İnter (telekanal)

İnter
Ölkə	Ukrayna
Baş qərargah	Kiyev
Yaranma tarixi	20 oktyabr 1996
Sahibi	Sergey Lyovoçkin
Sayt	inter.ua
Vikianbarda əlaqəli mediafayllar

Inter — Ukraynada fəaliyyət göstərən, oliqarx Dmitri Firtaş və Valeri Xoroşkovskiyə məxsus olan rusiyayönümlü informasiya-əyləncə telekanalı. Kanal yerüstü efir və kabel şəbəkələri, habelə peyk vasitəsilə yayım həyata keçirir. Onun texniki əhatə dairəsi Ukrayna ərazisinin 99,7 %-ni təşkil edir. Telekanal "Group DF" holdinqinin tərkib hissəsi olan "Inter Media Group" media konqlomeratına daxildir.

Tarixi

Quruluş dövrü

26 aprel 1996-cı il tarixində dövlətə məxsus UT-3 kanalının tezliklərində (günortaya qədər yayım şərti ilə) fəaliyyət göstərmək üçün yeni yaradılmış "Ukrayna Müstəqil TV Korporasiyası" lisenziya almış və bu korporasiya tərəfindən "İnter" kanalı təsis edilmişdir. Kanalın yarandığı gündən 2015-ci ilə qədər səhmlərinin 29%-i Rusiyanın "Birinci Kanal"ına (keçmiş ORT) məxsus olmuşdur. Təsisçilər sırasına ORT ilə yanaşı, "İş Dünyası" İşgüzar Əməkdaşlıq və İnkişaf Assosiasiyası, Dövlət Əmlak Fondu və Puşkinin 200 illiyi Fondu daxil edilmişdir. Fəaliyyətinin ilk mərhələsində kanalın proqram şəbəkəsinin əsasını ORT istehsalı olan verilişlərin retranslyasiyası təşkil etmişdir. 20 oktyabr 1996-cı il tarixində, saat 14:00-da "İnter" (başlanğıcda "İnterkanal") Ukrayna tezliklərində ORT-nin yayım şəbəkəsində fəaliyyətə başlamışdır. Yeni kanalın efirinə çıxan ilk proqram rus dilində yayımlanan "İnter — bu gün" ("Интер — день сегодняшний") xəbər proqramı olmuşdur. Həmin dövrdə Ukrayna Ali Radasının teleradio informasiya məkanının öyrənilməsi üzrə müvəqqəti istintaq komissiyası Milli Televiziya və Radio Şurasının fəaliyyətində qanunsuzluq şübhələrini irəli sürmüşdür. İddia edilmişdir ki, şura tərəfindən "Ukrayna Müstəqil TV Korporasiyası" üçün əlverişli şərait yaradılmış, bu isə keçmiş UT-3 tezlikləri uğrunda mübarizə aparan digər namizəd — "TV Tabaçuk İnformasiya Xidməti"nin müsabiqədə tamamilə məğlubiyyətinə səbəb olmuşdur. Buna baxmayaraq, "İnter" lisenziyanı yalnız qismən əldə edə bilmişdir. Belə ki, müəyyən bir müddət ərzində kanal sutkada yalnız 20 saat (saat 20:00-dan növbəti gün saat 16:00-dək) yayım həyata keçirmişdir. Qalan 4 saatlıq vaxt kəsiyi (saat 16:00-dan 20:00-dək) Dövlət Vilayət və Regional Teleradio Şirkətləri Assosiasiyasının layihəsi olan "Ukrayna" kanalına ayrılmışdır. Bu vəziyyət "Ukrayna" kanalı UT-3 şəbəkəsindən çıxana qədər, cəmi 10 gün davam etmişdir. Aleksandr Zinçenko bu məsələ ilə bağlı keçirdiyi mətbuat konfransında qeyd etmişdir ki, korporasiya rəhbərliyi son ana qədər "Ukrayna" kanalının işə düşəcəyi barədə məlumatsız olmuşdur. Bu səbəbdən proqram şəbəkəsi elə qurulmuşdur ki, Kiyev vaxtı ilə saat 20:00-da yayımlanan "Zaman" proqramından sonra əsasən Ukrayna istehsalı olan verilişlər, saat 20:00-dan əvvəl isə Rusiyanın ORT kanalının populyar proqramları təqdim edilsin. "Ukrayna Müstəqil TV Korporasiyası"nın rəhbərliyi UT-3 tezliklərindən birgə istifadə ilə bağlı vilayət dövlət teleradio şirkətləri ilə razılığa gəlmişdir. "İnter" kanalının formalaşma dövründə efir vaxtı yeni milli yayımçı ilə regional şirkətlər arasında bölüşdürülmüşdür. Müxtəlif regionlarda yerli teleradio şirkətlərinə öz yayımları üçün axşam saatlarında (əsasən 18:30–19:30 aralığında) vaxt ayrılmışdır.

Bu şərtlər daxilində korporasiya öz proqram şəbəkəsini yenidən qurmağa məcbur olmuş, axşam efiri üçün nəzərdə tutulan bəzi özəl layihələr ləğv edilərək, onların yerinə saat 16:00-dan 20:00-dək yayımlanmalı olan proqramların yazıları yerləşdirilmişdir. 2 noyabr 1996-cı il tarixində "Ukrayna" kanalının yayımını dayandırmasından sonra həm Ukrayna "İnter"inin, həm də Rusiya ORT-sinin proqramlarından ibarət yeni şəbəkə formalaşmışdır, lakin yerli dövlət teleradio şirkətinin lisenziya ilə bağlı etirazları səbəbindən kanal 26 may 1997-ci il tarixinədək Lvov vilayətində yayımlanmamışdır.

"İnter"in mütəmadi olaraq efirə çıxan ilk özəl layihəsi "İnternovini" xəbər proqramı olmuşdur. Sonradan Vlad Ryaşin tərəfindən hazırlanan "Melorama" kimi digər layihələr də fəaliyyətə başlamışdır. Bu inkişafın nəticəsi olaraq ORT proqramları tədricən efirdən çıxarılmışdır. Efir siyahısından silinən ilk veriliş "Baxış" ("Взгляд") proqramı olmuşdur. Kanal rəhbərliyi bunu proqramın sırf Rusiyanın daxili problemlərinə, xüsusilə də həmin dövrdə davam edən Çeçenistan müharibəsinə həsr olunması ilə əsaslandırmışdır. "İnter"in əsas missiyasının "ailə kanalı" olmaqdan ibarət olduğu və bu növ müharibə görüntülərinin kanalın konseptinə uyğun gəlmədiyi bildirilmişdir.

Zaman keçdikcə telekanalın texniki bazası da təkmilləşmişdir. "Profile" kompüter sisteminin quraşdırılması materialları dərhal yazmağa, montaj etməyə və redaktə etməyə imkan vermişdir. Əgər əvvəllər ORT proqramlarını lisenziya tələblərinə uyğunlaşdırmaq üçün onları tam yazmaq və sonra redaktə etmək tələb olunurdusa, yeni sistem vasitəsilə proqramlar rəqəmsal formatda kiçik hissələrlə birbaşa sərt diskə yüklənmişdir. Hər bir fraqment sürətlə redaktə olunaraq Rusiya reklamlarından təmizlənmiş, Ukrayna reklamları əlavə edilmiş və 10-15 dəqiqəlik gecikmə ilə efirə verilmişdir. Bu yolla Ukrayna tamaşaçıları ORT proqramlarını Rusiya ilə demək olar ki, eyni vaxtda izləmək imkanı qazanmışdır. Həmçinin, "İnter" Ukraynada öz studiyasından yayım mərkəzinə fiber-optik xətt çəkən ilk kanallardan biri olmuş və bu da təsvir keyfiyyətini əhəmiyyətli dərəcədə artırmışdır.

Kanalın təsisçiləri olan "Ukrayna Müstəqil TV Korporasiyası" QSC-nin səhmləri başlanğıcda "İş Dünyası" Assosiasiyası (51%), "Pegas Televiziya" MMC (20%) və Rusiya ORT-si (29%) arasında bölüşdürülmüşdür. Faktiki olaraq isə kanal yarandığı gündən İqor Plujnikovun nəzarəti altında olmuşdur. O, "Pegas Televiziya" MMC-nin 82,5%-nə, qalan hissələrə isə yenə ona məxsus olan "Pegas end oversiz seylz limited" (17,3%) və "Bersted Ukrayna" (0,2%) şirkətləri vasitəsilə sahiblik etmişdir. Kanalın operativ idarəçiliyi 1996–2001-ci illərdə Aleksandr Zinçenko, 2001–2006-cı illərdə isə Vladislav Ryaşin tərəfindən həyata keçirilmişdir. Xəbərlər xidmətinə 1997–2001-ci illərdə Anna Bezlyudnaya, 2001–2005-ci illərdə isə Aleksey Mustafin rəhbərlik etmişdir.

23 oktyabr 2001-ci il tarixində telekanal 2015-ci ilin iyul ayına qədər qüvvədə olan yeni yayım və telemətn lisenziyası almışdır. 30 dekabr 2002-ci il tarixindən etibarən isə kanalın proqramları sutka ərzində kəsintisiz yayımlanmağa başlamışdır.

20 oktyabr 2002-ci il tarixində "İnter" Rusiyanın "Birinci Kanal"ının retranslyasiyasını tamamilə dayandırmışdır. Bununla da iş günlərində yayım həcmi saat 06:00-dan 02:00-04:00-dək, istirahət günlərində isə 07:00-dan 03:00-dək artırılmışdır. Regional dövlət teleradio şirkətlərinin proqramları "Birinci Milli" kanalın şəbəkəsinə (saat 17:00-19:00 aralığına) keçirilmişdir.

30 dekabr 2002-ci il tarixindən 2018-ci ilin avqust-sentyabr aylarına qədər "İnter" Ukraynanın böyük hissəsində UT-3 tezliklərində 24 saatlıq yayım rejimində fəaliyyət göstərmişdir. 13 yanvar 2003-cü il tarixində isə "İnter+" beynəlxalq peyk kanalı yayıma başlamışdır.

Fəaliyyətinin ilk illərində "İnter" prezident Leonid Kuçma administrasiyasının və Ukrayna Birləşmiş Sosial-Demokrat Partiyasının güclü siyasi təsiri altında olmuşdur. Bu amil 2004-cü ildə kanalın reytinqlərinin kəskin şəkildə aşağı düşməsinə səbəb olmuşdur. Belə ki, 2003-cü ildə 27,7% olan bazar payı 2004-cü ilin yekunlarına görə 23,4%-ə qədər geriləmişdir, lakin "Narıncı inqilab"dan sonra vəziyyət əhəmiyyətli dərəcədə dəyişmiş və 2005-ci ilin ilk 7 ayı ərzində kanalın orta payı yenidən 26%-i keçmişdir.

2004–2013-cü illər

2004-cü il "Narıncı inqilab"dan sonra "İnter"in sahibi İqor Plujnikova Viktor Medvedçuk, Konstantin Qriqorişin və Petro Poroşenko tərəfindən telekanalın satın alınması ilə bağlı bir neçə təklif irəli sürülmüşdür.

2005-ci ilin iyun ayında İqor Plujnikov xaricdə qəflətən vəfat etmişdir. Avqust ayında "İş Dünyası"nın bütün səhmləri və "Pegas Televiziya" MMC-nin payının yarısı (ümumilikdə UNTK səhmlərinin 61%-i) Valeri Xoroşkovskiyə yaxın biznes strukturlarının nəzarətinə keçmiş, sonradan o, bu aktivləri "Ukrayna Media Layihəsi" MMC-də birləşdirmişdir. Həmin dövrdə Xoroşkovski Rusiyada oliqarx Aleksandr Abramova məxsus olan "Evraz Group" şirkətinin idarəedici direktoru vəzifəsini icra etmişdir. Sözügedən metallurgiya holdinqinə Nijni Taqil, Qərbi Sibir və Novokuznetsk metallurgiya kombinatları, Kaçkanar və Vısokoqorsk mədən-saflaşdırma kombinatları, habelə illik rəsmi mənfəəti bir milyard dollara yaxın olan "Evrazruda" ASC daxil olmuşdur. 19 iyun 2006-cı il tarixində "Evraz Group"un səhmlərinin 41,3%-i Roman Abramoviçə satıldıqdan sonra Valeri Xoroşkovski Ukraynaya qayıtmış və o dövrün Ukrayna Prezidenti Viktor Yuşenkonun təklifi ilə Milli Təhlükəsizlik və Müdafiə Şurasında vəzifə almışdır. Xoroşkovski 2005-ci ilin sentyabrında telekanalın Müşahidə Şurasının sədri təyin edilmiş və qısa müddətdə idarəetmə heyətini dəyişmişdir. 2006-cı ildə Serhiy Staritski "İnter"in idarə heyətinin sədri, Leonid Mazor baş prodüser, Maksim Karıjski isə xəbərlər xidmətinin rəhbəri təyin olunmuşdur. 2006-cı ilin yekunlarına görə, "İnter"in bazar payı rekord həddə — 20,4%-ə qədər azalmışdır. Seçilmiş strategiyanın uğursuzluğunu nəzərə alan Xoroşkovski rəhbərliyi yenidən dəyişmişdir. 2006-cı ilin dekabrında Serhiy Sozanovski idarə heyətinin sədri, "Inter Media Group"un rəhbəri Anna Bezlyudnaya isə baş prodüser təyin edilmişdir. Xəbərlər xidmətinə rəhbərlik Anton Nikitinə həvalə olunmuşdur.

2007–2019-cu illər ərzində "İnter" media qrupunun tərkibində müxtəlif mövzularda film və teleproqramların istehsalı ilə məşğul olan "07 Production" studiyası fəaliyyət göstərmişdir. Bu studiyanın istehsal etdiyi filmlər həm Ukraynada, həm də xaricdə keçirilən nüfuzlu festivallarda dəfələrlə mükafatlara layiq görülmüşdür. 24 avqust 2007-ci il tarixində telekanal loqosunu dəyişmişdir. Yeni loqotipdə istifadə olunan "Tario" şrift üslubu 2004-cü ildə Rusiyanın "Artemi Lebedev Studiyası" tərəfindən hazırlanmışdır. Xəbərlərin istehsalı üçün isə ayrıca "Milli İnformasiya Sistemləri" (NİS) adlı prodakşın studiyası yaradılmışdır.

Reytinqlərin düşməsini yalnız 2007-ci ilin yaz fəslinin sonunda müvəqqəti olaraq dayandırmaq mümkün olmuşdur. 2007-ci ilin yekunlarına əsasən "İnter"in payı 20,94% təşkil etmişsə də, növbəti illərdə azalma davam etmişdir: 2008-ci ildə 19,68%, 2009-cu ildə isə 18,3% qeydə alınmışdır. Bu göstəricilər kanalın mümkün satışı barədə şayiələri gücləndirmişdir. ABŞ-nin keçmiş səfiri Vilyam Teylorun "WikiLeaks" portalında dərc olunmuş hesabatına əsasən, 8 dekabr 2008-ci il tarixində Dmitri Firtaş ilə keçirilən görüşdə bəzi Ukrayna media vasitələrinin Firtaşın "İnter" media qrupunun 61% səhmini satın aldığı barədə iddiaları qeyd olunmuşdur.

Xoroşkovski bu məlumatları şərh edərkən bildirmişdir ki, Firtaş hazırda kanalın sahibi deyil, yalnız danışıqlar prosesindədir. Xoroşkovski qeyd etmişdir ki, Dmitri Firtaşın "U.A. Inter Media Group Limited" holdinqinin 50%-ni almaq üçün mürəkkəb şərtlərə malik opsionu mövcuddur və bu imkan "K1", "K2" və "Megasport" kanallarının satın alınması zamanı yaranmışdır. 2009-cu ilin sentyabrında baş prodüser Anna Bezlyudnaya vəzifəsindən azad edilmiş, xəbərlər xidmətinin rəhbəri isə Aleksandr Pılıpets olmuşdur, lakin bu dəyişikliklər göstəricilərin düşməsinin qarşısını ala bilməmişdir. "İnter"in bazar payı 2010-cu ildə 16,15%, 2011-ci ildə 14,17%, 2012-ci ildə isə cəmi 13,8% təşkil etmişdir. Bu, həmin dövr üçün kanalın tarixindəki ən aşağı nəticə kimi qiymətləndirilmişdir. 2010-cu ilin dekabrında kanal bir ay müddətində "İnter HD" adlı sınaq yüksək dəqiqlikli (HD) versiyasını işə salmışdır. Bu formatda "Svati 4", "Kotovski" serialları və Ukrayna Prezidentinin Yeni il müraciəti nümayiş etdirilmişdir. 12 iyul 2012-ci il tarixində səhmdarların ümumi yığıncağının qərarı ilə hüquqi şəxsin adı "Ukrayna Müstəqil TV Korporasiyası" QSC-dən "İnter" Telekanalı" Özəl Səhmdar Cəmiyyətinə (PrAT) dəyişdirilmişdir.

2013–2022-ci illər

Yevgeni Kiselyov 14 fevral–2 oktyabr 2013-cü il tarixlərində "Milli İnformasiya Sistemləri"nə rəhbərlik etmişdir.

1 fevral 2013-cü il tarixində "DF Group" şirkəti "Inter Media Group"un səhmlərinin 100%-ni satın aldığını elan etmişdir. Valeri Xoroşkovski satışı mövcud şəraitdə qrupun inkişafını təmin etmək imkanının olmaması və bu amilin satış üçün əsas motivasiya təşkil etməsi ilə əsaslandırmışdır. 14 fevral 2013-cü il tarixindən etibarən Anna Bezlyudnaya "Inter Media Group"un rəhbəri təyin edilmiş, həmçinin "İnter" kanalının Müşahidə Şurasının tərkibinə daxil olmuşdur. Kanalın rəhbərliyi Yeqor Benkendorfa həvalə edilmişdir. 14 fevraldan 2 oktyabr 2013-cü ilədək "Milli İnformasiya Sistemləri"nə (NİS) Yevgeni Kiselyov rəhbərlik etmişdir. O, vəzifəsindən ayrıldıqdan sonra "Group DF"in idarəedici direktoru Boris Krasnyanskinin müşaviri təyin olunmuşdur. "NİS"in yeni direktoru Nazim Bədirov, icraçı direktoru isə Lavrenti Malazoniya olmuşdur, lakin 2013-cü ilin dekabrında həm Bədirov, həm də Malazoniya öz vəzifələrini tərk etmiş, şirkətin rəhbərliyinə Anton Nikitin gətirilmişdir.

Bu struktur dəyişiklikləri və daxili qeyri-sabitlik kanalın bazar payının növbəti dəfə azalmasına səbəb olmuş və 2013-cü ilin yekunlarına görə bu göstərici 12,8%-ə düşmüşdür.

2014-cü ilin mart ayında Nazim Bədirov yenidən "NİS"in direktoru təyin edilmişdir. O, vəzifədən uzaqlaşdığı müddətdə "Zoom" kanalının direktoru vəzifəsində çalışmışdır. Lavrenti Malazoniya informasiya siyasəti üzrə rəhbər, Aleksandr Pilipinets isə onun müavini təyin olunmuşdur. "Həftənin təfərrüatları" ("Podrobnosti nedeli") proqramının baş redaktoru vəzifəsi Olqa Çervakovaya tapşırılmışdur. Bu təyinatların ardından "İnter" və "NİS" arasında fəaliyyətin bölüşdürülməsinə dair 15 iyun 2014-cü il tarixinədək qüvvədə olan müqavilə imzalanmışdır. Yeqor Benkendorf və Nazim Bədirov tərəfindən imzalanan bu sənədə əsasən, telekanalın xəbər istehsalçısı olan şirkətin işinə müdaxilə etmək hüququ məhdudlaşdırılmışdır.

2 iyun 2014-cü il tarixində "Inter Media Group"un rəhbəri Anna Bezlyudnaya gələcək planlar barədə danışarkən "İnter"də müəllif proqramlarının və keyfiyyətli sənədli filmlərin artırılacağına ümid etdiyini bildirmişdir. O, həmin dövrdə Ukrayna televiziyasında yalnız xəbər və əyləncə formatlarının üstünlük təşkil etdiyini, lakin subyektiv müəllif baxışının hazırda satın alınan formatlardan daha çox tələb oluna biləcəyini qeyd etmişdir.

Buna baxmayaraq, həmin planların tam reallaşması mümkün olmamışdır. Göstəricilərin düşməsi müvəqqəti dayansa da, 2014-cü ilin yekununda 12,58% olan bazar payı 2015-ci ildə 10,75%-ə enmişdir. 2015-ci ildən 2021-ci ilədək kanal hər il 9 may tarixində efirdən reklamları kənarlaşdırmışdır.

2016–2023-cü illərdə "İnter" telekanalının idarə heyətinin sədri Katerina Şkuratova olmuşdur. Buna baxmayaraq, reytinqlərin aşağı düşmə tendensiyası davam etmişdir. 15 oktyabr 2016-cı il tarixindən etibarən telekanal "İnter+" kanalı ilə eyni vaxtda 16:9 genişekranlı təsvir formatına keçmişdir.

Bazar payı göstəriciləri (Nielsen reytinq sisteminə görə, 18–54 yaş qrupu, 50 min+ əhalisi olan şəhərlər üzrə) illər üzrə aşağıdakı kimi olmuşdur: 2016-cı ildə 9,71%, 2017-ci ildə 9,69%, 2018-ci ildə 6,28%, 2019-cu ildə 5,15%, 2020-ci ildə 5,07%, 2021-ci ildə isə 4,74%. 2021-ci ilin yekunlarına əsasən telekanalın bazar payı aşağıdakı göstəricilər üzrə müəyyən olunmuşdur. 18+ yaş qrupu üzrə — 7,18%, 18–54 yaş qrupu (kommersiya auditoriyası) üzrə — 4,74%.

2019-cu ildə Ukraynada keçirilən parlament və prezident seçkiləri zamanı kanal Yuri Boyko və rusiyayönümlü OPHC ("Müxalifət Platforması — Həyat Naminə") partiyasını dəstəkləmişdir. Əvvəlki dövrlərdə də seçki kampaniyaları zamanı telekanal Ukrayna Kommunist Partiyası və Regionlar Partiyasının, Ləyaqət inqilabından sonra isə "Müxalifət Bloku"nun fəaliyyətini müsbət tərəfdən işıqlandırmışdır. 2021-ci ilin mart ayında telekanal yüksək dəqiqlikli (HD) yayım standartına keçmişdir.

2022-ci ildən

24 fevral 2022-ci il tarixindən etibarən Rusiyanın Ukraynaya hərbi müdaxiləsi ilə əlaqədar telekanal sutka ərzində kəsintisiz olaraq "Vahid Xəbərlər" ("Єдині новини") informasiya marafonunu yayımlamışdır. 15 iyun 2024-cü il tarixinədək kanalın efirində reklam yerləşdirilməmişdir.

2022-ci ilin fevral ayından etibarən telekanalın maliyyələşdirilməsində ciddi problemlər yaranmış, bu isə kadr islahatları, aparıcıların, jurnalistlərin və digər əməkdaşların işdən çıxarılması ilə nəticələnmişdir. İşdən ayrılanlar arasında Andrey Domanski, Andriy Danileviç, Anatoli Bondarenko, Aleksandr Lukyanenko, Dmitri Çistyakov, Yan İvanişin, Pavel Pryadko, İrina Yusupova və Janna Tixonova kimi simalar yer almışdır. 14 noyabr 2023-cü il tarixində Anna Bezlyudnaya telekanalın Müşahidə Şurasının üzvü vəzifəsindən ayrılmışdır. Katerina Şkuratovanı idarə heyətinin sədri vəzifəsində əvvəllər kanalın şef-redaktoru və "NİS"in direktoru olmuş Aleksandr Pılıpets əvəz etmişdir.

8 aprel 2024-cü il tarixində Ukrayna Mədəniyyət və İnformasiya Siyasəti Nazirliyi tərəfindən "Vahid Xəbərlər" marafonunun digər iştirakçıları ilə yanaşı, "İnter" kanalına da "kritik dərəcədə mühüm" statusu verilmişdir. Bununla da kanalın əməkdaşlarının səfərbərlikdən möhlət hüququ (bron) təmin edilmişdir.

10 iyul 2025-ci il tarixində telekanal ştatın ixtisarı və maliyyə problemləri səbəbindən əmək haqqlarının azaldılması və işçilərin azad edilməsi barədə məlumat yaymışdır.

13 noyabr 2025-ci il tarixində Kiyevin Solomyansk rayon məhkəməsi Ukrayna Təhlükəsizlik Xidmətinə (SBU) telekanalın Dmitrivska küçəsində yerləşən baş ofisində baxış keçirməyə icazə vermişdir. Müvafiq dövlət orqanı tərəfindən sənədlərin saxtalaşdırılması və Ukrayna əleyhinə fəaliyyət göstərən Rusiyanın "Birinci Kanal"ı ilə əməkdaşlıq çərçivəsində terrorizmin maliyyələşdirilməsi ittihamları irəli sürülmüşdür.

Mülkiyyət strukturu

2007-ci ildə "İnter" qrupunun aktivlərini idarə etmək məqsədilə "Inter Media Group" holdinqi təsis edilmişdir. Bu holdinq "Ukrayna Media Layihəsi"nin 100% səhmlərinə və qrupa daxil olan digər müəssisələrə (doqquz telekanal, bir neçə reklam agentliyi, prodakşın studiyaları və s.) sahibdir.

3 fevral 2015-ci il tarixində Dmitri Firtaşın "Group DF" şirkətlər qrupuna daxil olan "GDF MEDIA LIMITED" və "INTER MEDIA GROUP LIMITED" şirkətləri "İnter" Telekanalı" ASC-nin minoritar səhm paketlərini satın almışdır. Rusiyanın "Birinci Kanal" ASC-nə məxsus olan 29%-lik səhm paketi bazar qiyməti ilə əldə edilmişdir. Bundan əlavə, Ukraynanın "Pegas Televiziya" MMC-nə məxsus olan 10%-lik səhmin alınması barədə də razılıq əldə olunmuşdur. "Birinci Kanal"ın səhm paketinin dəyəri 100 milyon ABŞ dolları təşkil etmişdir. Bu sövdələşmələr "Group DF"in media biznesinin idarə edilməsi və inkişafı üzrə ümumi strategiyası çərçivəsində həyata keçirilmişdir. Beləliklə, telekanalın səhmlərinin 100%-i tam şəkildə Dmitri Firtaşın sahibi olduğu şirkətlər tərəfindən idarə olunmağa başlamışdır. Əvvəllər minoritar səhm paketi Sergey Lyovoçkinə məxsus olmuşdur, lakin 2023-cü ilin iyul ayında həmin pay Firtaş tərəfindən satın alınmışdır. Mühüm iştirak payına malik mülkiyyətçilər kimi Valeri Xoroşkovski və Svetlana Plujnikova bəyan edilmişdir.

Yayım məhdudiyyətləri

Rusiya Federasiyası tərəfindən Krımın işğalının başlanğıcında, 2014-cü ilin mart ayında Krım ərazisində kanalın yayımı dayandırılmışdır. "İnter"in tezliyini "NTV" telekanalı tutmuşdur.

2017-ci ilin yanvar ayında "Lanet" kabel şəbəkəsi bütün abunəçiləri üçün kanalın yayımını kəsmişdir, lakin üç aydan sonra kanalın yayımı yenidən bərpa olunmuşdur.

Nailiyyətlər və mükafatları

2017-ci il — "Reçdok" ("Речдок") detektiv silsiləsinin promo-çarxı televiziya promo, marketinq və dizaynı üzrə əsas dünya müsabiqəsi olan "PromaxBDA Global Excellence"də iki qızıl mükafata layiq görülmüşdür.

2015-ci il — Kiyev Beynəlxalq Reklam Festivalının "FILM & RADIO.TV & PROMO FILM" kateqoriyası üzrə mükafatçısı olmuşdur. Kanalın öz istehsalı olan "Divar" ("Стіна") sənədli filminin promo-çarxı gümüş mükafat almış, həmçinin bu iş "Kulprostir" portalının xüsusi mükafatı ilə qeyd edilmişdir.

2015-ci il — "İnter" kanalı Kiyev Beynəlxalq Reklam Festivalının mükafatçısı olmuşdur. Telekanalın promo və art-direksiyası tərəfindən yaradılmış "Ukrayna İnter Superkuboku"nun "Bizi bölmək bəsdir! Biz səninlə eyni oyunun tərəfdarıyıq!" adlı promo-kampaniyası promo və dizayn sahəsində nüfuzlu Avropa televiziya mükafatı olan "PROMAX BDA Europe 2015"in "Best marketing campaign for a programme using multiple media" kateqoriyasında qızıl mükafat qazanmışdır.

2014-cü il — Ukraynanın ən nüfuzlu 10 işəgötürən şirkəti siyahısına daxil olmuşdur. 2014-cü il — "Teletriumf" mükafatının altı statusuna layiq görülmüşdür. 2013-cü il — Telekanalın promo-xidməti 2013-cü ilin teleçarxların kreativliyi reytinqində birinci yerə yüksəlmişdir. 2013-cü il — Telekanalın promo-çarxları "KAKADU Awards 2013" müsabiqəsinin mükafatçısı olmuşdur. 2013-cü il — Telekanalın promo-çarxları "ADC*UA Awards 2013" müsabiqəsində qızıl mükafat əldə etmişdir. 2013-cü il — Telekanalın istehsalı olan "Xaç suyuna salınma" ("Хрещення") sənədli filmi "Pokrov" Beynəlxalq Pravoslav Kino Festivalının Qran-pri mükafatına layiq görülmüşdür. 2013-cü il — "İnter" telekanalının efir identifikatorları (ID) "RED APPLE 2013" qızıl mükafatını qazanmışdır. 2013-cü il — "Kvitka. Yeganə nüsxədə olan səs" ("Квітка. Голос в єдиному екземплярі") sənədli layihəsi "Telepressa Favoriti — 2013" seçilmişdir. 2013-cü il — "Podrobnosti" proqramının icmalçısı Roman Boçkala "Ukraynanın Əməkdar jurnalisti" fəxri adına layiq görülmüşdür.

2012-ci il — "Teletriumf" mükafatının yeddi statusunu əldə etmişdir. 2012-ci il — Oleksandr Danilenko "Ukraynanın Əməkdar jurnalisti" fəxri adı ilə təltif olunmuşdur. 2012-ci il — "İnter" telekanalının dizayneri Andriy Turyanski "Super Boul" üçün hazırlanan reklamların dünya müsabiqəsinin mükafatçısı olmuşdur. 2011-ci il — "İnter" kanalı "Teletriumf" mükafatının yeddi statusuna layiq görülmüşdür. 2011-ci il — Andriy Tsapliyenko "Ukraynanın Əməkdar jurnalisti" fəxri adını almışdır. 2011-ci il — "Podrobnosti" proqramının icmalçısı Hennadi Vivdenko "Ukraynanın Əməkdar jurnalisti" fəxri adına layiq görülmüşdür. 2011-ci il — "Qızıl qələm" müsabiqəsində "Podrobnosti" ən yaxşı xəbər proqramı seçilmişdir. 2011-ci il — "Gəmi axtarışında" ("У пошуках Ковчега") filmi Beynəlxalq Livan Festivalında mükafat qazanmışdır.

2010-cu il — "İnter" kanalı "Teletriumf" mükafatının qısa siyahısında namizədlərinin sayına görə lider olmuşdur. 2009-cu il — "Podrobnosti" proqramı "Emmi" ("Emmy") mükafatına namizəd göstərilmişdur. 2008-ci il — "Təsir agentləri" ("Агенти впливу") proqramının efir zastavkası Kiyev Beynəlxalq Reklam Festivalında "gümüş" mükafat almışdır. 2008-ci il — "Savik Şusterin azadlığı" ("Свобода Савіка Шустера") proqramı "Qızıl qələm" mükafatına layiq görülmüşdür. 2007-ci il — "Blik" qəzeti və "Sotsis" tədqiqat mərkəzinin keçirdiyi sorğu nəticəsində Savik Şuster böyük fərqlə "2007-ci ilin teleulduzu (kişi)" kateqoriyasında qalib olmuşdur. 2007-ci il — "Qızıl qələm" ümumi Ukrayna illik kütləvi informasiya vasitələri müsabiqəsində "Vətən televiziyasının inkişafına verdiyi əhəmiyyətli töhfəyə görə" Fəxri diplomu ilə "İnter" telekanalındakı "Patriot oyunları" və "Kainat gözəli ol" proqramlarının prodüseri Yeqor Benkendorf təltif edilmişdir. 2006-cı il — "Qızıl qələm" ümumi Ukrayna kütləvi informasiya vasitələri müsabiqəsinin "Ən yaxşı əyləncə proqramı" nominasiyasında "Kvartal 95" studiyasının "Veqerniy kvartal" proqramı qalib olmuşdur.

2005-ci il — "Ukraynanı kəşf et!" I Ümumi Ukrayna Televiziya Müsabiqəsində "Ukrayna haqqında ən yaxşı televiziya layihəsi" nominasiyasında qalib diplomu, status və medalı "İnter" telekanalının "Ukrayna səyahətləri" (müəllif — İqor Çijov, prodüser — Yeqor Benkendorf) adlı tarixi-etnoqrafik, əyləncəli-idrak proqramı qazanmışdır. 2004-cü il — İnformasiya fəaliyyəti sahəsində İvan Franko adına mükafatın "Televiziya sahəsində ən yaxşı əsər" nominasiyasında "Atəş xəttində" ("На лінії вогню") layihəsinin müəllifi, jurnalist Andriy Tsapliyenko və layihə rəhbəri Yeqor Benkendorf laureat olmuşlar. Telekanal həmçinin "İlin teleşirkəti" nominasiyasında qalib gəlmişdir. 2003-cü il — "Teletriumf" mükafatının "Oyun proqramı" ("Şans") və "Film. Serial" ("İki dovşan dalınca") nominasiyalarında qalib olmuşdur. 2002-ci il — Birinci Ukrayna İnternet Festivalında "İnter" telekanalının rəsmi saytı (www.inter.ua) "İnternetdə KİV" nominasiyasında laureat seçilmişdir. 2001-ci il — Birinci Ukrayna İnternet Festivalında "Xəbərlər" və "İnfo 2001" nominasiyalarında telekanalın www.podrobnosti.ua saytı laureat olmuş və festivalın Qran-pri mükafatını qazanmışdır. 2001-ci il — "Məxmər mövsümü" VI Beynəlxalq Teleproqramlar Festivalında "N-ci kilometr" proqramı "Publisistika", "Heyvanların həyatı" proqramı isə "Elmi-kütləvi və idrak proqramları" nominasiyalarında ən yaxşı elan edilmişdir. 2000-ci il — "Qızıl qələm" ümumi Ukrayna illik KİV müsabiqəsində "Uikend" proqramı ən yaxşı idrak proqramı, "Sport-taym" isə idman haqqında ən yaxşı televiziya proqramı kimi mükafatlandırılmışdır.

1999-cu il — Avrasiya Teleforumu çərçivəsində "NLO" proqramı "Əyləncə proqramı" nominasiyasında qalib olmuşdur. 1999-cu il — Ukrayna Dövlət İstehlakçıların Hüquqlarının Müdafiəsi Komitəsi tərəfindən "İnter" telekanalı "Teleyayım" nominasiyasında "Milli sosial reklam məlumatı müsabiqəsinin qalibi" diplomu ilə təltif edilmişdir. 1998-ci il — Üçüncü ümummilli "İlin adamı-98" proqramı çərçivəsində "İnter" telekanalı "İlin teleşirkəti" nominasiyasında laureat diplomu almışdır. 1997-ci il — "Qızıl Era" ("Золота Ера") müsabiqəsində "Sport-taym" ən yaxşı idman proqramı, "Məxfi hekayələr" proqramı isə ən yaxşı mədəni-tarixi proqram adına namizəd göstərilmişdir. 1997-ci il — "Profi" reytinqində "Melorama" proqramı "Ən yaxşı musiqi proqramı" nominasiyasında birinci yeri tutmuşdur. 1997-ci il — Ümumi Ukrayna Jurnalistika Festivalında Ukrayna jurnalistikasına verdiyi töhfəyə görə "İnter" telekanalına "Ümumxalq rəğbəti" titulu verilmişdir.

İnter+

13 yanvar 2003-cü il tarixində telekanalın beynəlxalq versiyası olan "İnter+" fəaliyyətə başlamışdır. Bu kanalın yayımı ukrain diaspor nümayəndələrinin Ukrayna ilə əlaqələrini dəstəkləməyə yönəlmişdir. 18 iyun 2003-cü il tarixində "İnter+" yayım lisenziyası almış, 2009-cu ildə isə bu lisenziyanın müddəti 10 il uzadılmışdır. "İnter+" kanalının efirində "İnter" telekanalının və media qrupuna daxil olan digər kanalların ən yaxşı proqramları nümayiş etdirilir. Yayım Avropa, Türkiyə, Rusiya Federasiyasının qərb hissəsi, Qazaxıstan, Mərkəzi Asiya, Şimali Afrika]], Yaxın Şərq, ABŞ, Kanadanın cənub hissəsi və Meksikanın şimalını əhatə edən üç peyk vasitəsilə həyata keçirilir.

1 yanvar 2021-ci il tarixindən etibarən kanal Rusiyada yayımını dayandırmışdır.

İnter Ukrayna

Kanalın loqotipi.

2024-cü ilin iyul ayında "Inter Media Group" ümumi mövzulu yeni "İnter Ukrayna" telekanalının yaradılacağını elan etmişdir. Həmin ilin 8 avqust tarixində telekanal DVB-T2 rəqəmsal efir şəbəkəsinin MX-7 multipleksində yayım lisenziyası almaq üçün keçirilən müsabiqənin qalibi olmuşdur.

Şirkətin Müşahidə Şurasının üzvü Serhiy Sozanovskinin bildirdiyinə görə, yeni kanal efirə arxiv materialları ilə deyil, hazırlanması müəyyən zaman tələb edən yeni layihələrlə çıxmağı planlaşdırır. Sozanovski qeyd etmişdir ki, qarşıya qoyulan vəzifələri yerinə yetirmək və böyük rəqabətə qayıtmaq üçün kanalın 2025-ci ilin payızında fəaliyyətə başlaması nəzərdə tutulur. Bununla belə, o, bu tarixin reklam bazarındakı vəziyyətdən, Ukraynadakı ümumi şəraitdən və istehsalçılardan asılı olduğunu vurğulamışdır.

15 avqust 2025-ci il tarixində ştatın ixtisarı, əməkdaşların işdən azad edilməsi, habelə əmək haqqlarının azaldılması və maliyyə çətinlikləri səbəbindən media qrup Milli Şuraya müraciət etmişdir. Müraciətdə MX-7 şəbəkəsində yayımın başlanma tarixinin hərbi vəziyyət başa çatana qədər təxirə salınması xahiş olunmuşdur.

Etirazlar

2014-cü ildə Rusiya–Ukrayna müharibəsinin başlamasından sonra kanalın fəaliyyəti cəmiyyətdə daha mənfi reaksiyalara səbəb olmuşdur.

5 sentyabr 2016-cı il tarixində telekanalın mərkəzi ofisinin binası qarşısına, aralarında "Donbas" və "Aydar" batalyonlarının nümayəndələrinin də olduğu etirazçılar toplanmışdır. Fəallar "İnter"in fəaliyyətinin dayandırılması məqsədilə müddətsiz aksiya elan etmişdilər.

Mitinq iştirakçıları telekanalın qarşısında blokpost qurmaq niyyətlərini bəyan etmiş, binanın yaxınlığına avtomobil təkərləri gətirilmişdir. Gənclər çadır şəhərciyi salaraq əməkdaşların ofisə girişini bağlamışdılar. Etirazçıların əsas tələbləri telekanalın yayımının dayandırılması, bəzi əməkdaşların işdən çıxarılması və direktorlar şurasının tərkibinə mitinq iştirakçılarının nümayəndəsinin daxil edilməsi olmuşdur.

Bir sutka sonra fəallar telekanalın blokadasını dayandırmışdılar. Mitinqin təşkilatçılarından biri, "Müqəddəs Mariya" batalyonunun üzvü Aleksey Serdyukun sözlərinə görə, aksiya iştirakçıları ilə kanal rəhbərliyi arasında razılıq əldə olunmuşdur. Həmin razılığa əsasən, kanal rəhbərliyi 5 gün ərzində yayım konsepsiyasını dəyişməli və politoloq İqor Şuvalovu işdən azad etməli idi.

Həmin gün telekanalın nümayəndələri etirazçılarla heç bir razılığa gəlmədiklərini və onlarla hər hansı danışıqlar aparmadıqlarını bəyan etmişdilər.

2 iyun 2016-cı il tarixində maskalı naməlum şəxslər telekanalın Dmitrivska küçəsindəki ofisinin girişini yandırmışdılar. Binanın girişi təkərlər və yandırıcı qarışıqdan istifadə edilməklə yandırılmışdır.

22 noyabr 2016-cı il tarixinə keçən gecə naməlum şəxslər telekanalın ofisinə yandırıcı qarışıq doldurulmuş şüşə butulkalar ataraq binanı yandırmağa cəhd göstərmişdilər.

Tənqidi

Yeni il efirləri

31 dekabr 2014-cü il tarixində Yeni il şənlikləri çərçivəsində "İnter" kanalında Rusiyanın Krımı işğal etməsini dəstəkləyən sənətçilərin (İosif Kobzon, Oleq Qazmanov, Valeriya və başqaları) iştirakı ilə Rusiyanın "Ulduzlar paradı" ("Парад звёзд") adlı Yeni il proqramı yayımlanmışdır. Bu hadisə dərhal Ukraynanın bloq mühitində və sosial şəbəkələrdə kəskin etiraz dalğasına səbəb olmuşdur.

1 yanvar tarixində bir sıra yüksək səviyyəli Ukrayna dövlət rəsmiləri, siyasətçilər və ictimai xadimlər məsələ ilə bağlı bəyanatlarla çıxış etmişdilər.

Xüsusilə, Ukrayna Milli Təhlükəsizlik və Müdafiə Şurasının katibi Aleksandr Turçinov bildirmişdir ki, Ukrayna Milli Televiziya və Radio Şurası dərhal telekanalın lisenziyasının ləğv edilməsi məsələsinə baxmalıdır. Həmin gün axşam saatlarında telekanalın "Podrobnosti" xəbər proqramı Rusiya sənətçilərinin iştirak etdiyi Yeni il verilişlərindən rəsmən uzaq olduğunu bəyan etmiş və kanalın proqram şəbəkəsində faktiki dəyişikliklər edilmişdir.

2015–2016-cı illərin Yeni il gecəsində "İnter" telekanalının konsert proqramları da tamaşaçılar arasında böyük rezonans doğurmuşdur. Milli Təhlükəsizlik və Müdafiə Şurasının sanksiyaları altında olan Taisiya Povali və Ani Lorakın, habelə Svetlana Loboda və "Anna-Mariya" duetinin çıxışları cəmiyyətdə narazılıqla qarşılanmışdır.

Dezinformasiya

19 sentyabr 2016-cı il tarixində telekanalın "Podrobnosti" proqramının efirində Moskva Patriarxatının Ukrayna Pravoslav Kilsəsi iyerarxlarının ABŞ və Aİ ölkələrinin səfirləri ilə görüşünə dair süjet nümayiş etdirilmişdir, lakin reallıqda belə bir görüş baş tutmamışdır. "Xəbər"də dini təşkilatın nümayəndələrinin məbədlərin ələ keçirilməsindən şikayət etdikləri bildirilmişdir. Sonradan jurnalistlərin sorğusuna cavab olaraq Aİ-nin Kiyevdəki nümayəndəliyi və ABŞ-nin Kiyevdəki səfirliyi belə bir görüşün heç vaxt keçirilmədiyini, məlumatın kanal əməkdaşları tərəfindən uydurulduğunu təsdiqləmişdir.

Tok-şou qalmaqalı

9 və 13 oktyabr 2017-ci il tarixlərində telekanalda "Hər kəsə aiddir" ("Стосується кожного") tok-şousunun "Ana-uşaq" mövzusunda iki seriyası yayımlanmışdır. Veriliş sentyabr ayında qız uşağı dünyaya gətirən Lvov vilayətinin Borislav şəhərindən olan 12 yaşlı altıncı sinif şagirdi haqqında olmuşdur.

19 oktyabr 2017-ci il tarixində Ukrayna Ali Radasının İnsan Hüquqları üzrə Müvəkkili Valeriya Lutkovskayanın Milli Televiziya və Radio Şurasına "İnter" telekanalı ilə bağlı şikayət etdiyi məlum olmuşdur. Lutkovskayanın fikrincə, kanal sözügedən verilişin buraxılışlarında 12 yaşlı zahı qızın hüquqlarını pozmuşdur. Bu müraciətə cavab olaraq Milli Şura telekanalda plandankənar yoxlama təyin etmişdir.

24 oktyabr tarixində Britaniyanın "The Sun" tabloid qəzeti "Hər kəsə aiddir" realiti-şousunun buraxılışlarını "televiziya rüsvayçılığı" və ən pis realiti-şou adlandırmışdır.

Eyni zamanda, 2016-cı ilin noyabr ayında "İnter" uşaqların əlavə travma almasının qarşısını almaq məqsədilə KİV-də cinsi istismar və cinsi zorakılıq hallarının işıqlandırılmasını tənzimləyən yayımçıların birgə mövqe aktını imzalamaqdan imtina edən yeganə telekanal olmuşdur.

Avromeydan

21 fevral 2016-cı il tarixində "Həftənin təfərrüatları" ("Подробиці тижня") proqramında Müstəqillik Meydanından canlı yayım zamanı insident baş vermişdir. Meydanda insanların "Səma Yüzlüyü" qəhrəmanlarının xatirəsini yad etdiyi və telekanalın jurnalistinin 18–21 fevral 2014-cü il tarixlərində Avromaydan gülləbaranı zamanı həlak olan aktivistlərin yaxınları ilə həmsöhbət olduğu bir məqamda, "İnter"in yaradıcı prodüseri, Rusiya vətəndaşı Mariya Stolyarova "Alın, bu biabırçılığa son qoyun!" sözləri ilə canlı efiri kəsmişdir.

Prodüser öz izahatında bu təhqiramiz ifadələrin Meydanla əlaqəli olmadığını, studiya komandasına yönəldiyini iddia etsə də, bu peşəkar xəta Stolyarovanın işdən azad edilməsi ilə nəticələnmişdir. O, "canlı yayım zamanı qeyri-etik ifadələr işlətdiyinə görə" vəzifəsindən kənarlaşdırılmışdır.

Mariya Stolyarova həmçinin Rusiyanın terrorçu "Vostok" batalyonunun silahlıları ilə fotoşəkil çəkdirməsi və həmin şəkli "Facebook" profilində "Çox nəzakətli "Vostok" batalyonu! Donetskdəki sevimli oğlanlarım" başlığı ilə paylaşması ilə tanınırdı. 24 fevral tarixində Stolyarova İstanbul reysi ilə Ukraynadan deportasiya edilmişdir.

Qələbə Günü

9 may 2018-ci il tarixində telekanalda Qələbə Gününə həsr olunmuş bayram konserti zamanı (saat 20:30–22:50 aralığında yazılı şəkildə yayımlanmışdır) aparıcılar Anastasiya Dauqule və Andrey Domanski cəmiyyətdə kəskin tənqidə səbəb olan bir neçə fikir səsləndirmişlər. Xüsusilə, Domanski bildirmişdir: "...bu gün biz şəhərlərimizin küçələrinin faşist cinayətkarlarının adları ilə adlandırılmasına, hər qarışı soydaşlarımızın qanına qərq olmuş paytaxtımızda onların portretlərinin məşəl yürüşləri zamanı cəzasız şəkildə daşınmasına imkan verə bilmərik". Bundan əlavə, bütün konsert proqramı Sovet dövrünün təbliğat şablonları ("Böyük Vətən müharibəsi", "faşistlər" və s.) üzərində qurulmuş, aparıcılar Moskvada yerləşən Qırmızı Meydan haqqında "Bu, bizim meydanımızdır" kimi ifadələr işlətmişlər.

Ukrayna Milli Televiziya və Radio Şurası "İnter" telekanalının 8 mayda konsertdən montaj olunmuş çarxı yayımlamasından sonra ölkəni parçalamaq cəhdlərinə son qoymağa çağırmışdır.

Ukrayna Təhlükəsizlik Xidmətinin Milli Dövlətçiliyin Müdafiəsi Departamenti, bir neçə Ukrayna vətəndaşı və "Ukrayna Qalisiya Partiyası"nın Kiyev şəhər təşkilatı kanal haqqında Milli Şuraya şikayət etmiş, bundan sonra tənzimləyici qurum 11 may 2018-ci il tarixinə telekanalda plandankənar yoxlama təyin etmişdir.

Vətən Müdafiəçisi Günü

23 fevral tarixlərində, Ukrayna Milli Televiziya və Radio Şurasının qadağasına baxmayaraq, kanal mütəmadi olaraq SSRİ istehsalı olan hərbi mövzulu filmlər yayımlamışdır. Bu addım cəmiyyət tərəfindən Rusiyanın bayramı olan "Vətən müdafiəçisi günü"nün qeyd edilməsi kimi qiymətləndirilmişdir.

Rusdilli məzmun

2014-cü ildən etibarən "İnter" telekanalı rusdilli film və serialların nümayişinə görə kəskin tənqid olunur. "Rusiya kinosuna boykot" kampaniyası fəallarının monitorinq nəticələrinə görə, sentyabr ayında "İnter" Rusiya istehsalı olan məzmun nümayiş etdirən 10 əsas ümumukrayna kanalı arasında üçüncü yeri tutmuşdur. 8–14 sentyabr dövründə rusdilli məzmunun həcmi sutkada orta hesabla 11 saat 15 dəqiqə təşkil etmişdir. 27 sentyabr tarixinə olan məlumata görə, kanaldakı Rusiya məhsullarının payı artıq 67%-ə yüksəlmişdir.

Bundan əlavə, fəallar tərəfindən açıqlanan rəqəmlər göstərir ki, 27 sentyabr 2014-cü il tarixinə telekanaldakı ümumi rusdilli məzmunun payı təxminən 70% olmuşdur. Dekabrın 1-dən 7-dək aparılan monitorinq isə Rusiya mənşəli məzmunun sutkada 13 saat 15 dəqiqəyə qədər artdığını təsdiqləmişdir.

11 dekabr 2014-cü il tarixində fəallar "İnter"in Kiyevdəki baş ofisi qarşısında piket keçirmişlər. "Müdafiəçilərimizi Rusiya təbliğatı ilə öldürməyin!" adlı aksiya zamanı gənclər ofisin girişini Rusiya-Ukrayna müharibəsində həlak olmuş Ukrayna hərbçilərinin fotoşəkilləri ilə örtmüşlər. Etirazçılar qeyd etmişlər ki, "İnter" rusiyamənşəli məzmunun həcminə görə ölkədə 2-ci yeri tutur və bu filmlərdə Rusiya güc strukturlarının tərənnüm edilməsi müharibə şəraitində qəbuledilməzdir.

2015-ci ilin sentyabrında kanalın rəhbəri Anna Bezlyudnaya bildirmişdir ki, Rusiya serialları "oxşar mentalitet" səbəbindən ukraynalılar üçün lazımlıdır.

Vatniklər rusdilli dünyanı dəstəklədiyinə görə "İnter"ə təşəkkür edir. "Vidnis" hərəkatının troll kampaniyası. 2015-ci ilin avqustu.

26 avqust 2015-ci ildə "Rusiya kinosuna boykot" kampaniyası çərçivəsində kanalın ofisi önündə növbəti teatral etiraz aksiyası keçirilmişdir. Aksiya iştirakçıları "vatnik" obrazında çıxış edərək telekanala "rus ruhu" və Rusiya seriallarına görə "təşəkkür" etmiş, kanal əməkdaşları ilə əl görüşməyə çalışaraq onları ələ salmışlar. Onlar xüsusilə Ukraynanın Müstəqillik Günü ərəfəsində Taisiya Povaliyin iştirakı ilə yayımlanan konsertə görə "minnətdarlıqlarını" bildirmişdilər.

Filmlərin yayımı və nümayişi üzrə Ekspert Komissiyasının üzvü Serhiy Osnaçın sözlərinə görə, "İnter" Ukrayna məzmununun ən azı 50% olması barədə qanunvericilik normasını ("Televiziya və radio yayımı haqqında" qanunun 9-cu maddəsi) pozur. 2015-ci ilin dekabrında aparılan monitorinq zamanı kanalda ukraindilli məzmunun cəmi 17% olduğu müəyyən edilmişdir.

Kanal Rusiya istehsalı olan təbliğat xarakterli lentləri nümayiş etdirməyə davam etmiş, məsələn, 27 aprel 2017-ci ildə Rusiyanın "Bir vaxtlar Rostovda" filmi efirə verilmişdir.

Telekanal rusyönümlü və Ukrayna əleyhinə təbliğat aparmaqda, habelə ukraynadilli kvotalara və "ukrain dilinin dövlət dili kimi fəaliyyətinin təmin edilməsi haqqında" qanuna qarşı çıxaraq məzmunu ukrain dilində yayımlamaq istəməməkdə ittiham olunur.

Kanala təsir

2015-ci ilin may ayında "Xalq Cəbhəsi" partiyasının xalq deputatı Andrey Levus bəyan etmişdir ki, Ukrayna Ali Radasının Milli Təhlükəsizlik və Müdafiə məsələləri üzrə Komitəsi "İnter" telekanalının fəaliyyətini Ukraynanın milli təhlükəsizliyinə təhdid yaradan, ictimai vəziyyəti qeyri-sabitləşdirən və Rusiya təcavüzü üçün əlverişli fon yaradan fəaliyyət kimi tanımışdır. Komitə hüquq-mühafizə orqanlarına və müvafiq idarələrə müraciət və mövcud qanunvericiliyə uyğun olaraq kanalın destruktiv fəaliyyətinin dayandırılmasını tələb etmişdir, lakin Milli Televiziya və Radio Yayımı Şurası növbəti dəfə "İnter" telekanalının lisenziyasının uzadılmaması üçün heç bir əsasın olmadığını bəyan etmişdir.

Ukrayna Daxili İşlər Nazirliyinin (DİN) məlumatına görə, 2010–2011-ci illər ərzində "İnter" telekanalının təsisçiləri arasından olan naməlum şəxslər jurnalistlərin informasiya siyasətinə təsir göstərmişlər. Bu təsir telekanalın efirində yayımlanan məlumatların məzmununa nəzarət edilməsi formasında həyata keçirilmişdir.

Mülkiyyət dəyişikliyi

2015-ci ildə Ukraynanın daxili işlər naziri Arsen Avakov telekanalın səhmlərinin bir hissəsinin mənimsənilməsi işi üzrə araşdırmaya başlamışdır. DİN-in məlumatında qeyd olunur ki, 1997 və 1999-cu illərdə Ukrayna Dövlət Əmlak Fondunun naməlum vəzifəli şəxsləri öz xidməti mövqelərindən sui-istifadə edərək "İnter"in 20% səhminin qanunsuz olaraq özəl mülkiyyətə ötürülməsini həyata keçirmişdilər. Nəticədə dövlətə 800 milyon dollardan çox ziyan dəydiyi müəyyən edilmişdir.

Şusev küçəsindəki ofisə hücum

4 sentyabr 2016-cı il tarixində maskalı naməlum şəxslər etirazçıların kölgəsi altında telekanal üçün proqramlar hazırlayan "Milli İnformasiya Sistemləri" şirkətinin ofisinə hücum etmişdilər. Kamuflyaj geyimli iyirmiyə yaxın naməlum şəxs iki mütəşəkkil qrup halında ofisə daxil olmuşdur. Hücum edənlər ekranlara və texniki avadanlıqlara yandırıcı qarışıq tökərək onları yandırmış, qısa müddət sonra qonşu kabinetlər də alovlanmışdır. Hadisə nəticəsində 5 nəfər xəsarət almışdır. Kiyev Prokurorluğu işə əlavə olaraq "terror aktı" tövsifini daxil etmiş və işi araşdırılması üçün Ukrayna Təhlükəsizlik Xidmətinə (SBU) vermişdir.

Ukrayna Daxili İşlər naziri Avakov yanğına görə əsasən 30-cu briqadanın ehtiyatda olan hərbçilərini günahlandırmışdır, sonradan bu iddia hərbi birləşmənin rəsmi nümayəndələri tərəfindən təkzib edilmişdir. Daha sonra Avakov jurnalistlərin piar naminə redaksiyanı özlərinin yandırdığı ehtimalını irəli sürmüşdür. Telekanal özü yanğın nəticəsində dəyən zərərin 1 milyon dollar olduğunu qiymətləndirmişdir.

Yanğınla bağlı aparılan istintaq zamanı həmçinin "özünü yandırma" (provokasiya məqsədilə) versiyası da nəzərdən keçirilmişdir.

Haker hücumları

23 fevral 2023-cü il tarixində rusiyalı hakerlər telekanalın efirini və internet saytını, habelə Ukraynanın bir sıra digər dövlət müəssisələrinin saytlarını sındırmışdılar. Onlar "İnter"in efirində SSRİ dövlət himnini yayımlamış və "Vətən müdafiəçisi günü" münasibətilə təbriklər nümayiş etdirmişdilər.

9 may 2024-cü il tarixində rusiyalı hakerlər telekanalın və digər media qruplarının siqnallarını təkrarən sındıraraq, efirdə Moskvada keçirilən qələbə paradını yayımlamışdılar, lakin "Inter Media Group" kanalın efirinin sındırılmadığını, sadəcə interferensiya səbəbindən media qrupun telekanallarının yayımında 17 saniyəlik fasilə yarandığını və bundan sonra siqnalın dərhal bərpa edildiyini bildirmişdir.

Xarici keçidlər

• inter.ua
• www.podrobnosti.ua