Ulusu
Xələfi:	Yıldırım Akbulut
Partiya:	Milli əmin-amanlıq partiyası Ana Vətən Partiyası
Təhsili:	İstanbul Texniki Universiteti
Dini:	İslam
Təvəllüdü:	13 oktyabr 1927-ci il(1927-10-13) Malatya, Türkiyə
Vəfatı:	17 aprel 1993-cü il (65 yaşında) Ankara, Türkiyə
Dəfn yeri:	İstanbul, Türkiyə
Atası:	Mehmet Sıddık
Anası:	Hafizə xanım
Həyat yoldaşı:	Semra Özal
Uşaqları:	oğlu: Əhməd qızları: Zeynəb və Efe
İmzası:

Turqut Özal (türk. Halil Turgut Özal 13 oktyabr 1927-17 aprel 1993) — Türkiyə Respublikasının 8-ci prezidenti.

Həyatı

Turqut Özal 1927-ci ildə Türkiyənin Malatya şəhərində anadan olub. 1950-ci ildə İstanbul Texniki Universitetinin məzunu olan Turqut elektrik mühəndisi ixtisasına yiyələnib.

1952-ci ildə ABŞ-a yollanan Turqut orada iqtisadiyyat üzrə təhsilini tamamlayıb. Türkiyəyə geri qayıtdıqdan sonra Elektrik İşləri Etüd İradəsi baş direktorunun köməkçisi kimi Türkiyənin elektrifikasiyası ilə bağlı layihələrdə yaxından iştirak edib. 1961-1962-ci illərdə hərbi xidmətini Milli Müdafiə Nazirliyinin Elmi Məsləhət Qurumunun üzvü kimi yerinə yetirən Turqut Dövlət Planlaşdırma Təşkilatının yaradılmasına öz töhfəsini verib. Daha sonra Ortadoğu Texniki Universitetində pedaqoqluq fəaliyyəti ilə məşğul olub.

Bir müddət Nazirlər kabinetinin Texniki Mütəxəssislər şöbəsinin üzvü olan Turqut 1967-1971-ci illərdə Dövlət Planlaşdırma Təşkilatının müşaviri vəzifəsini icra edib. Turqut Özal Bundan əlavə İqtisadi Koordinasiya təşkilatı, Maliyyə və Kredit təşkilatı, RCD koordinasiya qurumu və AET koordinasiya qurumunun rəhbəri vəzifələrini icra edib. 1972-1973-cü illərdə Dünya bankında məsləhətçi olaraq fəaliyyət göstərən Turqut Türkiyəyə qayıtdıqdan sonra müxtəlif sənaye qurumlarında çalışıb. 1979-cu ilin sonlarına doğru Baş nazirin müşaviri vəzifəsinə təyin olunan Turqut eyni zamanda Dövlət Planlaşdırma Təşkilatının müşaviri vəzifəsini də vəkalətən icra edib.

1980-ci il 12 iyulda baş verən çevrilişdən sonra qurulan hökumətdə iqtisadi işlərdən məsul baş nazir köməkçisi təyin edilsə də 1982-ci ildə vəzifəsindən istefa verib. 1983-cü ildə Ana Vətən partiyasını quran Özal elə həmin il keçirilən seçkilərdə partiyasının uğur qazanması nəticəsində Türkiyə respublikasının 19-cu baş naziri kimi hökuməti qurmaqla vəzifələndirilib. 1987-ci ildə keçirilən seçkilərdən sonra yenidən hökumətə rəhbərlik edərək baş nazir kimi fəaliyyət göstərib. 1989-cu ilin 31 oktyabrında TBMM tərəfindən Türkiyə Cumhuriyyətinin 8-ci prezidenti seçilən Turqut Özal 1989-cu ilin 9 noyabrdan etibarən vəzifəsinin icrasına başlayıb.

Turqut Özal 1993-cü il aprelin 17-də Ankarada vəfat edib.

Mənbə

• Türküstan qəzeti. 20 aprel 2008-ci il. № 13(91)