Ann-Mari David
| Ann-Mari David | |
|---|---|
| fr. Anne-Marie David | |
 | |
| Ümumi məlumatlar | |
| Doğum tarixi | 23 may 1952 (74 yaş) |
| Doğum yeri | |
| Musiqiçi məlumatları | |
| Fəaliyyəti | müğənni |
| Fəaliyyət illəri | 1970-ci ildən |
| Janr | pop musiqisi |
| Albom şirkəti | Epic Records |
 Vikianbarda əlaqəli mediafayllar | |
An-Mari David (fr. Anne-Marie David; 23 may 1952, Kasablanka[1]) — Fransa müğənnisi, 1973-cü il Avroviziya Mahnı Müsabiqəsinin qalibi.
Karyerası
[redaktə | vikimətni redaktə et]David Mərakeşdə Fransa protektoratlığı dönəmində Kasablankada anadan olmuşdur. O Strasburqda böyümüşdür. Orta məktəb illərində ailəsi ilə birlikdə Arl şəhərinə köçmüşdür. Musiqi karyerasına 18 yaşında, Parisdə musiqili teatr tamaşalarında iştirak etməklə başlamışdır. Musiqi karyerasına "İsa Məsih superulduzdur" müziklinin fransız versiyasında Mariya Maqdalena rolu ilə başlamışdır.[2]
1972-ci ildə Avroviziya Mahnı Müsabiqəsinin Fransa üzrə milli seçim turunda iştirak etmişdir, lakin mərhələni keçə bilməmişdir. Lüksemburqu təmsil etmiş, "Tu te reconnaîtras" kompozisiyası ilə 1973-cü il Avroviziya Mahnı Müsabiqəsinin qalibi olmuşdur. Müsabiqədəki qələbəsindən sonra Türkiyədə yaşamış, orada bir albom yazdırmış və bir neçə musiqi mükafatına layiq görülmüşdür.[3]
1979-cu ildə yenidən Avroviziya Mahnı Müsabiqəsində iştirak etmiş, bu dəfə Fransanı "Je suis l'enfant soleil" mahnısı ilə təmsil edərək 3-cü yeri tutmuşdur.[4] Beləliklə, o, "Avroviziya"da iki fərqli dövləti təmsil edən azsaylı ifaçılar sırasına daxil olmuşdur.[5]
1982–1983-cü illərdə musiqi karyerasını Norveçdə davam etdirmişdir, lakin sonradan səhnəni tərk edərək, Fransa kəndlərinin birində tənha həyat tərzi keçirməyi üstün tutmuşdur. Səhnəyə yenidən 2005-ci ildə, Avroviziya Müsabiqəsinin 50 illiyinə həsr olunmuş "Congratulations" adlı teleşou zamanı qayıtmışdır. Almaniyalı pop ifaçısı Meyv O'Rik ilə birlikdə 2015-ci ilin sonlarında "International" adlı geri dönüş sinqlını buraxmışdır. Həmin kompozisiya "Song Contest Consulting" tərəfindən 2016-cı il Avroviziya Mahnı Müsabiqəsində Avstriya, Almaniya və San-Marinonun namizədliyi üçün tövsiyə edilmişdir.[6][7]
2017-ci ildə Avstriyada təsadüfi bir görüşdən sonra An-Mari David Saffolk qraflığının Beri-Sent-Edmunds şəhərinə səfər etmiş və "eXplore Bury St Edmunds" layihəsinin təsisçisi Ceyms Şinin vasitəsilə ingilislərin ilk himayədar müqəddəsi sayılan Kral Edmundun hekayəsi ilə tanış olmuşdur. Kral Edmundun rəvayəti onun böyük marağına səbəb olmuş, nəticədə o, bəstəkar Jan Müzi ilə birlikdə bu müqəddəs kralın əfsanəsinə əsaslanan musiqili oratoriya üzərində işləməyə başlamışdır. Sözügedən oratoriya ilkin olaraq Fransanın Bulon-sür-Mer, daha sonra isə Ambuaz şəhərlərində ifa edilmişdir. COVID-19 pandemiyası dövrünün karantin məhdudiyyətləri səbəbindən yaranan fasilədən sonra, 2023-cü ildə işlər yenidən bərpa olunmuş və sürətləndirilmişdir. Bu çərçivədə oratoriyanın tam ingilisdilli versiyasının müqəddəsin doğma şəhərində yerləşən Müqəddəs Məryəm kilsəsində, 2024-cü il noyabr ayında təqdim olunması planlaşdırılmışdır.
İstinadlar
[redaktə | vikimətni redaktə et]- 1 2 Deutsche Nationalbibliothek Record #1059651904 // Gemeinsame Normdatei (alm.). 2012—2016.
- ↑ "#0317 L'aventure de la vie - Mit Anne Marie David". Merci Cherie Podcast. 9 iyun 2021 tarixində arxivləşdirilib. İstifadə tarixi: 9 iyun 2021.
- ↑ "Anne-Marie David – Tu Te Reconnaîtras (Luxembourg 1973)". Eurovision Song Contest. 30 iyul 2016 tarixində arxivləşdirilib. İstifadə tarixi: 15 may 2016.
- ↑ "Eurovision Song Contest 1979". Eurovision Song Contest. 28 iyul 2012 tarixində arxivləşdirilib. İstifadə tarixi: 15 may 2016.
- ↑ "Jerusalem 1979". eurovision.tv (ingilis). 1 avqust 2017 tarixində arxivləşdirilib. İstifadə tarixi: 30 mart 2023.
- ↑ Môrea, Mario. "ESC-Comeback für Anne Marie David 2016?". VIENNA 12 POINTS! (alman). 27 noyabr 2015. 20 fevral 2016 tarixində arxivləşdirilib. İstifadə tarixi: 30 mart 2023.
- ↑ Die Traumsieberei. "ESC-Comeback für Anne Marie David 2016?". 27 noyabr 2015. 20 fevral 2016 tarixində arxivləşdirilib. İstifadə tarixi: 15 may 2016.