Əkbər Yerevanlı

Vikipediya, azad ensiklopediya
Jump to navigation Jump to search
Əkbər Yerevanlı
Əkbər Yunis oğlu Süleymanov
Əkbər Yerevanlı.jpg
Doğum tarixi 17 iyun 1921(1921-06-17)
Doğum yeri
Vəfat tarixi 1981
Vəfat yeri
Dəfn yeri
Atası Yunis Nuri
Təhsili
Fəaliyyəti yazıçı, nasir, ədəbiyyatşünas
Üzvlüyü

Əkbər Yerevanlı (tam adı: Əkbər Yunis oğlu Süleymanov; 17 iyun 1921, İrəvan1981, İrəvan) — ədəbiyyatşünas, pedaqoq, nasir, dramaturq. Ermənistan SSR Yazıçılar İttifaqının Azərbaycan bölməsinin rəhbəri.[1]

Həyatı[redaktə | mənbəni redaktə et]

Əkbər Yunis oğlu Süleymanov 1921-ci il iyunun 17-də[2] İrəvan şəhərində anadan olmuşdur. Burada orta məktəbi bitirmiş, 1943-1948-ci illərdə İrəvan Dövlət Universitetinin Filologiya fakültəsinin Şərq şöbəsində təhsil almışdır. Əmək fəaliyyətinə 1938-ci ildə İrəvanda Azərbaycan dilində nəşr edilən "Kommunist" (1939-cu ildən "Sovet Ermənistanı") qəzetinin redaksiyasında başlamış, ədəbi işçi, məsul katib, tərcüməçi vəzifəsində işləmişdir. 1951-ci ildə Ermənistan EA M. Abeğyan adına Ədəbiyyat İnstitutunun aspiranturasna daxil olmuş, 1954-cü ildə "Azərbaycan-erməni ədəbi əlaqələri tarixindən" mövzusunda namizədlik dissertasiyası müdafiə etmişdir. 1950-1965-ci illərdə İrəvan Dövlət Universitetində Azərbaycan ədəbiyyatı müəllimi olmuş, 1956-cı ildən X. Abovyan adına İrəvan Pedaqoji İnstitutunda Azərbaycan dili və ədəbiyyatı kafedrasının müdiri işləmişdir. Erməni və Azərbaycan qarşılıqlı ədəbi əlaqələri sahəsində ardıcıl tədqiqat aparmış, bir sıra erməni yazıçılarının əsərlərini Azərbaycan dilinə tərcümə etmişdir. Onun erməni dilində "Erməni və Azərbaycan xalqlarının dostluğunun ədəbiyyatda inikası" (1955), "Cəlil Məmmədquluzadə və erməni xalqı" (1966), "Nəsimi" (1973), ""Xatabala" həftəlik jurnalı Azərbaycan haqqında" (1974) kitabları çap olunmuşdur.

Əkbər Yerevanlının "Azəri-erməni ədəbi əlaqələri. Qədim dövrdən XVIII əsrin sonuna qədər" mövzusunda doktorluq dissertasiyası 556 səhifə həcmində monoqrafiya şəklində 1968-ci ildə İrəvanda "Hayastan" nəşriyyatında çap olunsa da, ömrünün sonuna kimi onu müdafiə etməyə qoymamışdılar. Buna görə də 1975-ci ildə "Erməni-Azərbaycan ədəbi əlaqələri (Şifahi xalq yaradıcılığı, aşıq sənəti və XI—XVIII əsrlərin yazılı ədəbiyyatı)" adlı doktorluq dissertasiyasını Bakıda müdafiə etmişdir.

Əkbər Yerevanlının İrəvan şəhərində Azərbaycan dilində "Erməni-Azərbaycan şifahi xalq ədəbiyyatı əlaqələri" (1958), "Sabir və erməni xalqı" (1962), "Hovannes Tumanyan və Azərbaycan ədəbiyyatı" (1974), "Avetik İsahakyan və Azərbaycan ədəbiyyatı" (1975) tədqiqat əsərləri və bədii yaradıclıq nümunələri toplanmış bir neçə kitabı çap olunmuşdur. Əkbər Yerevanlının Sabir Rzayevlə birgə yazdıqları 166 səhifəlik illüstrasiyalı "Yunis Nuri" kitabı 1980-ci ildə Ermənistan Teatr Cəmiyyəti tərəfindən İrəvanda çap olunmuşdur.

Cəfakeş tədqiqatçı, nasir, dramaturq Əkbər Yerevanlı 1981-ci ildə İrəvan şəhərində vəfat etmiş, valideynlərinin yanında dəfn olunmuşdur.

Ailəsi[redaktə | mənbəni redaktə et]

Anası Səkinə, atası Yunis Süleymanovlardır. Əkbər Yerevanlının atası Yunis Nuri İrəvanda Azərbaycan teatrının banisi olmuş, 18 yaşından etibarən təqribən 50 il ərzində teatr kollektivinə rəhbərlik etmişdir. Yunis Nurinin oğlu Əziz Süleymanov 1967-1968-ci illərdə teatrın direktoru işləmişdir. 1988-cü ildən teatr bağlananadək Əkbər Yerevanlının oğlu Yunis Süleymanov İrəvan Dövlət Azərbaycan Dram Teatrının direktoru işləmişdir.

Əsərləri[redaktə | mənbəni redaktə et]

  1. Mənim günəşli ölkəm. Yerevan: Haypethrat, 1947, 120 səh.
  2. Հայ և ադրբեջանական ժողովուրդների բարեկամության արտացոլումը գրականության մեջ (Erməni və Azərbaycan xalqlarının dostluğunun ədəbiyyatda inikası). Yerevan: Haypetrat, 1955, 223 səh;
  3. Erməni-Azərbaycan şifahi xalq ədəbiyyatı əlaqələri. Yerevan: Haypetrat, 1958, 272 səh;
  4. Sabir və erməni xalqı. Yerevan, 1962, 45 səh;
  5. Gözəllik və səadət nəğmələri. Yerevan: Haypetrat, 1964. 246 səh;
  6. Azadə. Bakı: Azərnəşr, 1964, 48 səh;
  7. Ջալիլ Մամեդկուլիզադեն և հայ ժողովուրդը (Cəlil Məmmədquluzadə və erməni xalqı). Yerevan: Hayastan, 1966, 105 səh;
  8. Yay gecəsində. Bakı: Gənclik, 1967, 46 səh;
  9. Azəri-erməni ədəbi əlaqələri (Qədim dövrdən XVIII əsrin sonuna qədər). Yerevan: Hayastan, 1968, 556 səh;
  10. Նասիմի (Nəsimi). Yerevan: Hayastan, 1973, 56 səh;
  11. "Խաթաբալա" շաբաթաթերթը Ադրբեջանի մասին ("Xatabala" həftəlik jurnalı Azərbaycan haqqında). Yerevan: Hayastan, 1974, 40 səh[3];
  12. Hovannes Tumanyan və Azərbaycan ədəbiyyatı. Yerevan, 1974, 131 səh;
  13. Avetik İsahakyan və Azərbaycan ədəbiyyatı. Yerevan, 1975, 192 səh;
  14. Yunis Nuri. Yerevan: Ermənistan Teatr Cəmiyyəti, 1980, 166 səh. (həmmüəllif).

İstinadlar[redaktə | mənbəni redaktə et]

  1. Ələddin Allahverdiyev. "MÜƏLLİMLƏRİM HAQDA XATİRƏLƏR: QƏŞƏM ASLANOV". karabakhmedia.az (az.). karabakhmedia.az. 2016-10-05. 2016-10-05 tarixində arxivləşdirilib. İstifadə tarixi: 2016-10-05.
  2. Ermənistan Sovet Ensiklopediyası. III. 1977. səh. 581. (#parameter_ignored)
  3. "Arxivlənmiş surət". 2021-10-21 tarixində arxivləşdirilib. İstifadə tarixi: 2021-10-21.