Zeynal Vəfa
| Zeynal Vəfa | |
| Zeynalabdin İsmayıl oğlu Zeynalov | |
 |
|
| Doğum tarixi: | 2 dekabr 1938-ci il |
|---|---|
| Doğum yeri: | Naxçıvan |
Zeynal Vəfa (Zeynalov Zeynalabdin İsmayıl oğlu) - şair, publisist.
Mündəricat |
[redaktə] Həyatı
Zeynalabdin İsmayıl oğlu Zeynalov 1938-ci il dekabrın 2-də Naxçıvan şəhərində ziyalı ailəsində anadan olub. Atası Böyük Vətən Müharibəsi cəbhələrində həlak olub. Anasının himayəsində böyüyüb. M.T.Sidqi adına Naxçıvan şəhər 4 nömrəli orta məktəbini bitirdikdən sonra ADU-nun (indiki BDU) filologiya fakültəsində (1957-1962) təhsilini davam etdirib.
İlk əmək fəaliyyətinə 1962-ci ildə Naxçıvan Vilayət Partiya Komitəsinin orqanı olan "Şərq Qapısı" qəzetində başlayıb. Sonra Naxçıvan MSSR Dövlət Televiziya və Radio Verilişləri Komitəsində böyük redaktor (1963-1969) və Azərbaycan Dövlət Televiziya və Radio Verilişləri Komitəsində redaktor (1969-1990) işləyib. Arada Azərbaycan Xarici Dillər İnstitutu nəzdində 2 illik ərəb dili kursunu bitirərək tərcüməçi kimi Yəmən Xalq Demokratik Respublikasında çalışıb(1980-1982). Orada savadsızlığın ləğvi sahəsində fəaliyyət göstərib.
Sonra yenə Azərbaycan Dövlət Televiziya və Radio Verilişləri Komitəsində redaktor (1982-1987), Yəmən Ərəb Respublikasında tərcüməçi (1987-1989), "Aydınlıq" qəzetində baş redaktorun birinci müavini (1990-1992), "Meydan" qəzetində baş redaktor (1992-1993) vəzifələrində çalışıb. 1990-1993-cü illərdə açıq fikirli cəsarətli yazılarına görə hakimiyyət tərəfindən ağır təzyiqlərə məruz qalıb. Evi və redaksiyası dəfələrlə mühasirə halqasına düşüb.
Zeynal Vəfa Heydər Əliyevin ilk təbliğatçılarından biri olub. 1991-ci ildə Zeynal Vəfa 4 qəzetdə dərc etdirdikdən sonra , öz vəsaiti hesabına yarım milyon kserekopyasını çıxartdırıb 27 rayonda yayımladığı "Şəxsiyyət" adlı monumental yazısını "o böyük şəxsiyyətin yenidən hakimiyyətə qayıdış yolunda yaşıl işıq" adlandırmışlar.
Zeynal Vəfa 1993-cü ildən Azərbaycan Respublikası Milli Məclisinin orqanı olan "Azərbaycan" qəzetində baş redaktorun müavini vəzifəsindədir. Mətbuatda uzun illər səmərəli fəaliyyətinə və yaradıcılıq uğurlarına görə 1995-ci ildə "Qızıl Qələm" mükafatına layiq görülüb. Respublika Prezidentinin 2005-ci il 21 iyul tarixli 924 nömrəli sərəncamı ilə "Tərəqqi medalı" ilə təltif edilib. 2007-ci ildə Milli Müdafiə Nazirliyinin ordu quruculuğu ilə əlaqədar keçirdiyi "Ən yaxşı publisist yazılar" müsabiqəsində birinci dərəcəli mükafatın qalibi olub.
2008-ci ildə Azərbaycan Respublikası Prezidenti Yanında Dövlət İdarəçilik Akademiyasının məzunu olub. 2009-cu il dekabrın 25-də Azərbaycan Respublikası Prezidenti Yanında Kütləvi İnformasiya Vasitələrinin İnkişafına Dövlət Dəstəyi Fondunun keçirdiyi fərdi jurnalist yazıları müsabiqəsinin qalibi kimi, "Azərbaycançılıq ideyası milli həmrəyliyin təməl prinsipləridir" mövzusundakı publisist yazısına görə diplomla təltif edilib. 22 iyul 2010-cu ildə milli mətbuatımızın 135 illiyi ilə əlaqədar Əməkdar jurnalist adına layiq görülüb.
Zeynal Vəfa poeziya sahəsində fəaliyyətə 12 yaşından başlasa da "Tunc altı" adlı ilk şeiri 1955-ci ildə "Şərq Qapısı" qəzetində işıq üzü görüb. 1970-ci ildən Azərbaycan Yazıçılar İttifaqının üzvüdür. Şer və poyemaları rus, ukrayna, özbək, tacik, eston, latış, ərəb və digər dillərdə dərc olunub. Avropa və Asiya şairlərindən xeyli poyetik tərcümələri var.
"Mənim körpə çinarım", "Qəlbimin səsi", "Əgər sevirəm desən","Körpələrin xətrinə","Beşiklərdən gələn səslər","Ömrün beşinci fəsli","Millətin xilaskarı"(Heydər Əliyevin şərəfli ömür yolundan bəhs edən poyema), "O dünyaya xəbər verin gələn var" və digər şeir kitablarının müəllifidir. Sözlərinə 70 mahnı bəstələnib. Yüksək vətənpərvərlik ruhu ilə dolu şer və poyemaları respublikamızın müxtəlif mətbu orqanlarında, həmçinin "Ulduz" və"Azərbaycan" jurnallarında müntəzəm olaraq dərc edilməkdədir. Hazırda publisist yazılarından, yeni şer və poyemalarından ibarət "Kişilərimiz və kişiliyimiz" və "Bir insan ömrünü yaşaya bilsəm" adlı seçilmiş əsərləri öz nəşrini gözləməkdədir.
[redaktə] Həmçinin bax
- Azərbaycanın dahi mütəfəkkiri Nəsrəddin Tusinin nəslindəndir.
- Opera müğənnisi Azər Zeynalovun atasıdır.
- Şair İslam Səfərlinin bacısı oğludur.
[redaktə] Yaradıcılığı
Tanrı belə hal görməyib halımca,
Ölər olsam ağlamayın dalımca,
Bu dünyadan can qurtarıb gedirəm.
Çünki orda nə dərd vardır, nə dərman,
Nə tapşırıq, nə sərəncam, nə fərman.
Orda vəhşi sökəsök yox, talan yox,
Satqınlıq yox, yaltaqlıq yox, yalan yox,
Rütbələri pul gücünə alan yox...
Bəlkə elə buna görə əzizim,
Ora gedən bir də geri qayıtmır.
Bir qoca oturub yol kənarında,
Önündə balaca, köhnə tərəzi.
Burda qazandığı qəpik-quruşla,
Külfət saxlamaqdır onun mərəzi.
-Gəlin özünüzü çəkdirin-deyir.
-Qəlbimi çıxarıb qoysam qırağa,
Beynimi çıxarıb qoysam qırağa,
Qalxıb tərəziyə desəm-çək məni,
Beynimsiz, qəlbimsiz, ancaq tək məni,
Çəkə bilərmisən söylə, əzizim?
Baxdı maddım-maddım üzümə qoca.
-Bilməm dərdlərimi neynim içimdə,
Türkmənçay yükü var beynim içində.
Sən beyin şumumda əkdiyimi çək,
Sən mənim içimdə çəkdiyimi çək,
Quru sür-sümüyüm nəyinə gərək.
Günahsız xalqımın min cür fərdi var,
Çoxunun qəlbində Təbriz, Zəngəzur,
Qarabağ, Borçalı, Dərbənd dərdi var.
Nədir anlamıram mərəzin sənin,
Bir millət daşıya bilməyən yükü
De, çəkə bilərmi tərəzin sənin?
Cibim boş olsa da, gəzdim gözü tox,
Çox gözəl bilirəm mən öz çəkimi,
Sənin tərəzinə ehtiyacım yox.
Boş bədən şəkisi vallah hədərdir,
Buyur çək, ancaq ki, çəkdiklərinin
İnsanlıq çəkisi gör nə qədərdir.
Sənin tərəzinə qalxan kəslərin
Bu fani dünyaya heyrətini çək.
Onun vicdanını, ləyaqətini,
Onun vətəndaşlıq qeyrətini çək,
Çək görüm, çək görüm, bacararmısan?
Cəmi-cümlətanı 20 qəpikdir,
Özünü çəkdirən fərdin qiyməti.
Ölkənin mərdi də, namərdi də var,
Namərdlə eynimi mərdin qiyməti?
Bəs mərd ürəyini yandırıb yaxan,
Xocalı boyda bir dərdin qiyməti,
Odamı, odamı 20 qəpikdir?
Əzizim, anla ki, mənim qəlbimin,
Səninlə olmayıb heç vaxt qərəzi.
Ancaq ki, bu boyda bir məmləkətdə,
Əgər pozulubsa mizan-tərəzi,
Sənin tərəzinə necə inanaq?
