Atəşgah İntellektual Oyunlar Klubu

Vikipediya, açıq ensiklopediya
Keçid et: naviqasiya, axtar

"Atəşgah İntellektual Oyunlar Klubu" İctimai Birliyi — bilicilərin ictimai yaradıcılıq təşkilatı.

"Atəşgah İntellektual Oyunlar Klubu" SSRİ dövründə yaranmış və müasir dövrdə də fəaliyətini davam etdirən azsaylı qeyri-hökumət təşkilatlarından biri olmaqla yanaşı, fəaliyyətinin əsas səciyyəvi cəhəti intellektual oyunlar sahəsində peşəkar fəaliyyət göstərən öncül ictimai qurum olmasıdır.

1989-cu ildə yaradılmış Klub nəinki Azərbaycanda, həm də "Nə? Harada? Nə zaman?" oyununun sevildiyi bütün ölkələrdə intellektual oyunlar hərəkatının kütləviləşməsinin, yayılmasının bünövrəsində durur. 1989-cu ildə "Nə? Harada? Nə zaman?" Klublarının Beynəlxalq Assosiasiyasının Mariupol şəhərində keçirilmiş beynəlxalq təsis konqresində iştirak edən "Atəşgah" Klubu hal-hazırda intellektual oyunlar hərəkatının əlaqələndirilməsində mühüm rolu olan bu təşkilatın fəal tərəfdaşı və Azərbaycanda üzvüdür.

"Atəşgah" Klubunun fəaliyyətinin məqsədi Azərbaycan Respublikasında bütün növ intellektual oyunların inkişafına kömək etməkdən ibarətdir. Klubda oyunlar rus dilində keçirilir.

Fəaliyyətinin peşəkar səviyyədə həyata keçirilməsi Birliyə imkan vermişdir ki, o mövcudluğunun bütün dövrü ərzində "Nə? Harada? Nə zaman?" Klublarının Beynəlxalq Assosiasiyası, Azərbaycan Respublikası Gənclər və İdman Nazirliyi, Azərbaycan Respublikası Gənclər Təşkilatları Milli Şurası, Azərbaycan Respublikası Prezidenti yanında Qeyri-hökumət Təşkilatlarına Dövlət Dəstəyi Şurası və bir sıra kommersiya qurumları ilə sıx əməkdaşlıq etsin. Məhz bu əməkdaşlığın nəticəsində intellektual oyunlar üzrə ən yüksək miqyaslı beynəlxalq (I, II və III Dünya Çempionatları, I, II və III Millətlər Kuboku) və yerli (Azərbaycan Çempionatları) tədbirlər uğurla təşkil edilmişdir.

Hal-hazırda Birlikdə onlarla peşəkar komandadan ibarət əsas liqa və məktəb liqası fəaliyyət göstərir. "Atəşgah" Klubu hər il "Nə? Harada? Nə zaman?", "Breyn-Rinq", "Fərdi Oyun" və "Erudit Kvartet" intellektual oyunları üzrə müxtəlif turnirlər təşkil edir. Bunların sırasında "Nə? Harada? Nə zaman?" və "Breyn-Rinq" intellektual oyunları üzrə Azərbaycan Çempionatları xüsusilə fərqlənir. "Atəşgah" Klubunun üzvləri Azərbaycan miqyasında həyata keçirilən intellektual layihələrdən kənarda qalmırlar.

"Atəşgah" Klubu intellektual oyunlar hərəkatı sahəsində həyata keçirilən mühüm beynəlxalq layihələrin reallaşdırılmasında da daim iştirak edir. "Nə? Harada? Nə zaman?" intellektual oyunu üzrə Dünya Çempionatları və Millətlər Kuboku kimi turnirlərin təşkilində mütamadi olaraq yaxından iştirak edən "Atəşgah" Klubu eyni zamanda "Nə? Harada? Nə zaman?" Klublarının Beynəlxalq Assosiasiyasının egidası altında keçirilən müxtəlif sinxron turnirlərin hər il Azərbaycanda oynanılmasını təşkil edir. Ölkəmizin beynəlxalq imicinin formalaşdırılmasında "Atəşgah" Klubunun komandalarının böyük əməyi vardır. Belə ki məhz "Atəşgah" Klubunun komandaları ölkəmizi müxtəlif beynəlxalq turnirlərdə - "Nə? Harada? Nə zaman?" intellektual oyunu üzrə Dünya Çempionatlarında, Millətlər Kubokunda, Dünya Kubokunun Mərhələlərində, Cənubi Qafqaz Çempionatında və digər rəsmi turnirlərdə daim uğurla təmsil etmişlər. Klubun komandaları (Balakişi Qasımovun, Anar Əzimovun, Anar Nəcəflinin, Faiq Hüseynovun komandaları) dəfələrlə Cənubi Qafqaz Çempionatında qalib gəlmiş, Balakişi Qasımovun kapitanı olduğu bilicilər komandası isə yüksək nəticə göstərərək 2004-cü ildə keçirilən III Dünya Çempionatının qalibi olmuşdur. Klubun ən məşhur yetirməsi Rövşən Əsgərov isə Rusiyanın birinci kanalı ilə yayımlanan "Nə? Harada? Nə zaman?" Elitar Klubunda gözəl oyun göstərməklə ölkəmizin müsbət imicinin formalaşdırılmasında mühüm rol oynayır. Son dövrlərdə Balakişi Qasımov və Adnan Axundov da Rusiyanın birinci kanalı ilə yayımlanan "Nə? Harada? Nə zaman?" Elitar Klubunda müvəffəqiyyətlə ölkəmizi və klubu təmsil edirlər.

"Atəşgah" Klubunun intellektual oyunlar sahəsində silsilə nailiyyətləri sırasında Birliyin "İlin ən yaxşı klubu" nominasiyasında və "Atəşgah" Klubunun təşkilatçılarından biri olduğu "Millətlər Kuboku"nun "İlin ən yaxşı turniri" nominasiyasında "Nə? Harada? Nə zaman?" Klublarının Beynəlxalq Assosiasiyasının "Büllur bayquş" mükafatına layiq görülməsini qeyd etmək olar.

Həmçinin bax[redaktə | əsas redaktə]