Əlövsət Baxışov

Əlövsət Baxışov
Azərbaycan Kommunist Partiyası Gədəbəy Rayon Komitəsinin birinci katibi
1971 – 1979
Azərbaycan Kommunist Partiyası Masallı Rayon Komitəsinin birinci katibi
1965 – 1971
Azərbaycan Kommunist Partiyası Dəvəçi Rayon Komitəsinin birinci katibi
? – 1962
Quba Rayon Xalq Deputatları Soveti İcraiyəə Komitəsinin sədri
1953 – 1954
Şəxsi məlumatlar
Doğum tarixi	3 mart 1923(1923-03-03)
Doğum yeri	Amsar, Quba rayonu, Azərbaycan SSR, ZSFSR, SSRİ
Vəfat tarixi	3 iyun 2013(2013-06-03) (90 yaşında)
Dəfn yeri	Amsar
Partiya	Ümumittifaq Kommunist (bolşeviklər) Partiyası (1947–)
Təhsili	Azərbaycan Müəllimlər İnstitutu (–1952), Azərbaycan Dövlət Universitetinin Tarix fakültəsi (–1957), Bakı Ali Partiya Məktəbi (–1958), Azərbaycan Kənd Təsərrüfatı İnstitutu (–1978)
Fəaliyyəti	siyasətçi
Təltifləri

Əlövsət Məmmədşah oğlu Baxışov (3 mart 1923, Amsar, Quba rayonu – 3 iyun 2013) — tanınmış ictimai-siyasi xadim, Azərbaycan Respublikası Müharibə, Əmək və Silahlı Qüvvələr Veteranları Şurasının sədri, Azərbaycan Respublikası Prezidentinin fərdi təqaüdçüsü.

Həyatı

Əlövsət Baxışov 1923-cü il martın 3-də Quba rayonunun Amsar kəndində anadan olub. 1942-ci ildə orta məktəbi və müəllimlik kurslarını bitirdikdən sonra bir müddət Qubanın Xanəgah kənd məktəbində dərs deyib. O, 1943-cü ildə hərbi xidmətə çağırılıb, İkinci Dünya müharibəsindən sonra 1950-ci ilin mart ayınadək ordu sıralarında qulluq edib.

Əlövsət Baxışov 1952-ci ildə Müəllimlər İnstitutunun tarix fakültəsini, 1957-ci ildə Bakı Dövlət Universitetinin tarix fakültəsini, 1958-ci ildə Bakı Ali Partiya Məktəbini, 1978-ci ildə isə Azərbaycan Kənd Təsərrüfatı İnstitutunun aqronomluq fakültəsini bitirib. Ordudan tərxis olunduqdan sonra Əlövsət Baxışov 1950–1951-ci illərdə Azərbaycan Respublikasının Daxili İşlər Nazirliyi sistemində çalışıb. 1951–1952-ci illərdə Quba Rayon Komsomol Komitəsinin birinci katibi olub. Sonrakı dövrlərdə o, partiya və sovet orqanlarında müxtəlif vəzifələr tutub. 1952–1953-cü illərdə Quba Rayon Partiya Komitəsinin katibi, 1953–1954-cü illərdə Quba Rayon Xalq Deputatlar Soveti İcraiyyə Komitəsinin sədri, 1958–1959-cu illərdə Azərbaycan Kommunist Partiyası Mərkəzi Komitəsinin təlimatçısı və məsul təşkilatçısı olub. O, 1959–1979-cu illərdə Dəvəçi, Şamaxı, Masallı və Gədəbəydə Rayon Partiya Komitəsinin birinci katibi seçilib. 1979-cu ildən etibarən kənd təsərrüfatı sahəsində çalışmağa başlayan Əlövsət Baxışov 1992-ci ilədək Azərbaycan Respublikası Kənd Təsərrüfatı Nazirliyində baş idarə rəisi vəzifəsində işləyib.

1992-ci ildən etibarən Əlövsət Baxışov Azərbaycan Respublikası Veteranlar Şurası daxilində ayrı-ayrı vəzifələri tutmuş, o cümlədən daimi komissiya sədri, məsul katib və sədrin birinci müavini kimi çalışıb, 2008-ci ildə isə həmin təşkilatın IV qurultayında Şuranın sədri vəzifəsinə seçilib.

Əlövsət Baxışov dörd çağırış Azərbaycan SSR Ali Sovetinin deputatı olub.

Əlövsət Baxışov 2 dəfə "Lenin" ordeni və 14 medalla təltif edilib, "Şöhrət" ordeninə layiq görülüb.

Əlövsət Məmmədşah oğlu Baxışov 2013-cü il iyun ayının 3-də vəfat etmişdir.

Mənbə

• Әлөвсәт Мәммәдшаһ оғлу Бахышов // Азәрбајҹан ССР Али Советинин депутатлары. Доггузунҹу чағырыш. Бакы: Азәрбајҹан Дөвләт Нәшријјаты. 1976. С. 53.