Məzmuna keç

"GIF"in tələffüzü

Bu, yaxşı məqalədir. Daha çox məlumat üçün bura klikləyin.
Vikipediya, azad ensiklopediya

Stiven Vilhaytın 2013-cü il "Webby Awards" mərasimində nümayiş etdirdiyi slayd. Burada "Bu, "Jif" kimi tələffüz olunur, "GIF" yox" yazılmışdır.

"GIF"in tələffüzü — "Graphics Interchange Format" qrafik mübadilə formatının akronimi olan "GIF" sözünün necə tələffüz edilməsi. Bu məsələ 1990-cı illərdən bəri mübahisə mövzusudur. İngilis dilində populyar olaraq təkhecalı söz kimi tələffüz olunan akronimin ingilis dilində ən çox işlənən tələffüzü ⓘ/dʒɪf/ (yumşaq "g"; Azərbaycan dilində "cib" sözündəki "c" kimi) və ⓘ/ɡɪf/ (sərt "g"; Azərbaycan dilində "qara" sözündəki "q" kimi) kimidir, burada fərqlənən cəhət "G" hərfi ilə təmsil olunan fonemdir. Bir çox ictimai xadim və qurumlar mövzu ilə əlaqəli müzakirələrdə münasibət bildirmiş, formatın yaradıcısı Stiven Vilhaytın özü isə 2013-cü il "Webby Awards" mərasimində çıxış edərək yumşaq "g" ilə edilən tələffüzün düzgün olduğunu qeyd etmişdir.

Hər bir tələffüz formasının istifadə edilmə tezliyi regionlara görə fərqli olsa da, aparılan sorğulara əsasən ümumi mənzərədə sərt "g" ilə edilən tələffüzün daha çox istifadə olunduğu müəyyən edilmişdir. Bundan əlavə, bəzi natiqlər akronimdəki hər hərfi tələffüz edərək ⓘ/dʒiː aɪ ɛf/ formasından istifadə edirlər. İngilis dilinin lüğətlərində ümumi olaraq hər iki əsas alternativi etibarlı qəbul edilir və linqvistik təhlillər ingilis dilində olan oxşar sözlərin tələffüz tezliklərinə əsaslanaraq hər ikisi üçün aydın üstünlük göstərmirlər. Akronimin tələffüz formaları ingilis dilindən başqa dillərdə də dəyişə bilir.

Zəmin

[redaktə | vikimətni redaktə et]
Nyuton beşiyinin animasiyalı "GIF"i.

"Graphics Interchange Format" (GIF) 1987-ci ildə ABŞ onlayn xidmət provayderi "CompuServe"də çalışan Stiven Vilhayt tərəfindən inkişaf etdirilmiş qrafik formatdır. "GIF"lər qısa, təkrarlanan[1] animasiyaları[2] göstərmək üçün populyar olaraq istifadə olunur. Ümumi mənzərədə təkhecalı formada tələffüz edilən "GIF" akroniminin necə tələffüz edilməsi mübahisə mövzusudur. Bəzi şəxslər sözü ⓘ/ɡɪf/ kimi sərt "g" (sərt "g"; Azərbaycan dilində "qara" sözündəki "q" kimi) ilə, digərləri isə ⓘ/dʒɪf/ kimi yumşaq "g" (Azərbaycan dilində "cib" sözündəki "c" kimi) ilə tələffüz edirlər.[3] Bəzi azsaylı şəxslər akronimdəki hər hərfi tələffüz etməyə üstünlük verərək ⓘ/dʒiː aɪ ɛf/ formasından istifadə edirlər.[4]

Stiven Vilhayt və fayl formatını inkişaf etdirən komanda akronimin yumşaq "g" ilə tələffüz edilməli olduğunu faylın texniki spesifikasiyalarına daxil etmişdir. Spesifikasiyalarda komanda fıstıq yağı şirkəti "Jif"in reklam şüarı olan "tələbkar analar "Jif"i seçir" şüarına ehtiram olaraq, "tələbkar proqramçılar … "Jif"i seçir" yazmışdır.[3] "ABC News"un məlumatına görə, bu mövzu üzərində aparılan müzakirələr hələ 1994-cü ilə qədər gedib çıxır. Şəkil formatları ensiklopediyasının müəllifi qeyd etmişdir ki, "əksər insanlar" müəllifin üstünlük verdiyi yumşaq "g" ilə edilən tələffüzdənsə, daha çox sərt "g" ilə edilən tələffüzə üstünlük verirlər.[5]

Digər dillər

[redaktə | vikimətni redaktə et]

Fransız dilində "GIF" akronimini tələffüz edərkən çoxları [dʒ] və ya [ɡ] əvəzinə, [ʒ] səsinə üstünlük verirlər. Bu, fransız dilində "joie" sözündəki "j" kimi və ya Azərbaycan dilində "jalə" sözündəki "j" kimi tələffüz olunur. Akronim beləliklə, [ʒif] (qulaq as)ⓘ kimi tələffüz olunur.[6] Bəzi dillərin fonologiyasında ingilis dilində olan yumşaq və sərt "g" səsləri yoxdur. Məsələn, ispan və fin dillərində yerli sözlərdə [ʒ] səsi yoxdur, ərəb dilinin bir çox ləhcələrində isə [g] səsi yoxdur.[7][8] Norveç dilində "GIF" yerli sözlərdən fərqli olaraq sərt g, yəni [g] ilə tələffüz edilir.[9] Bu o deməkdir ki, ⟨gi⟩ ardıcıllığı təqribən Azərbaycan dilində "yemək" sözündəki "y" kimi [j] səsi ilə tələffüz edilir.[10]

Mübahisənin təhlili

[redaktə | vikimətni redaktə et]

Səbəb

[redaktə | vikimətni redaktə et]

İngilis dilində linqvistik mübahisə qismən "gi" hərf ardıcıllığının necə tələffüz ediləcəyi ilə bağlı ümumi qayda olmamasından qaynaqlanır. "Gift" ("hədiyyə") kimi sözlərdə sərt g üstünlük təşkil edir və cin kimi başqa sözlərdə yumşaq g istifadə olunur. Qədim ingilis dilində "g" həm yumşaq "g" ([dʒ]), həm də "y" samit səsi ([j]) üçün istifadə edilirdi.[3]

Linqvist Maykl Dou tərəfindən 269 sözün təhlil edilməsi nəticəsində ingilis dilindəki digər sözlər əsasında sərt və ya yumşaq "g" hərfinin daha uyğun olub-olmaması ilə bağlı bir-birinə yaxın hallar aşkar edilmişdir. Nəticələr hansı parametrlərdən istifadə olunduğundan asılı olaraq bir qədər dəyişmişdir. Sözün hər hansı bir yerində "gi" olan 105 sözdən 68-i yumşaq "g" səsindən istifadə etmişdir, lakin yalnız 37-si onun qarşılığını işlətmişdir. Bununla belə, sərt "g" sözləri gündəlik ingilis dilində əhəmiyyətli dərəcədə daha çox yayılmışdır. Hər ikisi yumşaq "g" ilə tələffüz edilən "flibbertigibbet" və "tergiversate" kimi nisbətən nəzərə çarpmayan sözlər 68 yumşaq "gi" sözünün siyahısına daxil edilmişdir. Hər bir sözün yayılması nəzərə alındıqda məlum olmuşdur ki, sərt və yumşaq "g" səsi "gi" sözlərində təxminən bərabər tezliklərdə müşahidə olunur. Yalnız "gi" ilə başlayan sözləri işlətməklə, nə də "gift" və "gin" kimi bir hecalı sözlərdən istifadə etməklə heç bir aydın favorit müəyyən edilməmişdir.[11]

Kanada linqvisti Qretçen MakKalok Dounun əsərini işıqlandıran zaman nəzəriyyə etmişdir ki, bu kontekstdə sərt və yumşaq "g" demək olar ki, bərabər tezlikdə işlədildiyinə görə, bir insan "GIF" sözü ilə ilk dəfə qarşılaşdığı zaman onun tələffüzü ilə əlaqədar keçmişdə qarşılaşdıqları başqa sözlərlə müqayisə apararaq bir sikkə fırlatma kimi təxmin irəli sürürlər. Onların bu və ya digər şəkildə favoritləri olduğu halda anlayış möhkəmlənir. MakKaloku belə bir şərh vermişdir ki, bu, "yəqin ki, gələcək nəsillərdə də "GIF"in tələffüzü uğrunda müharibə ilə mübarizə aparacağımız deməkdir".[12]

Arqumentlər

[redaktə | vikimətni redaktə et]

Linqvist Marten van der Meylen tərəfindən 2019-cu ildə aparılan təhlil "GIF" tələffüzü ilə bağlı onlayn istifadə edilən ən çox yayılmış arqumentlərin "sistem" arqumentləri olduğunu göstərmişdir. Bu arqumentlər tələffüzün ardıcıl bir dil qaydasından axması lazım olduğunu iddia edərək mübahisənin bir tərəfini dəstəkləyir.[13] Bunun bir nümunəsi "sistem akronimi" arqumentidir. Bu belə bir fikirdir ki, "GIF"dəki "g" səsi "graphics" sözünü ifadə etdiyinə görə, o, akronimdə sərt "g" səsi olan sözdəki kimi eyni fonemlə tələffüz edilməlidir. Bu xüsusi arqument bəzən kinayə ilə müşayiət olunur ki, əgər qısaltma yumşaq "g" ilə tələffüz edilsəydi, söz də eyni şəkildə /ˈdʒræfɪks/ ("jraphics") kimi tələffüz edilməlidir.[14][15][16][17] Bu arqumentin təkzibi ondan ibarətdir ki, abbreviaturaların öz kök sözlərinin tələffüzünə əməl etmələri tələb olunmur. Məsələn, "self-contained underwater breathing apparatus" ifadəsinin akronim olan "scuba" (ⓘ/ˈskuːbə/) sözündəki "u" hərfi onun törəmə "underwater" sözündə /ʌ/ kimi tələffüz edilməsinə baxmayaraq, /uː/ kimi tələffüz olunur.[14] Oxşar abbreviatura uyğunsuzluğu NASA ("National Aeronautics and Space Administration" ifadəsində ⓘ/ˈnæsə/ kimi tələffüz olunur) ilə də yaranır.[12][14]

"Sistem" arqumentinin başqa bir nümunəsi tezlik təhlilidir. Bu, Dounun təhlilinə bənzər digər vəziyyətlərdə ingilis dilində nə qədər başqa sözün sərt və ya yumşaq "g" ilə tələffüz olunduğunu tədqiq edir.[18] Stiv Vilhayt yumşaq "g" ilə tələffüzün yeganə düzgün forma olduğuna dair fikrini açıqladıqdan sonra sosial mediada və mətbuatda məsələnin hər iki tərəfində əhəmiyyətli diskussiyalar baş tutmuşdur.[19] "Gizmodo" internet portalında yazan Keysi Çanın məqaləsində Vilhaytın səhv olduğu iddia edilmişdir, çünki "Jiffy Lube" və "be back in a jiffy", eləcə də fıstıq yağı şirkəti "Jif" keyslərində olduğu kimi, "if"dən sonra gələn yumşaq "g"li sözlər "j" hərfi ilə yazılmalıdır.[20]

Van der Meylenin təhlilində tapılan növbəti ən çox yayılmış arqument fayl formatının yaradıcısı kimi bir səlahiyyətlidən, yəni adətən Vilhaytdan bəhs edən arqument idi.[21] Vilhayt yumşaq "g" formada tələffüzü dəstəklədiyini elan etdikdən sonra bir çoxları onun formatını yaratdığına görə sözün tələffüzündə avtoritet kimi tanıdılar. Vilhayt GIF-in tələffüzü üçün ən çox istinad edilən avtoritetdir. Sorğuda iştirak edən arqumentlərin 65,2%-i səlahiyyətli orqana istinad edərək yumşaq "g" hərfinə üstünlük vermişdi.[21] Bəziləri, o cümlədən Keysi Çan, sərt "g" hərfini dəstəkləməkdə ABŞ Prezidenti Barak Obamaya istinad etmişdir.[20] Digərləri "GIF"in tələffüzü barədə səlahiyyətlilər kimi müxtəlif lüğətlərə və ya "Siri" kimi proqram köməkçilərinə istinad etmişdilər.[21]

Sorğu

[redaktə | vikimətni redaktə et]






Van der Meylenin təhlilində sözün tələffüzünün hər variantını dəstəkləyən istifadəçilərin sayı   Sərt "g" (57,2 %)  Yumşaq "g" (31,8 %)  Hər ikisi (yumşaq "g"yə üstünlük) (8,2 %)  Hər hərfin tələffüz edilməsi (2,8 %)

2014-cü ildə "Mashable" internet portalında hazırlanmış sorğuda dünya üzrə 30,000-dən çox insan iştirak etmişdir.[22] Bu sorğu hər on nəfərdən yeddisinin sərt "g" səsindən istifadə etdiyini göstərmişdir. Van der Meylenin təhlili müəyyən etmişdir ki, rəy bildirən istifadəçilərin 57,2%-i sərt "g", 31,8%-i isə yumşaq "g" hərfinə üstünlük vermişdir. Bundan başqa, təhlil müəyyən etmişdir ki, istifadəçilərin 8,2%-i hər iki tələffüzü dəstəkləyir, eyni zamanda yumşaq "g" səsinə üstünlük verir, 2,8%-i isə hər iki səsin tələffüzünü uyğun hesab edir.[23]

"Stack Overflow"da developerlərin qeyri-rəsmi sorğusu göstərmişdir ki, respondentlərin 65,6%-i sərt "g" səsindən istifadə edən tələffüzü, 26,3%-i yumşaq "g" səsini, 6%-i hər səsi, 2 faizi isə tamamilə fərqli tələffüzdən istifadə edir.[24] Bununla birlikdə, "The Economist"də dərd olunan təhlil nəticələrdəki fərqlərin seçim qərəzi ilə şişirdildiyini iddia etmişdir. Məqalədə qeyd edilmişdir ki, sərt "g" səsinin istifadə edildiyi ölkələr dünya əhalisinin 45%-ni təşkil etdiyi halda, həmin ölkələrdən olan respondentlər seçmənin 79%-ni təşkil edir. Təhlildə hər bir ölkənin əhalisi üçün düzəlişlər edildiyi halda müəyyən edilmişdir ki, sərt "g" səsi yumşaq "g" səsi üçün 44%-dən 32%-ə qədər daha dar fərqlə olsa da, hələ də liderdir. Bundan əlavə, bu düzəliş hər səsin tələffüzünün populyarlığını 21%-ə çatdırmışdır. Bu variasiya çinli respondentlərin yarısı və cənubi koreyalı respondentlərin 7%-i tərəfindən işlədiyi Asiya ölkələrində geniş yayılmışdır. İnkişaf etmiş ölkələr bütövlükdə sərt "g" səsindən istifadə edən tələffüzə üstünlük verirdilər.[4]

Lüğətlər

[redaktə | vikimətni redaktə et]

Fərqli lüğətlər müxtəlif tələffüzlərin daxil edilməsi və sıralanması ilə bağlı fikir ayrılığına malikdir.

Lüğət Nəşr Dil İlkin tələffüz İkinci dərəcəli tələffüz İstinad
Cambridge Dictionary Onlayn Amerika ingiliscəsi /ɡɪf/ /dʒɪf/ [25]
Britaniya ingiliscəsi
Collins English Dictionary 2014-cü il XII nəşri İngiliscə /ɡɪf/ — [26]
Dictionary.com Onlayn İngiliscə /dʒɪf/ /ɡɪf/ [27]
Lexico Onlayn İngiliscə /ɡɪf/ — [28]
Merriam-Webster Onlayn İngiliscə /ɡɪf/ /dʒɪf/ [29]
New Oxford American Dictionary II nəşr 2005 Amerika ingiliscəsi /dʒɪf/ — [30]
Oxford Dictionary of English 2010-cu il III nəşri İngiliscə /dʒɪf/ /ɡɪf/ [31]
The American Heritage Dictionary of the English Language 2016-cı il V nəşri Amerika ingiliscəsi /ɡɪf/ /dʒɪf/ [26]
Petit Robert Onlayn Fransızca [ʒif] — [32]
Petit Larousse Onlayn Fransızca [ʒif] — [33]
Det Norske Akademis ordbok Onlayn Norveçcə [gifː] — [34]

İnsidentlər

[redaktə | vikimətni redaktə et]
Ağ Evin 2013-cü ildə "Tumblr" hesabında paylaşdığı, "GIF"in sərt "g" səsi ilə tələffüz olunmalı olduğunu göstərən yumoristik infoqrafika.

2013-cü ilin may ayında Vilhayt internetdə mükəmməlliyə görə illik "Webby Awards"da "ömür boyu nailiyyət" mükafatı ilə təltif edilmişdir. Vilhayt mərasimdə mükafatı qəbul etdikdən sonra beş sözdən ibarət slayd nümayiş etdirmişdir: "Bu, "gif" yox, "Jif" kimi tələffüz olunur". Burada "Jif" yumşaq "g" səsi ilə tələffüzü nəzərdə tutur.[35] Çıxışdan sonra Vilhayt "The New York Times" nəşrinə demişdir: "Oksford ingilis dili lüğəti hər iki tələffüzü qəbul edir. Onlar səhvdir. Bu, yumşaq "g" səsidir… Hekayənin sonu".[35][36]

Mərasimə qatılan tamaşaçılar qısamüddətli nitqə müsbət reaksiya vermişdilər, lakin bu, onlayn mübahisələrə səbəb olmuşdur və bəzi şərhçilər Vilhaytin işlətdiyi tələffüzdən imtina etmişdilər.[37][38] Van der Meylen qeyd etmişdir ki, bu, "öz yaradıcılığı haqqında istifadə məsləhətləri verən ilk sözün (yaxud daha dəqiq desək, akronimin) yaradıcısıdır". Çıxışdan sonra 17 mindən çox tvit atılıb və bu, "GIF"i trend mövzusuna çevirmişdir,[37] hadisə ilə bağlı 50-dən çox xəbər yazısı dərc olunmuşdur.[35] "Columbia Journalism Review" üç il sonra qeyd etmişdir ki, bu hadisə ilə mübahisə pik nöqtəyə çatmışdı.[38] Fıstıq yağı şirkəti "Jif" nitqdən sonra necə hiss etdiklərini soruşan bir tvitə "Bu gün bu məsələyə görə dəli olduq" şərhini vermişdir.[2] "Jif" yeddi il sonra "GIF" hostinq platforması olan "Giphy" ilə reklam addımı atmışdır. İki şirkət düzgün tələffüzdə sərt "g" səsindən istifadə edildiyini və "Jif" əvəzinə "GIF" etiketli məhdud vaxtlı fıstıq yağı qablarını buraxdığını iddia etmişdir.[39]

2013-cü ilin oktyabrında "The New York Times" sosial mediada Sara Layallın "1987-ci ildə icad edilmiş, "Jif" kimi tələffüz edilən "GIF" sıxılmış şəkil faylı formatıdır" sözləri ilə başlayan məqaləsinə görə bir qədər yüngül tənqidlə üzləşmişdir.[40] Məqalədə Vilhaytın çıxışını və onlara verdiyi sitatı işıqlandıran qəzetin əvvəlki məqaləsinə keçid verilmişdir.[40][35] 2013-cü ilin dekabrında "Jeopardy!" oyun şousunun aparıcısı Aleks Trebek epizodun son ipucu Vilhayt təqdimatına və tələffüzlə bağlı fikrinə istinad etdiyi üçün medianın diqqətini çəkmişdir. Hər üç iştirakçının düzgün cavablarında "GIF" sözü görünəndə Trebek yumşaq "g" səsindən istifadə edərək iştirakçıların cavablarını oxumuşdu.[41] Əvvəllər Trebek bitərəf qalmaq üçün hər hərfi ayrı-ayrılıqda tələffüz edirdi.[42]

2014-cü ilin iyununda ABŞ-nin ozamankı prezidenti Barak Obama "Tumblr"ın qurucusu Devid Karpla söhbətində akronimi sərt "g" səsi ilə tələffüz etmək lazım olduğunu söyləmişdi. "The Daily Dot"un əməkdaşı Mayls Kri Ağ Evin "Tumblr" bloqunda 2013-cü ilin aprel ayına aid "animasiya edilmiş "GIF"-lər (sərt "g")" mətni ilə yumoristik infoqrafikanın yer aldığı posta vurğu etmişdir.[43]

Mənbə

[redaktə | vikimətni redaktə et]

İstinadlar

[redaktə | vikimətni redaktə et]
  1. ↑ Biersdorfer, J. D. "How to make your own animated GIFs" [Öz animasiyalı "GIF"lərinizi necə düzəltmək olar]. The New York Times (ingilis). 12 yanvar 2022. 28 fevral 2022 tarixində arxivləşdirilib. İstifadə tarixi: 3 mart 2022.
  2. 1 2 O'Leary, Amy. "Battle over GIF pronunciation erupts" ["GIF"in tələffüzü uğrunda döyüş gedir]. The New York Times (ingilis). 23 may 2013. 29 noyabr 2021 tarixində arxivləşdirilib. İstifadə tarixi: 28 noyabr 2021.
  3. 1 2 3 Greenfield, Rebecca. "Tech etymology: animated GIF" [Texnologiya etimologiyası. Animasiyalı "GIF"]. The Atlantic (ingilis). 1 fevral 2011. 29 noyabr 2021 tarixində arxivləşdirilib. İstifadə tarixi: 28 noyabr 2021.
  4. 1 2 "How do you pronounce GIF[[:Şablon:-?]]". The Economist (ingilis). 29 iyun 2017. 29 noyabr 2021 tarixində arxivləşdirilib. İstifadə tarixi: 28 noyabr 2021.
  5. ↑ Webb, Tiger. "Is it pronounced GIF or JIF? And why do we care?" ["GIF", yoxsa "Jif" kimi tələffüz olunur? Bu, bizi niyə maraqlandırır?] (ingilis). ABC News. 9 avqust 2018. 29 dekabr 2021 tarixində arxivləşdirilib. İstifadə tarixi: 28 dekabr 2021.
  6. ↑ gif // Petit Robert (Online) (ingilis). Dictionnaires Le Robert. 5 iyun 2022 tarixində arxivləşdirilib. İstifadə tarixi: 18 mart 2022.
  7. ↑ Dumazet, Mathilde. "La prononciation du mot GIF dépend du pays dans lequel vous habitez" ["GIF" sözünün tələffüzü yaşadığınız ölkədən asılıdır]. Slate (ingilis). 30 iyun 2017. 18 fevral 2022 tarixində arxivləşdirilib. İstifadə tarixi: 21 fevral 2022.
  8. ↑ Ryding, Karin C. Arabic phonology // Arabic: A Linguistic Introduction [Ərəb dili: Linqvistik giriş] (ingilis). Cambridge University Press. iyun 2014. 18–19. doi:10.1017/CBO9781139151016. ISBN 9781139151016. OL 34503724M.
  9. ↑ gif // Det Norske Akademis ordbok (ingilis). Norveçcə Academy for Language and Literature. 15 aprel 2022 tarixində arxivləşdirilib. İstifadə tarixi: 12 aprel 2022.
  10. ↑ Kristoffersen, Gjert. Word phonology // The Phonology of Norveçcə [Norveç dilinin fonologiyası]. The Phonology of the World's Languages (ingilis). Oxford University Press. 15 dekabr 2007. səh. 112. ISBN 9780199229321.
  11. ↑ Dow, Michael. "It's gif and gif[[:Şablon:Px2]]: The English lexicon goes both ways". mcdowlinguist.github.io (ingilis). 31 avqust 2020. 4 oktyabr 2020 tarixində arxivləşdirilib. İstifadə tarixi: 28 dekabr 2021.
  12. 1 2 McCulloch, Gretchen. "Why the pronunciation of GIF really can go either way". Mental Floss (ingilis). 24 dekabr 2021. 24 dekabr 2021 tarixində arxivləşdirilib. İstifadə tarixi: 24 dekabr 2021.
  13. ↑ van der Meulen, 2019. səh. 46, 49
  14. 1 2 3 van der Meulen, 2019. səh. 46
  15. ↑ Locker, Melissa. "Here's a timeline of the debate about how to pronounce GIF[[:Şablon:Px2]]". Time (ingilis). 26 fevral 2020. 1 mart 2022 tarixində arxivləşdirilib. İstifadə tarixi: 3 mart 2022.
  16. ↑ Rodriguez, Salvador. "GIF's 25th birthday: Is it pronounced gif or jif[[:Şablon:-?]]". Los Angeles Times (ingilis). 15 iyun 2012. 29 noyabr 2021 tarixində arxivləşdirilib. İstifadə tarixi: 3 mart 2022.
  17. ↑ Hatfield, Daemon. "Most people pronounce GIF as ghif[[:Şablon:Px2]]". IGN (ingilis). 2 may 2017. 12 noyabr 2020 tarixində arxivləşdirilib. İstifadə tarixi: 3 mart 2022.
  18. ↑ van der Meulen, 2019. səh. 49
  19. ↑ O'Leary, Amy. "Battle over GIF pronunciation erupts". The New York Times (ingilis). 23 may 2013. 29 noyabr 2021 tarixində arxivləşdirilib. İstifadə tarixi: 28 noyabr 2021.
  20. 1 2 Chan, Casey. "The creator of the GIF says it's pronounced JIF. He is wrong". Gizmodo (ingilis). 21 may 2013. 29 noyabr 2021 tarixində arxivləşdirilib. İstifadə tarixi: 28 noyabr 2021.
  21. 1 2 3 van der Meulen, 2019. səh. 48
  22. ↑ Buck, Stephanie. "70 percent of people worldwide pronounce GIF with a hard g[[:Şablon:Px2]]". Mashable (ingilis). 21 oktyabr 2014. 23 dekabr 2021 tarixində arxivləşdirilib. İstifadə tarixi: 24 dekabr 2021.
  23. ↑ van der Meulen, 2019. səh. 47
  24. ↑ "Developer survey results". Stack Overflow (ingilis). 2017. 18 fevral 2022 tarixində arxivləşdirilib. İstifadə tarixi: 21 fevral 2022.
  25. ↑ "GIF". Cambridge Dictionary (Online) (ingilis). 27 fevral 2014 tarixində arxivləşdirilib. İstifadə tarixi: 11 iyul 2024.
  26. 1 2 "GIF", The Free Dictionary (ingilis), 27 avqust 2023 tarixində arxivləşdirilib, İstifadə tarixi: 27 avqust 2023
  27. ↑ "GIF". Dictionary.com (ingilis). 30 noyabr 2024 tarixində arxivləşdirilib. İstifadə tarixi: 17 dekabr 2024.
  28. ↑ "GIF". Lexico (Online) (ingilis). Oxford University Press. 12 oktyabr 2014 tarixində orijinalından arxivləşdirilib. İstifadə tarixi: 27 avqust 2023.
  29. ↑ "GIF". Merriam-Webster (Online) (ingilis). 22 oktyabr 2013 tarixində arxivləşdirilib. İstifadə tarixi: 27 avqust 2023.
  30. ↑ The New Oxford American Dictionary, 2005. səh. 711
  31. ↑ Oxford Dictionary of English, 2010. səh. 737
  32. ↑ gif // Petit Robert (Online) (ingilis). Dictionnaires Le Robert. 5 iyun 2022 tarixində arxivləşdirilib. İstifadə tarixi: 27 avqust 2023.
  33. ↑ gif // Petit Larousse (Online) (ingilis). Éditions Larousse. 5 iyun 2022 tarixində arxivləşdirilib. İstifadə tarixi: 27 avqust 2023. (#redundant_parameters)
  34. ↑ gif // Det Norske Akademis ordbok (ingilis). Norveçcə Academy for Language and Literature. 15 aprel 2022 tarixində arxivləşdirilib. İstifadə tarixi: 27 avqust 2023.
  35. 1 2 3 4 O'Leary, Amy. "Battle over GIF pronunciation erupts". The New York Times. 23 may 2013. 29 noyabr 2021 tarixində arxivləşdirilib. İstifadə tarixi: 28 noyabr 2021.
  36. ↑ Locker, Melissa. "Here's a timeline of the debate about how to pronounce GIF[[:Şablon:Px2]]". Time. 26 fevral 2020. 1 mart 2022 tarixində arxivləşdirilib. İstifadə tarixi: 3 mart 2022.
  37. 1 2 Gross, Doug. "It's settled! Creator tells us how to pronounce GIF[[:Şablon:Px2]]". CNN. 22 may 2013. 1 mart 2022 tarixində arxivləşdirilib. İstifadə tarixi: 3 mart 2022.
  38. 1 2 Perlman, Merrill. "The great GIF debate". Columbia Journalism Review. 18 iyul 2016. 30 noyabr 2020 tarixində arxivləşdirilib. İstifadə tarixi: 3 mart 2022.
  39. ↑ Ritzen, Stacey. "Jif peanut butter and Giphy have joined forces on how to pronounce GIF[[:Şablon:Px2]]". The Daily Dot. 25 fevral 2020. 28 noyabr 2021 tarixində arxivləşdirilib. İstifadə tarixi: 28 noyabr 2021.
  40. 1 2 Bump, Philip. "If you pronounce GIF with a hard g, you must be new to the internet". The Atlantic. 22 oktyabr 2013. 16 iyun 2014 tarixində arxivləşdirilib. İstifadə tarixi: 31 dekabr 2023.
  41. ↑ Rothberg, Daniel. "Jeopardy wades into GIF pronunciation battle". Los Angeles Times. 4 dekabr 2013. 28 noyabr 2021 tarixində arxivləşdirilib. İstifadə tarixi: 28 noyabr 2021.
  42. ↑ Dewey, Caitlin. "Jeopardy has conclusively settled the GIF pronunciation war". The Washington Post. 4 dekabr 2013. 4 mart 2022 tarixində arxivləşdirilib. İstifadə tarixi: 3 mart 2022.
  43. ↑ Klee, Miles. "Obama to America: Pronounce GIF with a hard g[[:Şablon:Px2]]". The Daily Dot. 13 iyun 2014. 28 noyabr 2021 tarixində arxivləşdirilib. İstifadə tarixi: 28 noyabr 2021.

Ədəbiyyat

[redaktə | vikimətni redaktə et]
Mənbə — "https://az.wikipedia.org/w/index.php?title=%22GIF%22in_tələffüzü&oldid=8231972"