İbrahim Çingiz

Vikipediya, azad ensiklopediya
Jump to navigation Jump to search
İbrahim Çingiz
İbrahim Çingiz oğlu Əhmədov
İbrahim Çingiz.jpg
Doğum adı İbrahim Əhmədov
Digər adı The Riddler (təxəllüs)
Doğum tarixi (27 yaş)
Doğum yeri İçərişəhər, Bakı, Azərbaycan
Milliyyəti azərbaycanlı
Vətəndaşlığı Azərbaycan
Həyat yoldaşı Aydan Axundzadə (2021–)
Atası Çingiz Əhmədov
Anası Mehriban Əhmədova
Fəaliyyəti aktyor
reper
Fəaliyyət illəri 2013–davam edir
Təhsili Azərbaycan Dövlət Mədəniyyət və İncəsənət Universiteti (2011–2015)
Boyu 1.85 sm
Teatr Azərbaycan Dövlət Akademik Rus Dram Teatrı (2016–davam edir)

İbrahim Çingiz (tam adı: İbrahim Çingiz oğlu Əhmədov; d. 6 may 1994, İçərişəhər, Bakı, Azərbaycan) – Azərbaycan teatr və kino aktyoru, reper, Azərbaycan Dövlət Akademik Rus Dram Teatrının aparıcı səhnə üzvlərindən biri.

2011-ci ildə Azərbaycan Dövlət Mədəniyyət və İncəsənət Universiteti Ayan Mirqasımovanın kursu – "teatr və kino üzrə dram aktyoru" fakültəsinə daxil olub. 2016-cı ildən Azərbaycan Dövlət Akademik Rus Dram Teatrının aktyorudur.

İbrahim Çingiz 2013-cü ildən rep fəaliyyəti ilə məşğul olmağa başlamışdır. Uşaqlıqdan onda musiqiyə yaranan həvəs sonrakı illərdə özünü büruzə verib. Onun repləri əsasən üstünlüklə rus dilində olmuş, lakin son illərdə aktyorun Azərbaycan dilində olan bir neçə sinqlı dinləyicilərin öhdəçiliyinə buraxılmışdır. İbrahim Çingiz reper kimi təxəllüsünü öz adı ilə seçmişdir, lakin aktyorun eyni zamanda "The Riddler" təxəllüsü ilə dinləyicilərin öhdəçiliyinə buraxdığı sinqlları mövcuddur.

Həyatı[redaktə | mənbəni redaktə et]

Erkən illəri[redaktə | mənbəni redaktə et]

İbrahim Çingiz oğlu Əhmədov 6 may 1994-cü il tarixində Bakı şəhəri – qədim İçərişəhərdə, aktyor Çingiz Əhmədov və hüquqşünas Mehriban Əhmədovanın ailəsində dünyaya göz açmışdır.[1][2] Ailədə özündən böyük bir bacısı var. Uşaq yaşlarından incəsənətə marağı olmuşdur. Uşaqlığının bir çox hissəsi Nəsibə Zeynalova, Çingiz Əhmədov və s. kino xadimlərinin mühitində keçib, eyni zamanda gənc yaşlarından incəsənətə marağı yaranıb.[3] Aktyor özü bu barədə qeyd edir ki, "Belə ki, Hollivud filmlərinə baxırdım, orada aktyorların oyunu mənə çox maraqlı gəlirdi. Uşaqlığım böyük sənətkarımız Nəsibə Zeynalovanın evində, aktyorların içində keçib. Ancaq onu da deyim ki, uşaq vaxtı çox utancaq idim."[1][3]

Aktyor eyni zamanda uşaq yaşlarından Hind filmlərinin pərəstişkarı olub.[3] 2000-ci ildə 189 nömrəli orta məktəbə qədəm qoyan aktyor, 2011-ci ildə həmin məktəbi bitirib.[1] Məktəb vaxtlarından onda incəsənətin daha geniş bir sahəsi olan – musiqiyə dərin maraq yaranıb.[1][3]

2011-ci ildə Azərbaycan Dövlət Mədəniyyət və İncəsənət Universiteti Ayan Mirqasımovanın kursu – "teatr və kino üzrə dram aktyoru" fakültəsinə daxil olub.[2] Aktyorun sözlərinə görə, atası Çingiz Əhmədov oğlunun incəsənət sahəsinə qəbul olduğuna görə etiraz edib.[3] İbrahim Çingiz qeyd edir ki, "Atam dedi ki, əgər məndən yaxşı aktyor olacaqsansa, oxu. O, mənə deyirdi ki, sən başqa ixtisasla məşğul ol. Sözsüz ki, hər sənət çətindir. İncəsənət aləmindəki insanlar bilir ki, bu sənətin özünəməxsus çətinlikləri var."[3]

Universitetin son kursunda oxuyan zaman, – 2015-ci ildə İbrahim Çingiz UkraynaKiyevə köçüb.[3] Aktyor ilkin incəsənət fəaliyyətinə Kiyevdə başlayıb, musiqi fəaliyyətini reper kimi orda inkişaf etdirərək, yerli əhali arasında tanınmağa başlayıb.[1][2] Eyni zamanda Kiyevdə aparıcı kimi çıxış edib – 14 mart 2015-ci il tarixində "Ukrayna. mənim istedadım" istedadlar müsabiqəsinin yeddinci buraxılışında Azərbaycan pəhləvanları Laçın və Hüseyn Əbdülhüseynov qardaşlarının qatıldığı yarışmanın aparıcısı olub.[4] Aktyora orda məşhur bir serialdan dəvət gəlib, lakin o bunu qəbul etməyib. İki ilə qədər Kiyevdə yaşayan aktyor 2016-ci ildə Azərbaycana qayıdıb.[3] Aktyor Azərbaycana geri qayıtmağını bu cür izah edir:[1]

" Bundan əvvəl 2 il Kiyevdə yaşamışam. Orada reper və aparıcı kimi tanınmışam. Hətta Kiyevdə məşhur bir seriala dəvət alsam da, qəbul etmədim. Səbəb isə Kiyevdə qaldığım 2 ildə vətənim üçün darıxmağım oldu. Bəzi insanlar arzulayır ki, xaricdə yaşasın, ancaq onlar bilmirlər ki, vətəndən, ailədən, dostlarından kənarda yaşamaq nə deməkdir. Mən qərar verdim ki, vətənimə dönürəm. Həmin gün orada tanınmış bir serialda baş rol üçün təklif aldım. Dərhal da, düşünmədən imtina etdim. Vətənim üçün darıxmışdım. Orda məşhurlaşa bilərdim, ancaq Azərbaycana gəlməyi və burada fəaliyyətimə davam etməyi üstün bildim. Peşman deyiləm. Yaxşı ki, gəlmişəm. "

Teatr və kino fəaliyyəti[redaktə | mənbəni redaktə et]

İbrahim Çingiz yazıçı Elçinin "Sənətkarın taleyi" əsərinin tamaşasında qoçu obrazında (tərəf müqabili Murad Məmmədov "Əbdül" rolunda), rejissor: İrana Tağızadə, 2016

İbrahim Çingizin teatr və kino fəaliyyəti 2016-cı ildən başlamışdır. Kiyevdən qayıdan İbrahim Çingiz həmin ildən Azərbaycan Dövlət Akademik Rus Dram Teatrının aparıcı aktyorudur.[1][3] 2016-cı ildə ilk səhnə işi olan – "Vicdan haqqı" serialında özünü aktyor kimi sınayan İbrahim Çingiz həmin ildə geniş tamaşaçı kütləsinin məhəbbətini qazanmış, eyni zamanda səhnə uğurları səbəbindən bir neçə mükafata layiq görülmüşdür.[1] Aktyorun 2016-cı ildə olan teatr fəaliyyəti də uğurlu olmuşdur.[1] İbrahim Çingiz teatr haqqında ümumi fikirlərini bu mövqedə izah etmişdir: "Ömür qarşıdadır, bir işi dərindən öyrənmək üçün onun sənə yaratdığı şəraitdən yetərincə istifadə etmək lazımdır. Bu baxımdan da teatrdan öyrənməli olduqlarım az deyil. Çünki teatr daimidir. Serial bu gün bitə bilər. Daim öz üzərimdə çalışıram və inkişaf etmək istəyirəm. Yerimdə dayanan biri deyiləm."[3]

2016-cı ildə rejissor İlqar Safatın səhnələşdirdiyi, Viktora Korkiya və Aleksandr Lavrinanın həmmüəllif kimi qələmə aldığı "Казанова: Уроки любви" əsərinin tamaşasında aktyor, Bobberman obrazını canlandırmışdır.[5] Bu, onun teatrda ilkin sınaq təcrübəsi olmuşdur. Həmin ildə İranə Tağızadənin rəhbərliyi altında səhnələşdirilən, yazıçı Elçinin "Sənətkarın taleyi" əsərinin tamaşasında İbrahim Çingiz Bakı qoçusu obrazını canlandırmışdır.[6] Eyni zamanda 2016-cı ildə İbrahim Çingiz Rövşən İsaxın rejissorluğu altında Vicdan haqqı teleserialında Vüsal obrazını canlandırmış, böyük tamaşaçı kütləsinin müsbət rəyini, eyni zamanda məhəbbətini qazanmışdır.[1][3][7] Bu obraz onun teleserialda ilk sınaq təcrübəsi olmuşdur.[1] Aktyor "Vüsal" obrazının ona qazandırdığı məşhurluq haqqında fikirlərini bu cür açıqlamışdır:[1]

" Bir rolla peşəkar olmaq mümkünsüzdür. Yaxşı aktyor olmaq illərlə topladığın təcrübələr əsnasında formalaşır. Bir seriala çəkilirəmsə, deyə bilmərəm ki, mən yaxşı aktyoram. Çünki mənim də bacarmadığım bəzi şeylər var. Hələ həyat qabaqdadır, çalışdıqca öyrənməli olduğum çox şey var. "
İbrahim Çingizin Zaur obrazında rol aldığı "Təhminə və Zaur" tamaşasının posteri (tərəf müqabili Olqa Arsentyeva Təhminə rolunda), rejissor Aleksandr Şarovski, 2018

2016-cı ildə İbrahim Çingizin teatrda üçüncü səhnə obrazı – rejissor Aleksandr Şarovskinin səhnələşdirdiyi, yazıçı İlyas Əfəndiyevin "Billur saray" əsərində Bayandur obrazı olmuşdur.[8] Ümumilikdə, 2016-cı il aktyora həm teatr, həm də teleserial baxımından uğurlu il olmuşdur.[1] 2017-cı ildə Azərbaycan Dövlət Akademik Rus Dram Teatrının səhnəsində rejissor Yonas Vaitkusun rəhbərliyi altında Nizaminin "Yeddi gözəl" əsəri səhnələşdirilmiş, bu tamaşada İbrahim Çingiz də rol almışdır.[2]

Eyni ildə İbrahim Çingiz Qurban Səidin "Əli və Nino" əsərinin rejissor İlqar Safat tərəfindən səhnələşdirildiyi tamaşasında İlyas bəy obrazını canlandırmışdır.[9] Aktyor eyni zamanda rejissor Raulya Turkkanın rəhbərliyi altında "Угадай Сказку — 5" əsərinin tamaşasında "Lilo və Stiç" hissəciyindən Stiç, "Smeşarik" hissəciyindən Krol, "Soyuq qəlb" hissəciyindən Hans obrazlarına həyat vermişdir.[2][10] İbrahim Çingiz 2017-ci ilin son işi olaraq yazıçı Karlo Qaldoninin "Xuliqan Todero" əsərinin Aleksandr Şarovskinin rəhbərliyi ilə səhnə tamaşasında "Nikoletto" obrazını canlandırmışdır.[2]

2018-ci ildə İbrahim Çingiz karyerasında ikinci teleserial olan – rejissor Qulu Əsgərovun ekranlaşdırdığı "Könül yarası" teleserialında Camal obrazına həyat vermişdir.[7] Aktyor bu teleserialda karyerasında ilk dəfə teleserial mövqeyində baş rolu canlandırmışdır. İbrahim Çingizin bu teleserialda baş rol tərəf müqabili aktrisa Fidan Axundova idi. Teleserial aktyorun karyerasında uğurlu səhnə işinə çevrilmiş, aktyor serial üçün bəzi nominasiyalarda mükafata layiq görülmüşdür.[11] Teatrda isə ilin ilk işi olaraq İbrahim Çingiz Aleksandr Şarovskinin rejissorluğu altında "Последняя Страсть Королевы" (azərb. Kraliçanın sonuncu ehtirası‎) adlı tamaşada "Kaptan Bleyk" obrazını canlandırmışdır.[12]

Daha sonra isə rejissor Cavid İmamverdiyevin quruluş verdiyi "Три поросёнка, красная шапочка и серые волки" (azərb. Üç donuz, qırmızı papaq və boz qurdlar‎) adlı səhnə əsərində "Volk ata" obrazını canlandırmışdır. 2018-ci ildə rejissor Yonas Vaitkusun rəhbərliyi altında, Nizaminin "Yeddi gözəl" əsərinin səhnə tamaşasında İbrahim Çingizə daha bir rol – çoban obrazı həvalə edilib.[2] 2018-ci ilin sonuncu işi olaraq aktyor, yazıçı Anarın "Beşmərtəbəli evin altıncı mərtəbəsi" əsərinin Aleksandr Şarovskinin quruluşunda, "Təhminə və Zaur" adlı səhnə tamaşasında Zaur obrazını canlandırmış, obraz çox uğurlu alınmışdır. Bu, İbrahim Çingizin teatr səhnəsində oynadığı ilk baş rol tamaşası olmuşdur. Aktyorun bu səhnə tamaşasında tərəf müqabili rus aktrisa Olqa Arsentyeva idi.[13]

İbrahim Çingiz rejissor Elvin Əhmədoğlunun ekranlaşdırdığı "Kralların savaşı" filmində "Od kralı" obrazında (tərəf müqabili Aydan Axundzadə "Od kraliçası" rolunda)

2019-cu ildə İbrahim Çingiz rejissor Rövşən İsaxın ekranlaşdırdığı "Yuxu kimi" teleserialında "Aqşin" obrazını canlandırmışdır. Bu teleserial aktyorun başrol oynadığı, eyni zamanda Rövşən İsaxın rejissorluğu ilə obraz canlandırdığı ikinci ekran işi olmuşdur.[14] Teleserialda aktyorun tərəf müqabili Aysel İbrahimova idi. Teleserial aktyora böyük uğur qazandırmışdır. Hal-hazırda da davam edən ekran əsəri efir məkanında ən reytinqli seriallardan biridir. İbrahim Çingiz "Yuxu kimi" teleserialının çəkilişi zamanı canlandırdığı obrazın mövqeyinə uyğunlaşma səbəbindən kimsəsiz adada bir müddətlik yaşamış, obraza uyğunlaşmaq üçün sınaqdan keçmişdir. Eyni zamanda başrol üçün aktyor 100 kiloqram çəkidən 76 kiloqrama enmişdir.[15][16]

2020-ci ilin yeni il gecəsində Kamran Ağabalayevin rejissorluğu altında Azərbaycan Televiziyasının yeni il – "Şaxta" filmində İbrahim Çingiz "İbrahim" obrazına həyat vermişdir. 2020-ci ildə Novruz bayramı üçün hazırlanan televiziya filmi – "Kralların savaşı" filmində "Od kralı" obrazını canlandırmışdır. Ekran əsərini rejissor Elvin Əhmədoğlu ekranlaşdırmış, art direktoru isə Ülviyyə Könül olmuşdur. Film-konsertdə Su, Od, Hava və Torpaq krallıqlarında baş verənlər və onlar arasında istedad yarışması obrazlı, musiqili şəkildə təqdim olunmuşdur. Hər iki televiziya filmində də aktyorun tərəf müqabili aktrisa Aydan Axundzadə olmuşdur.[17][18] Aktyor 2020-ci ildən koronavirus pandemiyası səbəbi ilə teatrda heç bir rolda çıxış etməmişdir.[1]

Musiqi fəaliyyəti[redaktə | mənbəni redaktə et]

İbrahim Çingiz 2013-cü ildən rep fəaliyyəti ilə məşğul olmağa başlamışdır.[2] Uşaqlıqdan onda musiqiyə yaranan həvəs sonrakı illərdə özünü büruzə verib.[7] Aktyorun sözlərinə görə, atası onun reper kimi fəaliyyətinə etirazlı yanaşıb.[3] Lakin İbrahim Çingiz özünü eyni zamanda reper kimi sınayıb. Onun repləri əsasən üstünlüklə rus dilində olmuş, lakin son illərdə aktyorun Azərbaycan dilində olan bir neçə sinqlı dinləyicilərin öhdəçiliyinə buraxılmışdır.[1][3] İbrahim Çingiz reper kimi təxəllüsünü öz adı ilə seçmişdir, lakin aktyorun eyni zamanda "The Riddler" təxəllüsü ilə dinləyicilərin öhdəçiliyinə buraxdığı sinqlları mövcuddur.[3]

İbrahim Çingiz GOUS-un təşkil etdiyi konsert zamanı, Sound Factory Club, 2014

2013-cü ilin dekabrında onun iki sinqlı – "Да или нет" (azərb. Hə ya yox‎) və "Пролог" (azərb. Proloq‎) adlı repləri işıq üzü görüb.[19][20] Aktyorun rep karyerasına başladığı ilk ildə "От любви до ненависти" (azərb. Sevgidən nifrətə doğru‎) adlı ilk albomu işıq üzü görüb.[19] 13 dekabr 2013-cü il tarixində aktyorun Bakıda "Vol. 1" adlı konserti təşkil olunmuşdur.[19]

2014-cü ilin yanvarında aktyorun "Жизнь Моя" (azərb. Mənim həyatım‎) adlı repi işıq üzü görmüş, həmin ilin aprelində "ЧтоЗаПопса" (azərb. Pop nədir?‎), mayında "Проблемы" (azərb. Problemlər‎) və "Два студента" (azərb. İki tələbə‎), noyabrında "На Минуту" (azərb. Bir dəqiqə‎) adlı sinqlları dinləyicilərin öhdəçiliyinə buraxılmışdır.[21][22][23][24] Ümumilikdə, 2014-cü il aktyorun rep karyerasında ona qazandırdığı müəyyən kütlə və baxış sayı səbəbi ilə uğurlu il olmuşdur. Eyni zamanda həmin il İbrahim Çingizin 2013-cü ildə keçirdiyi "Vol. 1" adlı konsertinin ikinci hissəsi – "Vol. 2" konserti təşkil olunmuşdur.[25]

2015-ci ilin yanvarında İbrahim Çingizin "Один" (azərb. Bir‎), martında "Знай" (azərb. Bilirsiniz‎), aprelində "Ночной Баку" (azərb. Bakı gecələri‎), iyulunda "Исповедь" (azərb. Etiraf‎), noyabrında "Неудачный Опыт" (azərb. Pis təcrübə‎) adlı sinqlları işıq üzü görmüşdü.

2016-ci ilin mayında aktyorun "PZNK" və "Эйфория" (azərb. Eyforiya‎) adlı sinqlları dinləyicilərin öhdəçiliyinə buraxılmışdır. Həmin ilin iyununda aktyorun Azərbaycan dilində "Yaddaş" adlı repi işıq üzü görmüş, sinql Azərbaycanda tanınaraq aktyorun musiqi karyerasında uğurlu olmuşdur. Həmin ilin iyulunda "Ты Мой Космос" (azərb. Sən mənim kosmosumsan‎) adlı repi işıq üzü görmüşdü.

2017-ci ilin dekabrında aktyorun "Tufan" adlı Azərbaycan dilində olan növbəti repi dinləyicilərin öhdəçiliyinə buraxılmış, geniş auditoriya kütləsi qazanmışdır. İbrahim Çingiz eyni zamanda reper Remo Nealla sıx əməkdaşlıq etmişdir. 2015-ci ilin mayında onların "Так Надо Было" (azərb. Lazım idi‎) adlı ilk repi işıq üzü görmüşdür. Daha sonra onların 2019-cu ilin sentyabrında "Zəng eləmə", 2020-ci ilin mayında "Я спятил" (azərb. Mən dəliyəm‎) adlı birgə sinqlları işıq üzü görmüşdü.

Aktyor 2015-ci ildə Səs Azərbaycan layihəsində çıxış etmişdir. Kiyevdə olduğu müddətdə o, Səs Ukrayna, Moskvada isə "Молодая кровь 2" müsabiqəsində iştirak edib. Eyni zamanda aktyor 2017-ci ildə Heydər Əliyev Sarayında keçirilən "Məşhurlar və övladları" adlı layihədə BASTA-nın "Кинолента" (azərb. Kinolent‎) repini ifa etmişdir.

Şəxsi həyatı[redaktə | mənbəni redaktə et]

İbrahim Çingizin atası Çingiz Əhmədov komediya aktyoru, Azərbaycan Respublikasının əməkdar artistidir.[3] Anası Mehriban Əhmədova hüquqşünasdır. Aktyorun bir bacısı var.[1] Onun kumiri Amerika aktyoru Ceyson Momoadır. İbrahim Çingiz Hollivud və ispan filmlərinin həvəskarıdır. O, xarici kinematoqrafiyanın stilini çox zaman öz üzərində əks etdirir.[1] Aktyor döymə həvəskarıdır, onun sözlərinə görə həyatında ən əsas məqamları döymə şəklində yaşatmaq istəyib. Onun qolunda bir üzü ağlayan, bir üzü gülən teatral maska döyməsi də mövcuddur. Eyni zamanda futbol həvəskarıdır, "Beşiktaş" və "Neftçi" komandalarını dəstəkləyir. Aktyorun bədənində "Beşiktaş" futbol komandasına aid döymə də mövcuddur. Aktyorun ən sevdiyi əsər yazıçı Anarın "Təhminə və Zaur" romanıdır.[7]

İbrahim Çingiz 2021-ci ildə aktrisa Aydan Axunzadə ilə nişanlanıb.[26][27]

Filmoqrafiya[redaktə | mənbəni redaktə et]

İstinadlar[redaktə | mənbəni redaktə et]

  1. 1 2 3 4 5 6 7 8 9 10 11 12 13 14 15 16 17 Rəis, Xəyalə (14 dekabr 2017). ""Atam dedi ki, əgər məndən yaxşı aktyor olacaqsansa, oxu"" (azərb.). Kaspi. 2021-06-02 tarixində arxivləşdirilib. İstifadə tarixi: 3 iyun 2020.
  2. 1 2 3 4 5 6 7 8 "Ахмедов Ибрагим Чингиз оглы (Ибрагим Чингиз)" (rus). rusdrama-az.com. 2021-06-11 tarixində arxivləşdirilib. İstifadə tarixi: 2021-06-11.
  3. 1 2 3 4 5 6 7 8 9 10 11 12 13 14 15 Azərbaycan Milli Kitabxanası (14 dekabr 2017). ""Atam dedi ki, əgər məndən yaxşı aktyor olacaqsansa, oxu"". Kaspi (azərb.). anl.az. səh. 14. 2021-06-02 tarixində arxivləşdirilib. İstifadə tarixi: 3 iyun 2020.
  4. "Лачин и Гусейн Абдулгусейнови - Україна маэ талант-7 - Второй кастинг в Киеве - 14.03.2015" (azərb.). YouTube. 14 mart 2015. İstifadə tarixi: 3 iyun 2020.
  5. "Казанова: Уроки любви" (rus). rusdrama-az.com. 2021-06-08 tarixində arxivləşdirilib. İstifadə tarixi: 2021-06-08.
  6. "Судьба Артиста" (rus). rusdrama-az. 20 мая 2016. 2021-06-08 tarixində arxivləşdirilib. İstifadə tarixi: 2021-06-08.
  7. 1 2 3 4 Əliyev, Rəşad (27 iyun 2019). "İbrahim Çingiz: İmkanlı qadınlardan hər gün intim təkliflər alıram" (azərb.). oxu.az. 2021-06-11 tarixində arxivləşdirilib. İstifadə tarixi: 2021-06-11.
  8. "В хрустальном дворце" (rus). rusdrama-az.com. 2016. 2021-06-11 tarixində arxivləşdirilib. İstifadə tarixi: 2021-06-11.
  9. "Али и Нино" (rus). rusdrama-az.com. 2017. 2021-06-11 tarixində arxivləşdirilib. İstifadə tarixi: 2021-06-11.
  10. ""Угадай сказку-5!" снова на сцене Русской драмы". Культура (rus). 23 yanvar 2017. 2021-06-11 tarixində arxivləşdirilib. İstifadə tarixi: 2021-06-11.
  11. Бабаева, Джани (5 сентября 2020). "Азербайджанские звезды с бородой и без – кому идет, а кому следует побриться (ФОТО)" (rus). trend.az. 2021-06-11 tarixində arxivləşdirilib. İstifadə tarixi: 2021-06-11.
  12. Асадова, И. (21 февраля 2018). ""Последняя страсть королевы" в Баку". Култура и Общество (rus). ru.echo.az. 2021-06-11 tarixində arxivləşdirilib. İstifadə tarixi: 2021-06-11.
  13. "Уйди из моих снов, или "Новые" Тахмина и Заур в Баку" (rus). trend.az. 6 июня 2018. 2021-06-11 tarixində arxivləşdirilib. İstifadə tarixi: 2021-06-11.
  14. ""Vicdan haqqı"nın aktyoru 22 kilo arıqlayıb, tanınmaz hala düşdü - FOTOLAR" (azərb.). axsam.az. 12 sentyabr 2019. 2021-06-11 tarixində arxivləşdirilib. İstifadə tarixi: 2021-06-11.
  15. ""Vicdan haqqı"nın aktyoru 22 kilo arıqlayıb, tanınmaz hala düşdü - FOTO" (azərb.). news.milli.az. 12 sentyabr 2019. 2021-06-11 tarixində arxivləşdirilib. İstifadə tarixi: 2021-06-11.
  16. ""Vicdan haqqı"nın aktyoru 22 kilo arıqlayıb, tanınmaz hala düşdü - FOTOLAR" (azərb.). news.day.az. 13 sentyabr 2019. 2021-06-11 tarixində arxivləşdirilib. İstifadə tarixi: 2021-06-11.
  17. Azərbaycan Televiziyası (21 mart 2020). "AzTV-dən Novruzla bağlı film - "KRALLARIN SAVAŞI"" (azərb.). aztv.az. 2021-06-11 tarixində arxivləşdirilib. İstifadə tarixi: 2021-06-11.
  18. "Айдан Ахундзаде и Ибрагим Чингиз в «огненном» ролике о новрузовском вторнике – ФОТО – ВИДЕО" (rus). citymag.az. 4 март 2020. 2021-06-11 tarixində arxivləşdirilib. İstifadə tarixi: 2021-06-11.
  19. 1 2 3 "Ibrahim Chingiz - Да или нет" (azərb.). Youtube. 19 dekabr 2013. İstifadə tarixi: 3 iyun 2020.
  20. "Ibrahim Chingiz - Пролог" (azərb.). Youtube. 23 dekabr 2013. İstifadə tarixi: 3 iyun 2020.
  21. "Ibrahim Chingiz - ЧтоЗаПопса" (azərb.). Youtube. 13 aprel 2014. İstifadə tarixi: 3 iyun 2020.
  22. "Ibrahim Chingiz - Жизнь Моя" (azərb.). Youtube. 17 yanvar 2014. İstifadə tarixi: 3 iyun 2020.
  23. "Ibrahim Chingiz - Проблемы" (azərb.). Youtube. 1 may 2014. İstifadə tarixi: 3 iyun 2020.
  24. "Ibrahim Chingiz - Два студента" (azərb.). Youtube. 20 may 2014. İstifadə tarixi: 3 iyun 2020.
  25. "Ibrahim Chingiz - На Минуту" (azərb.). Youtube. 17 noyabr 2014. İstifadə tarixi: 3 iyun 2020.
  26. "Əməkdar artistin oğlu nişanlandı - Foto" (azərb.). teleqraf.com. 30 yanvar 2021. 2021-06-11 tarixində arxivləşdirilib. İstifadə tarixi: 2021-06-11.
  27. "Azərbaycanlı sənətçilər nişanlandı - FOTO" (azərb.). mediapost.az. 30 yanvar 2021. 2021-06-11 tarixində arxivləşdirilib. İstifadə tarixi: 2021-06-11.

Həmçinin bax[redaktə | mənbəni redaktə et]

Xarici keçidlər[redaktə | mənbəni redaktə et]