Xasay Zeynalov
| Xasay Zeynalov | |
| Xasay İsrafil oğlu Zeynalov | |
 |
|
| Doğum tarixi: | 1927-ci il |
|---|---|
| Doğum yeri: | Daşkənd, Göyçə, Ermənistan SSR |
| Vəfatı: | 25 noyabr 2011-ci il |
| Vəfat yeri: | Yeni Günəşli, Bakı |
Zeynalov Xasay İsrafil oğlu – şair
Mündəricat |
[redaktə] Həyatı
Zeynalov Xasay İsrafil oğlu, 1927-ci ilin mart ayında hər tərəfdən şiş zirvəli, al-yaşıl dağlarla əhatə olunmuş, qədim ozanlar yurdu olan Göyçə mahalının Daşkənd kəndində anadan olmuşdur. Atası Israfil Kərbəlayi Zeynal oğlu Böyük Vətən Müharibəsində həlak olmuşdur. Xasay Zeynalov 1943-cü ildə Daşkənd kənd orta məktəbini bitirdikdən sonra Pedaqoji məktəbə qəbul olmuş və 1945-ci ildə Pedaqoji məktəbi bitirmişdir.
1950-ci ildə Azərbaycan Dövlət Pedaqoji Institutunun tarix fakültəsinə qəbul olan Xasay Zeynalov 1955-ci ildə həmin fakültəni bitirmişdir.
Xasay Zeynalov 1943-cü ildən 1988-ci ilə kimi Daşkənd kənd orta məktəbində tarix müəllimi, 1955-ci ildən 1958-ci ilə kimi həmin orta məktəbdə dərs hissə müdiri, 1959-1960-cı illərdə Basarkeçər Rayon Partiya Komitəsində təlimatçı, 1961-1962-ci illərdə Daşkənd kənd kolxoz idarə heyətinin sədri, 1962-ci ildən 1972-ci ilə kimi Daşkənd kənd sovetinin sədri, 1973-cü ildən 1988-ci ilə kimi isə Daşkənd kənd orta məktəbində direktor müavini işləmişdir.
Xasay Zeynalov həmçinin 1975-ci ildən 1988-ci ilə kimi Rayon Partiya Komitəsində partiyaya qəbul komissiyasının üzvü və Daşkənd kənd orta məktəbində ilk partiya təşkilatının katibi işləmişdir.
1961-ci ildən 1988-ci ilə kimi daimi olaraq kənd və rayon sovetlərinə deputat seçilmişdir. SSRI Ali Sovetinin fəxri fərmanı və bir neçə medallarla təltif olunmuşdur. Əmək veteranı və təqaüdçüdür.
30 noyabr 1988-ci ildən məlum Dağlıq Qarabağ hadisələri ilə əlaqədar olaraq doğma yurdu tərk etmiş və Bakı şəhərində məskunlaşmışdır.
1940-cı illərdən şeir yazmağa başlayan Xasay Zeynalov şifahi və yazılı xalq ədəbiyyatını mükəmməl bilən, aşıq sənətinə, xalq dastanlarına böyük həvəs göstərən bir şairdir. Ədəbi yaradıcılıqla hal-hazırda da məşğul olur. Yaradıcılığının çox hissəsi Göyçə tarixindən bəhs edən dastan-poemalardan və Göyçə həsrətli şeirlərindən ibarətdir. Bunula yanaşı Xasay Zeynalov aşıq şeir üslubunda olan güllü qafiyə, cığalı təcnis, dodaqdəyməz, müstəzad, qıfılbənd-bağlama və başqa şeirlər də yazıb yaradırdı.
25 noyabr 2011-ci ildə Bakı şəhərinin Yeni Günəşli qəsəbəsində vəfat etmişdir.
[redaktə] Əsərləri
- "Göyçəsiz günlərim", Bakı, "Nurlan", 2006. 288 səh. 400 tiraj.
- "Vətən həsrətində, el firqətində", Bakı, "Hərbi Nəşriyyat", 2009. 312 səh. 200 tiraj.
[redaktə] Yaradıcılığı
AY NƏBİ
Dağlıq Qarabağ uğrunda gedən döyüşlərdə şəhid olan qardaşım oğlu Zeynalov Nəbi Surxay oğlunun əziz xatirəsinə
Vətən savaşında, yurd savaşında
Nişan aldı səni yağı, ay Nəbi.
Dərd üstündən dərdimizi artırdı
Çəkdi sinəmizə dağı, ay Nəbi.
Tale tərs gətirdi, tərsinə baxdı,
Namərdlər gülləni sinənə çaxdı,
Ananın gözündən qanlı yaş axdı
Saraldı gözünün ağı, ay Nəbi.
Yer də, göy də Nəbi deyib ağladı,
Buludlar ah çəkdi, çaylar çağladı,
Gözəl bacıların qara bağladı
Soldurdular gül yanağı, ay Nəbi.
Təzə tamamıydı on səkkiz yaşın,
Kim idi bilmədik on dörd yoldaşın,
Qəmlərə dalıbdı atan, qardaşın
Kəsilib qolunun sağı, ay Nəbi.
Düçar oldun zəmanənin badına,
Xasay qurban, sənin şəhid adına,
Çatammadım harayına, dadına
Yandı ürəyımin tağı, ay Nəbi.
Əzizinəm dəng eylər,
Dərdin məni dəng eylər,
Elə dərdə salıbsan
Axırda bəd rəng eylər.
DURURMU GÖRƏN
Sazlı, sözlü bizim qədim Göyçənin,
Dağları, düzləri, dururmu görən?
Yana-yana tənha qoyub gəldiyim,
Ocağın közləri, dururmu görən?
Göyçənin gölündə üzüb yayxanan,
Üzə-üzə bir-birinə toxanan,
Qaqqıldaşa-qaqqıldaşa çalxanan,
Ördəyi, qazları dururmu görən?
"Hacı Qurban" yaylağının sağında,
"Səngər təpəsi"ndə yol qırağında,
Xasay deyir, bizim "Tərsə dağı"nda,
Babamın izləri, dururmu görən?
ARAZ
Araz Yaquboğluna
Xeyirxah əməllə, dərin kamalla,
Şərəfli işini bildirdin, Araz.
Dost bağında əlvan güllər əkərək,
Xoş amalla məni dindirdin, Araz.
"Nəcəf dastanı"nı yaydın ellərə,
Yazdığım şeirlər düşdü dillərə.
Təşəkkür Yasimə, Hatəm əllərə,
Özünü dostlara sevdirdin, Araz.
Xasay deyir, yazan əlin var olsun,
Yolunda nə çovğun, nə də qar olsun.
Qadir Allah özü sizə yar olsun,
Bu qəmli könlümü güldürdün, Araz.
2004-cü il, Bakı şəhəri.
Ay baba
Babam Məşədi Qasıma
Haqq səni yaratdı cəsur bir insan
Gecəni gündüzə qatdın, ay baba.
Elinə, obana hey həyan olub
Nə qədər səngərdə yatdın, ay baba.
Şahiddi "Oyuqlu", "Səngər təpəsi",
İdris, Ziyad, Korallarin Vəlisi,
Atını oldürüb topun gülləsi
Dizədək torpağa batdın, ay baba.
Gecə-gündüz köhlən atınla getdin,
Şəhri Xorasana bir səhər yetdin,
İmami Rzanı ziyarət etdin
Arzu, amalına çatdın, ay baba.
Vüqarlı dağlardan ilhamın aldın,
Şücaət göstərdin, eldə ucaldın,
Şərəflə Məşədi adını aldın
Parlaq günəşiydin, batdın, ay baba.
Xasayam, yaxşını pisdən seylədin,
Daşnakları dağa-daşa teylədin,
Soltan bəylə sadiq dostluq eylədin.
Dəyişdin dünyanı, getdin, ay baba.
BAYRAMOV MIKAYIL NECƏDIR
Göyçənin Şişqaya kəndindən olan Mikayıl Bayramova
Göyçə mahalını gəzən, tanıyan,
Bayramov Mikayıl necədir?- deyir.
Hatəm tək səxalı el ağsaqqalı,
Bayramov Mikayıl necədir?- deyir.
El ilə oturan, el ilə gülən,
Ağlayan gözlərin yaşını silən,
Elə arxalanan, el qədri bilən,
Bayramov Mikayıl necədir?- deyir.
Ömrü boyu baş əyməyən nadana,
Sözünü söyləyən mərdi-mərdana,
Nurani qocalar, ağbirçək ana,
Bayramov Mikayıl necədir?- deyir.
Göyçədə görənlər cahı-cəlalı,
Hər sənət sahibi çoban, ziyalı,
Göyçə ağsaqqalı, o Şişqayalı,
Bayramov Mikayıl necədir?- deyir.
Yaxşı ad insanın şan-şöhrətidir,
Başının tacıdı, həm qüdrətidir,
Özü qazanıbdı, öz hörmətidir,
Bayramov Mikayıl necədir?- deyir.
Yurd yeri talanan, didərgin düşən,
Bülbülə lazımdı güllü bağ, gülşən.
Xasayam, hal-əhval tutub görüşən,
Bayramov Mikayıl necədir? – deyir.
[redaktə] Mənbə
- Araz Yaquboğlu, Daşkənd aşıqları və şairləri, Bakı-2008
- Araz Yaquboğlu "Vətən həsrətli el şairi". "Bütöv Azərbaycan" qəzeti, 30 noyabr 2011-ci il.
 |
VikiMənbədə Kateqoriya:Xasay Zeynalov mövzusunda məlumatlar var. |
