Kərim Məmmədov (pedaqoq)

Kərim Məmmədov
Kərim Alı oğlu Məmmədov
Doğum tarixi	13 iyun 1937
Doğum yeri	Gürcüstan, Bolnisi, Aşağı Güləver
Elm sahəsi	Pedaqoq
Elmi dərəcəsi	Pedaqogika üzrə elmlər doktoru
Elmi adı	Professor
İş yeri	Bakı Slavyan Universiteti
Mükafatları	"Tərəqqi" medalı

Kərim Alı oğlu Məmmədov — Pedaqogika üzrə elmlər doktoru, professor.

Həyatı və təhsili

Kərim Alı oğlu Məmmədov 13 iyun 1937-ci ildə Gürcüstanın Bolnisi rayonunun Aşağı Güləver kəndində anadan olub. İcbari təhsilini Aşağı Güləver kənd 8 illik məktəbində, orta təhsilini isə Darbaz kənd orta məktəbində alıb. Uşaq vaxtlarından humanitar elmlərə daha çox maraq göstərib. Poeziyaya və elmi ədəbiyyata marağı onda sevimli müəllimi Hacı İbrahim Məmmədoğlu yaradıb.

Orta məktəbi bitirdikdən sonra sənədlərini 1958-ci ildə M. F. Axundov adına Rus dili və Ədəbiyyatı İnstitutuna (indiki Bakı Slavyan Universiteti) vermiş, yüksək nəticə ilə qəbul olunmuş və 1963-cü ildə ali təhsilini müvəffəqiyyətlə başa vurmuşdur.

Ailəlidir. 2 övladı, 3 nəvəsi, 2 nəticəsi var.

Əmək və elmi fəaliyyəti

1963-cü ildə doğma kəndinə rus dili və ədəbiyyatı müəllimi olaraq təyin edilmişdir. Təhslidə və ictimai işlərdə fəallığına görə 1964-cü ildə qonşu Babakişilər kəndində təzə açılmış 8 illik məktəbə direktor təyin olunmuşdur. Eyni vaxtda mətbuatda elmi məqalələrlə çıxış etmişdir. Elmə həvəsi onu 1968-ci ildə bitirdiyi ali məktəbin pedaqoqika kafedrasına gətirmiş və orada professor vəzifəsinə qədər yüksəlmişdir. Bakı Slavyan Universiteti ilə yanaşı müxtəlif illərdə Odlar Yurdu Universiteti və Milli Aviasiya Akademiyasının dəvəti ilə həmin təhsil ocaqlarında da çalışmışdır. 1980-ci ildə elmlər namizədi dissertasiyasını, 2008-ci ildə doktorluq dissertasiyasını uğurla müdafiə etmiş və pedaqogika üzrə elmlər doktoru elmi dərəcəsini almışdır. Hal-hazırda əmək fəaliyyətini Bakı Slavyan Universitetində davam etdirir.

Əmək fəaliyyəti dövründə onlarla magistr və doktorluq dissertasiyalarının yerinə yetirilməsinə rəhbərlik etmişdir.

Rus dilində 2, Azərbaycan dilində isə 4 elmi monoqrafiyanın ("Şərq xalqlarının fikir tarixindən"(2011), "Türk xalqlarının pedaqoji tarixindən nümunələr"(2017), "Elmi-tədqiqat işlərinin metodikası"(2019), "Müstəqillik dövrümüzün pedaqoji problemləri"(2020)), 100-dən çox elmi, onlarla publisistik məqalənin müəllifidir. "Şərq xalqlarının fikir tarixindən" elmi əsəri 2014-cü idlə Türkiyədə Anadolu türkcəsinə çevrilmişdir.

Bədii yaradıcılığı

Elmi fəaliyyətlə yanaşı bədii yaradıcılıqla da məşğul olmuş, şeirləri Azərbaycan və Gürcüstan mətbuatında çap edilmişdir. 2024-cü ildə "Qu quşu nəğmələri" şeirlər toplusu işıq üzü görmüşdür.

Mükafatları

Təhsil sahəsində səmərəli fəaliyyətinə görə çalışdığı ali məktəbin fəxri fərmanları ilə təltif olunmuş, 2016-cı ildə isə Azərbaycan Respublikasının Prezidenti cənab İlham Əliyevin sərəncamı ilə "Tərəqqi" medalına layiq görülmüşdür.