Bətul Eyvazlı

Vikipediya, azad ensiklopediya
Jump to navigation Jump to search
Bətul Eyvazlı
Doğum tarixi 5 avqust 1953 (1953-08-05) (66 yaş)
Doğum yeri Ağstafa
Fəaliyyəti filoloq

Eyvazlı Bətul Dilavər qızı – filoloq, “Əməkdar Mədəniyyət İşçisi”, AzərTAc-ın bölmə müdiri.

Həyatı[redaktə | əsas redaktə]

Eyvazlı Bətul Dilavər qızı 1953-cü il avqust ayının 5-də Ağstafa rayonunda ziyalı ailəsində anadan olub. Tale elə gətirib ki, ilk təhsilini 1960-cı ildə Ağdaş rayonunun Ləki qəsəbəsindəki 6 nömrəli orta məktəbdə alıb. 1970-ci ildən əmək fəaliyyətinə başlamış, 1971-1976-cı illərdə S.M.Kirov adına Azərbaycan Dövlət Universitetinin (indiki BDU-nun) filologiya fakültəsində qiyabi ali təhsil alıb. 40 ildən artıqdır ki, mətbuatda çalışır. 1970-1972-ci illərdə Ağdaş rayonu Ləki qəsəbəsi 6 nömrəli orta məktəbdə laboratoriya müdiri, 1972-1983-cü illərdə həmin məktəbdə dil-ədəbiyyat müəllimi, 1983-2003-cü illərdə Azərbaycan Dövlət Nəşriyyatı – “Azərnəşr”də korrektor, redaktor, böyük redaktor vəzifələrində çalışmışdır. 2003-cü ildən respublikanın aparıcı informasiya agentliyi, yerli və xarici KİV-lər üçün yeganə rəsmi dövlət informasiya mənbəyi olan Azərbaycan Dövlət Teleqraf Agentliyi – AzərTAc-a dəvət olunur. 2003-2004-cü illərdə böyük korrektor, 2005-ci ildən AzərTAc-da bölmə müdiridir.

Yeni Azərbaycan Partiyasının üzvüdür.

Hələ oxuduğu orta məktəbdə ədəbiyyata böyük maraq göstərib. Xırda yazıları ilə sonradan redaktoru olduğu “Təhsil” qəzetində çıxış edib. Bu yazılardan bəziləri Ağdaş rayonunda çıxan “Əmək” qəzetində (indiki “Ağdaş”) dərc edilmişdir. Ailə vəziyyəti ilə əlaqədar olaraq 1983-cü ildə Bakı şəhərinə köçür və Azərnəşrdə işlədiyi illərdə o dövrün “Səhər”, “Ülfət”, “Günay” qəzetləri, “Azərbaycan”, “Şərq-Qərb”, “Çinar-çap”, “QAPP-Poliqraf” nəşriyyatları ilə əməkdaşlıq edir. İşlədiyi müddətdə dəfələrlə diplom və fəxri fərmanlarla təltif edilmişdir. Azərbaycan Prezidenti İlham Əliyevin 2010-cu il 26 fevral tarixli Sərəncamı ilə “Əməkdar Mədəniyyət İşçisi” fəxri adına layiq görülmüşdür. Neçə-neçə elm, mədəniyyət, ədəbiyyat sahəsində görkəmli sənətkarların, dövlət xadimlərinin əsərlərinin ərsəyə gəlməsində, dövlət tədbirlərindən hazırlanmış informasiyaların Azərbaycan ictimaiyyətinə çatdırılmasında səmərəli fəaliyyət göstərmişdir. “Qəsd”, “Lissabon sammiti” kitablarının, “Müstəqilliyimiz əbədidir” çoxcildliyinin hazırlanmasında yaxından iştirak etmişdir.

Ailəlidir, 3 övladı vardır.

İstinadlar[redaktə | əsas redaktə]