İftixar Abbasov

Vikipediya, azad ensiklopediya
Jump to navigation Jump to search
İftixar Abbasov
Abbasov İftixar Balakişi oğlu
Doğum tarixi 29 oktyabr 1966(1966-10-29)
Doğum yeri Daşdalıqcar, Lənkəran rayonu
Elmi dərəcəsi Texnika elmləri doktoru
Elmi adı professor

Abbasov İftixar Balakişi oğlu (29 oktyabr 1966(1966-10-29), Lənkəran rayonu) — Texnika elmləri doktoru, professor.[1] Cənub Federal Universitetinin Taqanroq Texnologiya İnstitutunun mühəndis qrafikası və kompüter dizaynı kafedrasının müdiri.

Həyatı[redaktə | əsas redaktə]

İftixar Abbasov 1966-cı il oktyabrın 29-da Azərbaycan Respublikasının Lənkəran rayonunun Daşdalıqcar kəndində anadan olub.

1988-ci ildə İ.Abbasov Taqanroq Radiotexnika İnstitutunu “elektrohidroakustika və ultrasəs texnikası” ixtisası üzrə bitirib. 1989-1993-cü illərdə Taqanroq Radiotexnika İnstitutunun elektrohidroakustika və ultrasəs texnikası kafedrasında baş laborant, mühəndis, laboratoriya müdiri vəzifələrində işləyib. 1993-1996-cı illərdə Taqanroq Dövlət Radiotexnika Universitetinin (TDRU) aspirantı, Soros Fondunun və Universitetin Elmi Şurasının təqaüdçüsü olub. 1996-cı ildə aspiranturanı bitirdikdən sonra TDRU-nun mühəndis qrafikası kafedrasının assistenti vəzifəsinə qəbul edilib. 1997-ci ildə fizika-riyaziyyat elmləri namizədi alimlik dərəcəsi almaq üçün dissertasiya müdafiə edib.[2]

1998-2013-cü illərdə İ.Abbasov mühəndis qrafikası və kompüter dizaynı kafedrasının dosenti vəzifəsində işləyib, 2000-ci ildə dosent elmi adı alıb. 2012-ci ildə texnika elmləri doktoru alimlik dərəcəsi almaq üçün dissertasiya müdafiə edib. 2013-cü ildə mühəndis qrafikası və kompüter dizaynı kafedrasının müdiri vəzifəsinə seçilib.

İ.Abbasovun elmi maraqlarının əhatə dairəsi: hidrodinamikada və akustikada qeyri-xətti dalğavarı hadisələrin riyazi modelləşdirilməsi, sənaye dizaynında kompüter modelləşdirməsi.

İ.Abbasov 5 monoqrafiyanın, 180 elmi və tədris-metodiki işin, EHM üçün proqramların dövlət qeydiyyatı haqqında 3 şəhadətnamənin müəllifidir. Onun elmi araşdırmalarının əsas nəticələri akademik, referativ və xarici jurnallarda – “Dokladı RAN”, “Akustiçeskiy jurnal”, “İzvestiya RAN: Mexanika jidkosti i qaza”, “Fizika atmosferı i okeana”, “Jurnal texniçeskoy fiziki”, “Vıçislitelnaya mexanika sploşnıx sred”, “Journal of Sound and Vibration (UK)”, “Waves in Random and Complex Media (UK)”, “Applied Mathematics (USA)”, “International Journal of Pure and Applied Mathematics (EU)” nəşrlərində məqalələr şəklində dərc edilib.

İ.Abbasov mühəndis və kompüter qrafikası, üçölçülü kompüter modelləşdirməsi, qavrama psixologiyası üzrə mühazirə kursları oxuyur. Kompyuter texnologiyalarının dizaynda tətbiqi üzrə 12 dərs vəsaitinin müəllifidir. Bu vəsaitlərdən 8-i RF Təhsil Nazirliyinin, RF Təhsil Nazirliyinin mühəndis qrafikası üzrə Elmi-Metodik Şurasının, dizayn və monumental-dekorativ incəsənət sahəsində Tədris-Metodika Şöbəsinin qrifləri ilə “DMK Press” nəşriyyatında (Moskva) nəşr edilib. İ.Abbasov tələbə-dizaynerlərin elmi işlərinə rəhbərlik edir, hər il müxtəlif səviyyəli elmi konfranslarda və sərgilərdə iştirak edir.

“MİFİ” Milli Nüvə Tədqiqatları Universitetində (Moskva, 2009), S.Q.Stroqanov adına Moskva Dövlət Bədii-Sənaye Akademiyasında (Moskva, 2010) ixtisasartırma kursları keçib.

İ.Abbasov Rusiya Dizaynerlər İttifaqının, Rusiya Akustika Cəmiyyətinin, Hindistan Riyaziyyat Cəmiyyətinin (IMS) üzvüdür. Onun bioqrafik məlumatları “Uçyonıye Rossii” (Rossiyskaya akademiya yestestvoznaniya) kitabına, “Marquis Who's Who in the World” (ABŞ), “Who's Who v Rossii” (İsveçrə) beynəlxalq bioqrafik məlumat kitabçalarına daxil edilib.

İstinadlar[redaktə | əsas redaktə]

  1. Аббасов Ифтихар Балакиши Оглы
  2. Bağıyeva, Mətanət (2016). Xaricdə yaşayan azərbaycanlılar. Qısa bioqrafik məlumat kitabçası (PDF) (azərb.). Bakı: "Papirus NP". ISBN 978-9952-8299-1-4. 2017-10-21 tarixində orijinalından (PDF) arxivləşdirilib. İstifadə tarixi: 2017-10-21.