"Zəngilan" Su Elektrik Stansiyası

“Zəngilan” Su Elektrik Stansiyası — Azərbaycan Respublikasının Zəngilan rayonunda, Araz çayının sol qolu olan Oxçuçay üzərində yerləşən su elektrik stansiyası. Stansiya “AzərEnerji” Açıq Səhmdar Cəmiyyəti tərəfindən inşa edilmişdir və Oxçuçay üzərində yaradılan Zəngilan su elektrik stansiyaları silsiləsinin tərkib hissəsidir.

Tarixi

“Zəngilan” Su Elektrik Stansiyasının açılışı 18 may 2024-cü il tarixində baş tutmuşdur. Açılış mərasimində Azərbaycan Respublikasının Prezidenti İlham Əliyev iştirak etmişdir.

Texniki göstəricilər və infrastruktur

Stansiyanın qoyuluş gücü 10,5 meqavatdır. “Zəngilan” Su Elektrik Stansiyasında il ərzində təxminən 30 milyon kilovat-saat elektrik enerjisinin istehsalı nəzərdə tutulur. Stansiya hər biri 10,5 meqavat gücə malik dörd SES-dən ibarət olan və ümumi gücü 42 meqavat təşkil edən Zəngilan su elektrik stansiyaları silsiləsinə daxildir.

Stansiyanın su ilə təminatı Oxçuçay üzərində dəniz səviyyəsindən təxminən 600 metr yüksəklikdə inşa edilmiş baş suqəbuledici qurğu vasitəsilə həyata keçirilir. Baş suqəbuledicidən çıxan suyun bir hissəsi çay məcrasında saxlanılmaqla, kaskad üsulla tikilmiş stansiyalara yönəldilir və istifadə olunduqdan sonra yenidən çaya qaytarılır.

“Zəngilan” Su Elektrik Stansiyasında maşın zalı, ekoturbinlər, generatorlar, rəqəmsal idarəetmə sistemləri, eləcə də mikro SCADA sistemi quraşdırılmışdır. Stansiya yüksək gərginlikli elektrik xətləri və optik kabel vasitəsilə ölkənin enerji sisteminə inteqrasiya olunmuşdur.

Layihələndirmə və tikinti prosesində ekoloji normalara riayət edilmiş, çay ekosisteminin qorunması məqsədilə dib sutullayıcı, lil ötürücü, suaşıran və balıq vətəgə qurğuları yaradılmışdır. Turbinlər çayda su səviyyəsi azaldıqda avtomatik dayanma funksiyasına malikdir və suyun keyfiyyətinə təsirin minimuma endirilməsini təmin edir.