Vikipediya:Bitkilər/Uşaqlar üçün layihə/Albalı
Bu Uşaqlar üçün bir test layihədir.
Meyvələr içərisində albalı dadına, rənginə, gözəlliyinə görə seçilir. Ağacının hündürlüyü 5—10 metr olur. Yaz gələndə albalı ağacları ağ və ya ağ-çəhrayı çiçəklər açır, sanki bağ-bağçalar ağ örpəyə bürünür. Həmin bu ağ-çəhrayımtıl çiçəklərdən bir azdan sonra sırğayabənzər sallaq saplağın uçunda açıq-qırmızı, tünd-qırmızı və ya qarayaçalan muncuqlara oxşayan şirəli giləmeyvələr yetişir.
Albalı faydalı meyvədir. Onu yeməyi hamı xoşlayır. Çünki onun tərkibində orqanizm üçün lazım olan vitaminlər var. Albalının təzə yetişmiş giləmeyvələri yeyilir, qurudulur, ondan mürəbbə, kompot, şərbət və s. hazırlanır. Yarpağında boyaq maddəsi var. Albalı ağacları həm də qollu-budaqlı olur. Azərbaycanın bir sıra rayonlarında albalıya gilənar, turş gilas da deyirlər. Respublikamızda ən çox Gəncə, Göyçay, Gülüs, Əndəmic, Avropa sortlarından Anadolu, Şpanka və s. yetişdirilir.
