Xəzər İntellektual Gənclər Klubu

Xəzər İntellektual Gənclər Klubu İctimai Birliyi
Növü	İctimai birlik
Yaranma tarixi	14 aprel 2001
Qeydiyyat tarixi	17 fevral 2007
Sədri	Seymur Teymurov
Rəsmi saytı	Xazar.org

Xəzər İntellektual Gənclər Klubu — ilk azərbaycandilli intellektual oyunlar klubu və Nə? Harada? Nə zaman? formatında intellektual oyunların Azərbaycan dilində ilk təşkilatçısı, ictimai birlik formasında fəaliyyət göstərən qeyri-hökumət təşkilatı. Nə? Harada? Nə zaman? klublarının Beynəlxalq Assosiasiyasının üzvü (2011).

Xəzər İntellektual Klubu digər azərbaycandilli intellektual klubların formalaşmasına təkan verməklə yanaşı, bu cür klublar üçün başlıca model və baza rolunu oynamışdır.

Tarixi

Klubun əsası 2001-ci il aprelin 14-də Bakı Dövlət Universitetinin bir qrup tələbəsi tərəfindən həyata keçirilən Azərbaycan dilində ilk Nə? Harada? Nə zaman? oyunu ilə qoyulmuşdur və həmin tarixdən bu günədək qısa yay fasilələri istisna olmaqla Klub fasiləsiz olaraq fəaliyyət göstərir. Klub 2007-ci ilin fevralında Azərbaycan Respublikası Ədliyyə Nazirliyi tərəfindən ictimai birlik kimi dövlət qeydiyyatına alınmışdır. 27 noyabr 2011-ci ildə Beynəlxalq Klublar Assosiasiyasının İdarə heyətinin Moskva şəhərində keçirilən növbəti iclasında yekdilliklə BKA-ya tam hüquqlu üzv seçilmişdir.

Fəaliyyəti

Xəzər klubu 4 əsas növdə — Nə? Harada? Nə zaman?, Breyn-rinq, Erudit-kvartet və Fərdi oyun — intellektual oyunlar keçirir. Oyunlar həftənin istirahət günlərində keçirilir. Bundan əlavə ildə bir neçə dəfə intellektual oyunlar üzrə turnirlər təşkil olunur. Klubda iştirak üçün yaş və s. məhdudiyyət qoyulmur.

Klub 2007-ci ilin sonlarınadək fəaliyyətini Bakı Dövlət Universitetində həyata keçirsə də, sonradan qısa müddətə Azərbaycan Dillər Universitetinə keçmiş, hazırda isə Bakı Slavyan Universitetində fəaliyyət göstərir.

Strukturu

Hal-hazırda klubda 4 liqada yarışan 60-a yaxın komanda oyunlarda müntəzəm iştirak edir. Liqalarda yarışan iştirakçıların sayı 300-dən artıqdır. Klubda Birinci və İkinci liqalar, Universitet (və ya Üçüncü) və Məktəb liqaları fəaliyyət göstərir.

Klubda oyunlar mütəmadi olaraq şənbə və bazar günləri keçirilir. Şənbə günü Üçüncü liqada oyunlar 3 universitetdə — Bakı Dövlət Universiteti, Bakı Slavyan Universiteti və Azərbaycan Texniki Universitetində sinxron təşkil olunur. Sonradan nəticələr toplanır və qaliblər müəyyən olunur. Digər liqalar bazar günləri yarışır. 5 həftəlik dövrədən sonra nəticələrinə görə komandalar liqalarda öz yerlərini qoruyur, itirir və ya digər liqaya vəsiqə qazanırlar.

Hədəf qrupu

Klubun əsas hədəf qrupu öz üzərində daha çox çalışan, inkişaf etməyə meylli olan, cəmiyyətdə tutduğu mövqeyə görə digərlərindən fərqlənən, müxtəlif uğurlar qazanmış gənclərdir. Təşkilatın fəaliyyətində birbaşa iştirak edənlər:

• Yuxarı sinif şagirdləri (13-18 yaş);
• Tələbələr (18-25 yaş);
• Digər gənclər (25-35 yaş).

Klub əsasən mətbuat vasitəsilə digər sosial qruplar arasında da təbliğat işləri aparır. Klubun fəaliyyətinə cəlb olunanlar:

• valideynlər;
• müəllimlər;
• iştirakçıların dostları.

Əlamətdar hadisələr

10 illik fəaliyyəti ərzində Klub 40-a yaxın intellektual turnir, müxtəlif intellektual oyun növləri üzrə 50-dən çox çempionat, həftəsonları keçirilən 400-dən artıq dövrə oyunu, 30-a yaxın seminar, təlim və digər tədbirlər, 15000-dən çox iştirakçı.

• 2001 – Təşkilatın təsis edilməsi, Tələbələr arasında ilk Azərbaycan çempionatı;
• 2002-2003 – Fəaliyyət üçün bazanın formalaşdırılması;
• 2004 – "Xəzər" dövri nəşrinin çap olunması;
• 2005 – Məktəb liqasının təsis edilməsi;
• 2006 – Məktəblərarası Nə? Harada? Nə zaman? oyunu üzrə yarış;
• 2007 – "Novruz Kuboku";
• 2008 – "Trend Kuboku", Nə? Harada? Nə zaman? oyunu üzrə yarış;
• 2009 – "Payız Kuboku", Nə? Harada? Nə zaman? oyunu üzrə universitetlərarası yarış;
• 2010 – 4 universitetdə intellektual oyunlar üzrə klubların yaradılması üzrə "Mənim klubum" layihəsi.
• 2011 – 10 illik yubiley, Nə? Harada? Nə zaman? klublarının Beynəlxalq Assosiasiyasına üzvlük.

Klubun tərəfdaşları

• Azərbaycan Respublikası Gənclər və İdman Nazirliyi;
• "İrəli" İctimai Birliyi;
• Bakı şəhər Gənclər və İdman Baş İdarəsi;
• Azərbaycan Gənclər Təşkilatları İttifaqı;
• Gametv.az Prodüser Mərkəzi;
• GRBS şirkəti;
• Bakı Dövlət Universiteti;
• Bakı Slavyan Universiteti;
• Azərbaycan Texniki Universiteti;
• Azərbaycan Dillər Universiteti;
• Akademiya Kitab Mərkəzi.

Klub həmçinin ölkənin ən qabaqcıl KİV-ləri ilə əməkdaşlıq edir. Yaydığı xəbərlər mütəmadi olaraq Trend, Day.az, 1news.az, Apa.az, Lent.az, Gun.az, Qafqazinfo.az kimi internet rerurslarda, Зеркало, Эхо, Каспи, 525-ci qəzet, Ayna, Ekspress, Şərq kimi qəzetlərdə nəşr olunur. İTV və AZTV isə hətta klubun fəaliyyətini təbliğ edən film də çəkib. Klubun bəzi üzvləri AZTV-də yayımlanan "Что? Где? Когда?" proqramında, Rusiyanın Birinci və СТС kanallarında yayımlanan "Брейн-ринг" və НТВ kanalında yayımlanan "Своя игра" proqramında çıxış edirlər.

Həmçinin bax

• Atəşgah İntellektual Oyunlar Klubu
• Turan İntellektual Oyunlar Klubu

Xarici keçidlər

• Klubun rəsmi veb-saytı
• Klubun forumu
• Xəzər İntellektual Gənclər Klubu intellektual klubların beynəlxalq reyestrində
• Klubun 10 illiyinə həsr olunmuş musiqili video-çarx — Youtube