Zəkat

Vikipediya, açıq ensiklopediya - ویکیپدیا ، آچیق انسایکلوپدیا

Zəkat- (ərəbcə: زكاة, təmizlik) - müsəlmanlardan alınan, Quranla rəsmiləşdirilmiş, toplanma qaydası və həcmi şəriət qanunları ilə müəyyənləşdirilmiş vergi. Zəkat islamın beş rüknlərindən biri hesab olunur (xristianlıqda onun qarşılığı desyatindir). Nəzəri cəhətdən bu vergi icmanın ehtiyaclarına sərf olunur və yoxsul müsəlmanlar arasında bölüşdürülür. Bir sıra ölkələrdə əslində adi dövlət vergisinə çevrilmişdir. İldə bir dəfə hər əmlak növü üçün müəyyən müddətdə (qəməri təqvimi ilə) alınır. Zəkatı ailə başçısı ödəyir. Zəkat əl-fitr (fitrə) ailənin hər bir yaşlı üzvündən ramazan ayında, orucluq tamam olan gün alınır və eyd əl-fitr günlərində sədəqə kimi paylanır. Vergilərin hər ikisi ancaq varlı müsəlmanlardan tutulur. Zəkatın adi məbləği illik gəlirin 2,5 faizini təşkil edir, lakin müsəlman ilahiyyatçıları arasında zəkatın məbləği və vergi tutulmalı olan əmlakın növləri məsələsində fikir birliyi yoxdur. Bir çox müsəlman ideoloqları zəkata islam sosial ədaləti prinsipləri əsasında qurulmuş cəmiyyətdə gəlirin yenidən bölüşdürülməsi vasitəsi kimi baxırlar.

[redaktə / تحریر] Mənbə

• İslam (qısa məlumat kitabı). Azərbaycan Sovet Ensiklopediyasının Baş Redaksiyası. Bakı: 1989, səh.63.