Vikipediya:İdarəçilərin fəaliyyəti

Vikipediya, açıq ensiklopediya
Keçid et: naviqasiya, axtar
Qısayol:
VP:İFSV

Prinsip üçün 25 iyul-8 avqust 2014 tarixləri arasında səsvermə keçirilir.

  • Səsvermə müddəti:25 iyul-8 avqust 2014
  • Qüvvədədir:

Vikipediya idarəçilərinin əsas fəaliyyəti — Vikipediya istifadəçilərinə yardım etmək, məqalə müəlliflərinin işinin təşkilini həyata keçirməkdir. İdarəçi həmçinin, istifadəçilərin məqalələri təyin olunmuş qaydalar əsasında yaratmalarına nəzarət edir, eyni mövzulu və mənasız məqalələrin yaradılmasının qarşısını alır.

İdarəçilərin gündəlik görməli olduqları işlər

İdarəçilik statusuna Vikipediyadakı fəaliyyətə görə verilmiş mükafat kimi baxmaq olmaz. İdarəçi "Vikipediyanın fəxri istifadəçisi" deyil.

İdarəçi ilk növbədə Vikipediyaya xidmət etmək vəzifəsini öhdəsinə götürmüş istifadəçidir:

  1. İdarəçilər Son dəyişikliklər səhifəsini tez-tez yoxlamalıdırlar. Bununla onlar yeni vandalizm fəaliyyətlərini aşkar edə və lazımsız məqalələri silə bilərlər.
  2. İdarəçilər tez-tez Silinəcək məqalələr səhifəsini yoxlamalı və silinməsi təklif olunan məqalələri yoxlayaraq silməli və ya saxlamalı, qaydaya salmalıdırlar.
  3. İdarəçilər tez-tez mühafizə olunan səhifələrin müzakirə səhifələrini yoxlamalı və orada yazılan təklif və ya iradlara cavab verməlidirlər.
  4. İdarəçilər tez-tez qaralama halında olan məqalələri yoxlamalı, mümkün olduqca onları qaydaya salmalı və bununla da qaralama kateqoriyalarının siyahısını azaltmalıdırlar.
  5. İdarəçilər Vikipediyanın bütün xidmətlərinin normal işini təmin etməli, müzakirələr zamanı baş verən mübahisələri Vikipediya qaydalarına uyğun olaraq həll etməlidirlər.

Yeni idarəçilərə məsləhətlər

  1. Sizə idarəçilik təklif olunursa, ilk növbədə fikirləşin - bu sizə lazımdırmı? Nəzərə alın ki, idarəçilik böyük əmək və vaxt tələb edir. İdarəçi digər istifadəçilərdən fərqli olaraq Vikipediyada daha çox vaxt keçirməli və bütün vacib müzakirələrdə və səsvermələrdə iştirak etməlidir.
  2. Bir idarəçi eyni zamanda bütün işləri görə bilməz: həm məqalə redaktə etsin, yüklənən şəkilləri nəzarətdə saxlasın, şablon yaratsın, həm də baş verən mübahisələrin həll olunmasında iştirak etsin. Odur ki, idarəçiliyə başlamazdan əvvəl ilk növbədə hansı işləri görəcəyinizi planlaşdırın.
  3. Boş məqalələr və kateqoriyalar yaratmayın, istifadəçilərə istehzalı sözlər yazmayın. Unutmayın ki, digər istifadəçilər sizdən nümunə götürürlər.
  4. Fəaliyyətinizdə sərbəst olun, heç kimin təsiri altına düşməyin və kiminsə xoşuna gəlməyə çalışmayın. Unutmayın ki, fəal istifadəçilər Vikipediyada baş verənləri və bütün müzakirələri izləyirlər.

Vikipediya istifadəçilərinə münasibət

  1. İdarəçi istifadəçiyə müraciət edərkən rəsmi və etik qaydaları gözləməlidir. Müraciət elə olmalıdır ki, istifadəçi özünü təhqir olunmuş və ya lazımsız hiss etməsin, əksinə onun Vikipediyada məqalə yaratmasına və redaktələrinə şad olduqlarını hiss etsin.
  2. İdarəçilər Vikipediya qaydalarına hər zaman riayət etməli və digər istifadəçilərə nümunə olmalıdırlar.
  3. Yeni istifadəçilərdən bütün qaydalara və məqalə yaratma üsullarına riayət etməyi tələb etmək düzgün deyil. Yalnız müəyyən təcrübəsi olan və Vikipediya cəmiyyətində artıq tanınan istifadəçilərdən məqalələri interviki, kateqoriya və bölmələr üzrə yaratmalarını tələb etmək olar.
  4. İdarəçi istifadəçi ilə müzakirə apararkən səbrli olmalıdır. Hər hansı qərar qəbul etməzdən öncə qaydaları bir daha nəzərdən keçirməlidir.
  5. İdarəçinin Vikipediya qaydalarını bilməsi və bu qaydalar əsasında fəaliyyət göstərməsi məcburidir.
  6. İdarəçi şəxsən ona olunan müraciətlərə, qısa müddət ərzində münasibət bildirməlidir. İdarəçi sualları cavablandıra bilməkdə çətinlik çəkirsə, bu barədə qarşı tərəfə məlumat verməlidir. Yalnız müraciətlərdə etik qaydaların pozulması halları olduqda idarəçi cavab verməyə bilər. İdarəçi qeyd olunan müddət ərzində aktiv deyilsə, aktiv idarəçilər imkan daxilində həmin müraciətləri cavablandırmalıdırlar.
  7. Bəzən istifadəçilərin sualları heç bir məna kəsb etmir. Bu zaman idarəçi sualın düzgün verilmədiyini istifadəçiyə bildirməli, mübahisəyə səbəb ola biləcək ümumi sualları özü cavablandırmalıdır. Sual və ya şərh təxribat xarakterlidirsə, idarəçiyə bu sualı silmək ixtiyarı verilir.
  8. İdarəçi hər hansı mübahisəli məsələdə və ya səsvermədə bütün fəal istifadəçilərin müzakirə səhifələrinə daxil olaraq təbliğat aparmamalıdır. Təbliğatdan spama bir addımdır. Spamı isə insanlar xoşlamırlar.

İstifadəçinin bloklanması

  • Vikipediya qaydalarını pozan, vandalizmlə məşğul olan istifadəçi bloklama qaydalarına müvafiq olaraq ya dərhal bloklanmalı, ya da ona səhvini göstərməklə bloklanmasının mümkünlüyü haqqında xəbərdarlıq edilməlidir. Xəbərdarlığa məhəl qoymayaraq vandalizmi davam etdirən istifadəçi idarəçinin təyin etdiyi müddətə bloklana bilər.
  • İdarəçi hər-hansı istifadəçini bloklayarkən onun müzakirə səhifəsində blok səbəbini və müddətini yazmalıdır! Bu yazı idarəçinin fəaliyyətinin şəffaflığını təmin edər, eyni zamanda digər istifadəçilər bloklamanın səbəbini təhlil edərək gələcəkdə bu cür fəaliyyətdən çəkinərlər.

İdarəçilərin əsas vəzifələri

İdarəçi 6 ay ərzində ən azı 500 redaktə etməlidir. Redaktələrdən 25-i məqalələrin adlarının dəqiqləşdirilməsinə, şablon və kateqoriyaların yaradılmasına, faylların yüklənməsinə aid olmalıdır. 6 ay ərzində idarəçi həm də yalnız idarəçilərin səlahiyyətinə daxil olan, sayı 25-dən az olmayan fəaliyyətlə də məşğul olmalıdır: səhifənin silinməsi və yaxud bərpa edilməsi, mühafizəsi və yaxud mühafizənin kənarlaşdırılması, istifadəçilərin bloklanması və yaxud blokun götürülməsi, MediaViki səhifələrində redaktələr və s.

İdarəçinin statusundan məhrum edilməsi

  1. İdarəçi Vikipediyada 6 ay ərzində əsas vəzifələrinə aid şərtləri yerinə yetirməyibsə, ona 3 ay müddətində idarəçi fəaliyyətini aktivləşdirmək təklif olunur. Bu təklifin edildiyi tarixdən sonrakı 3 ay müddətində idarəçinin fəaliyyətində aktivlik müşahidə olunmazsa, ondan idarəçi statusunun alınması ilə əlaqədar səsvermə keçirilə bilər. Səsvermənin keçirilməsinə qərar aktiv idarəçilərin müzakirəsində əldə olunan konsensus əsasında verilə bilər. Əgər səsvermə nəticəsində idarəçiyə etimad göstərilsə, lakin səsvermənin nəticələrinin elan edildiyi tarixdən sonrakı növbəti 6 ay ərzində o fəaliyyətini bu qaydaların "İdarəçilərin əsas vəzifələri" bölməsində göstərilən minimal tələblərə uyğunlaşdırmasa, o zaman heç bir müzakirə aparılmadan, heç bir səsvermə keçirilmədən həmin istifadəçi idarəçi statusundan dərhal məhrum edilə bilər.
  2. İdarəçinin vəfat etməsi haqqında dəqiq məlumat əldə edildiyi andan onun fəaliyyətinə xitam verilir.
  3. İdarəçinin özü və ya başqa idarəçi ilə bağı etimad səsverməsi keçirməsinə icazə, yalnız idarəçilərin müzakirəsində əldə olunan konsensus əsasında verilə bilər.
  4. İdarəçinin öz parolunu digər istifadəçiyə verməsi haqqında dəqiq məlumat əldə edildiyi andan o, idarəçi statusundan məhrum edilir.
  5. İdarəçi statusundan məhrum edilən şəxs həm də bürokratdırsa, o avtomatik olaraq bu statusdan da məhrum edilir.

Xarici keçidlər