Əlihüseyn Hüseynov (həkim)

Əlihüseyn Hüseynov
Azərbaycan SSR səhiyyə naziri
18 aprel 1953 – 27 may 1954
Əvvəlki	Mahmud Əliyev
Sonrakı	Vəli Axundov
Şəxsi məlumatlar
Doğum tarixi	11 may 1903(1903-05-11)
Doğum yeri	Bakı, Bakı quberniyası, Rusiya imperiyası
Vəfat tarixi	1982(1982) (78–79 yaşında)
Partiya	Sovet İttifaqı Kommunist Partiyası
Təhsili	Azərbaycan Dövlət Tibb İnstitutu (–1939)
Fəaliyyəti	həkim, siyasətçi
Təltifləri

Əlihüseyn Ağahüseyn oğlu Hüseynov (11 may 1903, Bakı – 1982) — Azərbaycan həkimi və səhiyyə təşkilatçısı, Azərbaycan SSR səhiyyə naziri (1953–1954).

Həyatı

Əlihüseyn Ağahüseyn oğlu Hüseynov 1903-cü ildə dülgər ailəsində anadan olmuşdur. Əmək fəaliyyətinə 14 yaşında olarkən "Şteyner" mətbəəsində mürəttib köməkçisi olaraq başlamış, bir il sonra həmin iş üzrə "Qızıl şərq" mətbəəsinə keçərək 1925-ci ilədək orada işləmişdir. Mətbəədə işləməklə yanaşı, 1923-cü ildən işçi fakültəsində təhsil almış, 1927-ci ildə buranı bitirmişdir.

Əlihüseyn Hüseynov "Azərnəşr"də redaksiya şöbəsinin katibi, direktorun redaksiya işləri üzrə müavini, 1937–1938-ci illərdə direktoru olmuşdur. Həmin illərdə təhsilini davam etdirmiş, 1939-cu ildə Azərbaycan Dövlət Tibb İnstitutunu bitirmişdir. 1938–1941-ci illərdə "Kommunist" qəzetinin məsul katibi vəzifəsində işləmişdir. Böyük Vətən müharibəsi illərində Lənkəran hərbi hospitalının rəisi olmuş, 1946-cı ildə tibb xidməti kapitanı rütbəsində Bakıya qayıdaraq Azərbaycan SSR Səhiyyə Nazirliyinin Elmi-Tədqiqat Kurortologiya və Fiziki Üsullarla Müalicə İnstitutuna direktor təyin edilmişdir.

Əlihüseyn Hüseynov 1951-ci ilin aprel ayında Azərbaycan SSR səhiyyə nazirinin müavini, 1953-cü ilin aprel ayından 1954-cü ilin may ayınadək is səhiyyə naziri vəzifələrində işləmişdir. 1954-cü ildə yenidən Elmi-Tədqiqat Kurortologiya və Fiziki Üsullarla Müalicə İnstitutuna direktoru təyin edilmiş və 1979-cu ilədək bu müəssisəyə rəhbərlik etmişdir.

Əlihüseyn Hüseynov 1982-ci ildə vəfat etmişdir.

Əsərləri

• İlk yardım. Bakı: Uşaqgəncnəşr, 1958.
• Təbii və fiziki amillərin sağlamlığa təsiri. Bakı: Uşaqgəncnəşr, 1959.
• Ümumi fizioterapiya. Bakı: Azərnəşr, 1959.
• Uroloji xəstəliklər. Bakı: Uşaqgəncnəşr, 1960.
• Oblitere olunan endartriit və onunla mübarizə. Bakı: Azərnəşr, 1961.
• Vaxtından əvvəl qocalmaya qarşı mübarizə. Bakı: Uşaqgəncnəşr, 1961.
• Günəş və sağlamlıq. Bakı, 1962.
• Podaqra haqqında nəyi bilmək olar. Bakı, 1963.
• Tromboflebitlər və onların müalicəsi. Bakı: Azərnəşr, 1963.
• Faydalı mədən suları və onların müalicəvi əhəmiyyəti. Bakı, 1964.
• İstirahətdən səmərəli istifadə etməli. Bakı, 1964.
• Piylənmə və ona qarşı mübarizə tədbirləri. Bakı, 1964.
• Məişət-meşə sağlamlığına faydalı təsir. Bakı, 1965.
• Daxili xəstəliklərin fiziki üsullarla müalicəsi. Bakı: Azərnəşr, 1966.
• Ümumi fizioterapiya. Bakı: Maarif, 1966.
• Xüsusi fizioterapiya. Bakı: Maarif, 1968.
• Qan dövranının müasir aspekti. Bakı: Azərnəşr, 1969.

Xarici keçidlər

• "Гусейнов Али-Гусейн Ага-Гусейн оглы" (rus). Память народа. İstifadə tarixi: 3 noyabr 2025.