Azərbaycan Respublikası Prezident seçkiləri (1993)

Azərbaycanın üçüncü prezidenti Heydər Əliyev

1993-cü il Azərbaycan Respublikası prezidenti seçkiləri - Azərbaycan Respublikası Prezidenti postuna keçirilən 3-cü rəsmi seçkilərdir. Seçkilər 3 oktyabr 1993-cü ildə keçirilib. Əbülfəz Elçibəyin istefasından sonra növbədənkənar keçirilmiş seçkilərdir. Seçkilərdə Yeni Azərbaycan Partiyasının lideri Heydər Əliyev böyük üstünlüklə qalib gəlib.

3-cü prezident seçkilərinin keçirilməsi də Azərbaycandakı siyasi gərginliyin nəticəsi kimi baş verdi. 4 iyun Gəncə qiyamından sonra prezident Əbülfəz Elçibəy Bakını tərk edərək Ordubadın Kələki kəndinə getdi, nəticədə faktiki hakimiyyətini itirdi. Avqusta keçirilən referendum (29 avqust, 1993-cü il) Elçibəyin de-fakto hakimiyyətsizliyinə de-yure son qoydu. Oktyabra təyin olunan prezident seçkilərinə (3 oktyabr, 1993-cü il) 3 namizəd qatıldı - Yeni Azərbaycan Partiyasının sədri və Azərbaycan Respublikası Ali Sovetinin sədri kimi prezident səlahiyyətlərini icra edən Heydər Əliyev, siyasi dairələrdə çox az tanınan Kərrar Əbilov və biznesmen Zakir Tağıyev. 1993-cü il oktyabrın 3-də keçirilən və Heydər Əliyevin tam üstünlüyü ilə başa çatan səsvermə Azərbaycan prezident seçkiləri tarixinin 2 rekordunu vurdu. Rəsmi məlumatlara əsasən Heydər Əliyevə seçicilərin 98,8%-i səs verdi, seçici fəallığı isə 97,6% həddinə çatdı. Prezident seçkiləri tarixinin bu rekordları hələ də dəyişməz qalır.

Nəticələr

Namizəd	Səslər	Faiz
Heydər Əliyev	3,919,923	98.84%
Kərrar Əbilov	40,298	1.01%
Zakir Tağıyev	6,406	0.15%
Ümumi	3,966,327	100%

Mənbə

• AZƏRBAYCANDA PREZİDENT SEÇKİLƏRİ: 1990, 1991, 1992, 1993, 1998, 2003. mediaforum.az  (azərb.)

Xarici keçidlər

• Azərbaycanda prezident seçkilərinin tarixi
• Azərbaycanda prezident seçkilərinin tarixi rəqəmlərdə (İnteraktiv infoqrafika)
• 15 iyun gününün Azərbaycan xalqının milli qurtuluş günü elan edilməsi haqqında AZƏRBAYCAN RESPUBLİKASI MİLLİ MƏCLİSİNİN QƏRARI (27 iyun, 1997)
• Azərbaycan Respublikası Prezidentinin növbədənkənar seçkilərinin keçirilməsi haqqında AZƏRBAYCAN RESPUBLİKASI MİLLİ MƏCLİSİNİN QƏRARI (1 sentyabr, 1993)