Həbib Babayev

Həbib Babayev
Doğum tarixi	30 dekabr 1926(1926-12-30)
Doğum yeri	Bucaq, Şəki qəzası, Azərbaycan SSR, ZSFSR, SSRİ
Vəfat tarixi	2 iyul 1994(1994-07-02) (67 yaşında)
Vəfat yeri	Bakı, Azərbaycan
Milliyyəti	Azərbaycan
Atası	Bayram Babayev
Elmi dərəcəsi	filologiya elmləri doktoru (1969)
Elmi adı	professor
İş yerləri	Nizami Gəncəvi adına Ədəbiyyat İnstitutu, Bakı Slavyan Universiteti
Təhsili	BDU Filologiya fakültəsi, Qorki adına Dünya Ədəbiyyatı İnstitutu
Üzvlüyü	Azərbaycan Yazıçılar Birliyi
Mükafatları

Həbib Bayram oğlu Babayev (30 dekabr 1926, Bucaq, Şəki qəzası – 2 iyul 1994, Bakı) — Azərbaycan ədəbiyyatşünası, filologiya elmləri doktoru (1969), professor (1970), Azərbaycan SSR əməkdar elm xadimi (1990).

Həyatı

1932–1939-cu illərdə Bucaq kənd orta məktəbdə təhsil almış, lakin valideynlərinin vəfatı ilə əlaqədar Şuşa şəhər 1 saylı uşaq evinə göndərilmişdir. 1939–1941-ci illərdə təhsilini orada davam etdirmişdir. 1941–1943-cü illərdə Şuşa ikiillik Müəllimlər İnstitunun Dil və Ədəbiyyat fakültəsində, 1946–1951-ci illərdə ADU-nun Filologiya fakültəsində ali təhsil almışdır. 1951–1955-ci illərdə isə Moskvada M.Qorki adına Dünya Ədəbiyyatı İnstitutunun aspiranturasında ali təhsilini davam etdirmişdir. 2 iyul 1994-cü ildə Bakı şəhərində vəfat etmişdir.

Əmək fəaliyyəti

Əmək fəaliyyətinə 1943–1944-cü illərdə Bucaq kəndində başlamışdır. O, 1956–1958-ci illərdə M.Qorki adına Dünya Ədəbiyyatı İnstitutunda elmi işçi olmuşdur. 1958–1970-ci illərdə isə Azərbaycan Elmlər Akademiyasının Nizami adına Ədəbiyyat İnstitutunda baş elmi işçi vəzifəsini icra etmişdir. 1970-ci ildən ömrünün sonunadək Bakı Slavyan İnstitutunda kafedra müdiri olmuşdur. Alim 1962-ci ildən Yazıçılar İttifaqının üzvü olmuşdur.

Elmi fəaliyyəti

1956-cı ildə M.Qorki adına Dünya Ədəbiyyatı İnstitutunun Elmi Şurasında "V.Mayakovski və Azərbaycan sovet poeziyası" mövzusunda namizədlik dissertiyasını müdafiə edərək elmlər namizədi elmi dərəcəsini almışdır. 1969-cu ildə isə "Səməd Vurğun və sovet ədəbiyyatında onun mövqeyi" mövzusunda doktorluq dissertasiyasını müdafiə edərək filologiya elmləri doktoru elmi dərəcəsini almışdır. 1970-ci ildə professor elmi adı verilmişdir.

Alim 12 monoqrafiyanın, 120-dən artıq məqalənin müəllifi olan Həbib Babayevin əsərlərinin əsas mövzusunu Rusiya-Azərbaycan ədəbi əlaqələri təşkil edir. Müəllifin əsərləri rus, belorus, moldav, ukrayna, alman dillərinə tərcümə olunmuş, eyni zamanda haqqında rus və özbək dillərində məqalələr yazılmışdır.

Mükafatları

• Azərbaycan SSR Ali Soveti Rəyasət Heyətinin fəxri fərmanı — 1976
• "Azərbaycan SSR əməkdar elm xadimi" fəxri adı — 1 fevral 1990