Azərbaycan Mədəniyyət Mərkəzi (Daşkənd)
| Azərbaycan Respublikasının Özbəkistan Respublikasındakı Səfirliyinin nəzdindəki Heydər Əliyev adına Azərbaycan Mədəniyyət Mərkəzi AMM | |
|---|---|
| Növü | Mədəniyyət Mərkəzi |
| Yaranma tarixi | 27 sentyabr 2010 |
| Mərkəzi |
 Özbəkistan, Daşkənd şəhəri, Mirabad rayonu, Heydər Əliyev küç., 9 |
| Sədr | Samir Abbasov |
| azculture.uz | |
Azərbaycan Respublikasının Özbəkistan Respublikasındakı Səfirliyinin nəzdindəki Heydər Əliyev adına Azərbaycan Mədəniyyət Mərkəzi — Özbəkistan Respublikasının paytaxtı Daşkənd şəhərinin Mirabad rayonunun mərkəzindəki Heydər Əliyev küçəsi 9 ünvanında yerləşən Mədəniyyət təşkilatı. Qeyd edək ki, Daşkənddə Azərbaycanın Özbəkistandakı Səfirliyinin nəzdində Heydər Əliyev adına Mədəniyyət Mərkəzinin binasının əsaslı təmir və bərpadan sonra (2010-cu il) açılışında Azərbaycan Respublikasının Prezidenti İlham Əliyev və Özbəkistanın Baş naziri Şavkat Mirziyayev iştirak etmişlər. Bina ilə tanışlıq zamanı məlumat verildi ki, azərbaycanlıların yığcam yaşadıqları Daşkəndin Mirabad rayonunun mərkəzindəki Heydər Əliyev küçəsində yerləşən mərkəzdə Heydər Əliyev, Azərbaycanın dövlətçilik tarixi, Azərbaycan və Özbəkistanın müştərək tarixi muzeyləri fəaliyyət göstərir.
Azərbaycan Mədəniyyət Mərkəzinin direktoru Samir Abbasovdur[1]. Samir Abbasov 1998-ci ildə Bakı Dövlət Universitetinin Kitabxanaşünaslıq-İnformasiya fakültəsinə daxil olmuş, 2002-ci ildə sözügedən fakültədə Biblioqrafiyaşünaslıq ixtisası üzrə magistratura təhsili almışdır. 2006-cı ildən Azərbaycan Milli Elmlər Akademiyasında "XXI əsrdə Azərbaycan kitabxanalarının aftomatlaşdırılması problemləri" mövzusu üzrə disertantı olmuşdur. Əmək fəaliyyətinə Cəfər Cabbarlı adına Respublika Gənclər Kitabxanasında - kitabxanaçı, biblioqraf, Azərbaycan Respublikasının Prezidentinin İşlər İdarəsinin Prezident Kitabxanasının Elmi İnformasiya şöbəsində - mütəxəssis, aparıcı mütəxəssis, Azərbaycan Respublikasının Mədəniyyət və Turizm Nazirliyinin Mədəniyyət Siyasəti şöbəsində və Nəşriyyat, reklamın təşkili, informasiya şöbəsində məsləhətçi vəzifələrində çalışmışdır. 2013-cü ilin fevral ayından Özbəkistan Respublikasındakı Azərbaycan Səfirliyinin nəzdnindəki Heydər Əliyev adına Mədəniyyət Mərkəzinin direktoru vəzifəsinə təyin edilmişdir. S.Abbasov həmçinin Azərbaycan Səfirliyinin mədəniyyət, turizm, təhsil və diaspora məsələləri üzrə attaşesidir.
Tarixi[redaktə | mənbəni redaktə et]
27 sentyabr 2010-cu ildə mərkəzin binasının əsaslı təmir və bərpadan sonra açılışı olmuşdur.[2] Açılış mərasimində Azərbaycan Respublikasının Prezidenti İlham Əliyev və Özbəkistanın Baş naziri Şavkat Mirziyayev iştirak etmişlər.[2] 2013-cü ilin fevral ayından Özbəkistan Respublikasındakı Azərbaycan Səfirliyinin nəzdnindəki Heydər Əliyev adına Mədəniyyət Mərkəzinin direktoru vəzifəsinə təyinat olmuş və bundan sonra Mərkəz rəsmi fəaliyyətə başlamışdır.
Heydər Əliyevin abidəsi[redaktə | mənbəni redaktə et]
2010-cu il 27 sentyabr tarixində Azərbaycan Prezidenti İlham Əliyevin Özbəkistana səfəri zamanı Daşkənddə azərbaycanlıların kompakt yaşadığı Mirabad rayonunda ulu öndərin adını daşıyan Azərbaycan Mədəniyyət Mərkəzinin binasının qarşısında onun büstünün açılışı olmuş, buradakı küçəyə Heydər Əliyevin adı verilmişdir. 2015-ci ilin 12 dekabr tarixində Heydər Əliyevin anım günündə Daşkənddə Mirabad rayonunda Heydər Əliyev küçəsində, ulu öndərin adını daşıyan Mədəniyyət Mərkəzinin qarşısında onun xatirə löhvəsi qoyulmuşdur.[2]
Muzeyləri[redaktə | mənbəni redaktə et]
Mərkəzdə aşağıdakı muzeylər fəaliyyət göstərir[2]:
- Heydər Əliyev muzeyi;
- Azərbaycanın dövlətçilik və tarixi muzeyi;
- Azərbaycan və Özbəkistan Dostluq muzeyi.
2013-cü ilin may ayından Mədəniyyət Mərkəzində xarici ölkələrdə fəaliyyət göstərən Azərbaycan mədəniyyət mərkəzləri arasında ilk dəfə olaraq "Azərbaycan dili kursları" fəaliyyət göstərir. Maraqlananlar, şagirdlər və tələbələr Mərkəzdə Azərbaycan dilini öyrənirlər. Mütəmadi olaraq kursun iştirakçıları arasında Azərbaycan dili ilə bağlı həvəsləndirici müsabiqələr keçirilir, qaliblər mükafatlandırılır. Fəaliyyətə başladığı dövrdən 100-dən çox şəxs Azərbaycan dili kursunun proqramına yiyələnmişlər. Heydər Əliyev adına Mədəniyyət Mərkəzinin layihəsi ilə 2014-cü ildə Azərbaycan dilinin təbliği və öyrənilməsi məqsədi ilə “Azərbaycan-Özbək, Özbək-Azərbaycan danışıq kitabı nəşr olunmuşdur. Hazırda Mədəniyyət Mərkəzi tərəfindən “Azərbaycan-Özbək, Özbək-Azərbaycan lüğəti”nin hazırlanması işinə başlanılmışdır.
Mərkəzin nəzdində KİTABXANA da yaradılmışdır.[2] Kitabxana həm Mərkəzdə fəaliyyət göstərən dərnək və kursların iştirakçılarına, həm də Daşkənddəki azərbaycanlı və özbək oxucularına xidmət göstərir. Kitabxananın çox zəngin azərbaycan, rus və özbək dillərində fondu vardır. Fond əsasən Azərbaycandan alınan kitablarla zənginləşdirilir. Bundan başqa, Azərbaycan Səfirliyinə, Mədəniyyət Mərkəzinə hədiyyə olunan kitablar da kitabxananın fonduna daxil edilir. Kitabxananın ümumi kitab fondu 4 min nüsxədən artıqdır. Artıq kitabxanada Azərbaycan bədii filmlərinin tam kolleksiyası, ölkəmizin tarixi, iqtisadiyyatı, mədəniyyəti, turizmi, adət və ənənələrinə dair sənədli filmlərdən ibarət Mediateka fondu yaradılmışdır.
2015-ci ildə Özbəkistandakı Heydər Əliyev adına Mədəniyyət Mərkəzinin təşkilatçılığı ilə Özbəkistan kitabxanalarına Azərbaycan, onun tarixi, iqtisadiyyatı, mədəniyyəti, turizmi, ədəbiyyatı, dövlətçiliyi, Heydər Əliyev, prezident İlham Əliyev, Heydər Əliyev Fondu tərəfindən həyata keçirilən layihələr, Ermənistan-Azərbaycan, Dağlıq Qarabağ münaqişəsi, Xocalı faciəsi, ermənilərin saxtalaşdırma siyasətinə dair kitablar, jurnallar, bukletlər hədiyyə edilmişdir. Belə ki, Ə.Nəvai adına Özbəkistan Milli Kitabxanasına, Özbəkistan Milli Elmlər Akademiyasının Mərkəzi Əsaslı Kitabxanasına, Nizami adına Daşkənd Dövlət Pedaqoji Universitetinin kitabxanasına zəngin kitab kolleksiyası əvəzsiz olaraq verilmiş, Səmərqənddə keçirilmiş Azərbaycan mədəniyyətinə həsr olunmuş tədbirlər çərçivəsində Puşkin adına Səmərqənd Vilayət Mərkəzi Kitabxanasında "Azərbaycan fondu yaradılmışdır. Səmərqənd şəhər Mərkəzi Muzeyi, habelə Afrosiab Dövlət Tarix Muzeyində daimi olaraq nümayiş etdirələcək "Odlar yurdu - Azərbaycan" guşəsi təşkil olunmuşdur.
Həmçinin bax[redaktə | mənbəni redaktə et]
- Özbəkistan Respublikasındakı Heydər Əliyev adına Azərbaycan Mədəniyyət Mərkəzi (ətraflı)
- Azərbaycanın Özbəkistan Respublikasındakı Səfirliyi Arxivləşdirilib 2016-01-10 at the Wayback Machine
- Azərbaycan–Özbəkistan əlaqələri, mədəni-ədəbi əlaqələr
- Özbəkistanda Azərbaycan Diaspora Təşkilatı Arxivləşdirilib 2016-03-06 at the Wayback Machine
- Özbəkistan azərbaycanlıları
- İki ölkə arasında humanitar sahədə son zamanlar həyata keçirilən layihələr
- Heydər Əliyev adına Azərbaycan Mədəniyyət Mərkəzinin layihəsi ilə Özbək mətbuatında verilmiş məqalələr
İstinadlar[redaktə | mənbəni redaktə et]
- ↑ Mərkəzin strukturu Arxivləşdirilib 2021-11-12 at the Wayback Machine. azculture.uz (az.)
- ↑ 2,0 2,1 2,2 2,3 2,4 Daşkənddə ulu öndər Heydər Əliyev adına Azərbaycan mədəniyyəti mərkəzinin açılışı olmuşdur Arxivləşdirilib 2016-03-05 at the Wayback Machine. president.az, 27.09.2010 (az.)
Xarici keçidlər[redaktə | mənbəni redaktə et]
- azculture.uz — Azərbaycan Mədəniyyət Mərkəzinin rəsmi saytı