Ağaəmi Heybətov

Ağaəmi Heybətov
Şəxsi məlumatlar
Doğum tarixi	6 iyun 1993
Doğum yeri	Bakı, Azərbaycan
Vəfat tarixi	16 oktyabr 2020 (27 yaşında)
Vəfat yeri	Goranboy, Azərbaycan
Vətəndaşlığı	Azərbaycan
Hərbi fəaliyyəti
Mənsubiyyəti	Azərbaycan Ordusu
Qoşun növü	Quru Qoşunları
Xidmət illəri	2015—2016 / 2020
Rütbə	Əsgər
Döyüşlər	Aprel döyüşləri Vətən müharibəsi  • Murovdağ döyüşləri
Təltifləri

Ağaəmi Elçin oğlu Heybətov (6 iyun 1993; Bakı, Azərbaycan — 16 oktyabr 2020; Goranboy, Azərbaycan) — Azərbaycan Silahlı Qüvvələrinin əsgəri, Vətən müharibəsinin şəhidi.

Həyatı

Ağaəmi Heybətov 1993-cü il iyunun 6-da Buzovna qəsəbəsində anadan olub. 2000-2011-ci illərdə Buzovna qəsəbəsində Ə. Əliyev adına 125 nömrəli tam orta məktəbdə təhsil alıb. 2002-2007-ci illərdə isə Buzovna qəsəbəsində 4 saylı Uşaq İncəsənət Məktəbində musiqi təhsili alıb. Ali təhsilini 2011-2015-ci illərdə Azərbaycan Dövlət İqtisad Universitetinin (UNEC) "Turizm və otelçilik" fakültəsində alıb. Subay idi.

Hərbi xidməti

Ağaəmi Heybətov 2015-2016-cı illərdə Azərbaycan Silahlı Qüvvələrinin Gəncə şəhərində yerləşən "N" saylı hərbi hissəsində müddətli həqiqi hərbi xidmətdə olub. 2016-cı ilin 2-5 aprelində baş verən döyüşlərdə savaşıb.

Azərbaycan Ordusunun əsgəri olan Ağaəmi Heybətov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Murovdağ istiqamətində gedən döyüşlərdə savaşıb. Ağaəmi Heybətov oktyabrın 16-da Goranboy rayonu istiqamətində şəhid olub. Xəzər rayonunun Buzovna qəsəbəsində dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Ağaəmi Heybətov ölümündən sonra "Vətən uğrunda" medalı ilə təltif edildi.

Təltifləri

• (15.12.2020) — "Vətən uğrunda" medalı (ölümündən sonra)