Bahəddin Həziyev

Bahəddin Həziyev
Bahəddin Musa oğlu Həziyev
Ləqəbi	Bahəddin Həzi
Doğum tarixi	28 aprel 1965
Doğum yeri	Yuxarı Seyidəhmədli, Füzuli rayonu, Azərbaycan SSR, SSRİ
Vətəndaşlığı	Azərbaycan
Milliyyəti	azərbaycanlı
İxtisası	Jurnalist, yazıçı, publisist
Təhsili	Azərbaycan Dövlət Universiteti (1990)
Fəaliyyəti	Yazıçı, publisist, jurnalist
Fəaliyyət illəri	1980-ci illər–indiyədək
Tanınır	Milli Azadlıq Hərəkatı iştirakçısı, “Bizimyol” qəzetinin baş direktoru
Mükafatları

Bahəddin Həziyev (təxəllüsü: Bahəddin Həzi) (28 aprel 1965, SSRİ) — yazıçı, publisist, jurnalist, "Bizimyol" MMC-nin baş direktoru, "Bizimyol.info" saytının təsisçisi və "Bizim Yol" qəzetinin baş redaktoru.

Həyatı

Bahəddin Həziyev 28 aprel 1965-ci ildə Füzuli rayonunun Yuxarı Seyidəhmədli kəndində anadan olub. 1983-cü ildə həmin kəndin orta məktəbini bitirib. 1984–1986-cı illərdə Uzaq Şərqdə Hava Hücumundan Müdafiə qoşunlarında hərbi xidmət keçib.

1990-cı ildə Azərbaycan Dövlət Universitetinin kitabxanaçılıq fakültəsini (indiki İnformasiya və sənəd menecmenti fakültəsi), eləcə də, Universitetin nəzdindəki Jurnalist Sənətkarlığı İnstitutunu bitirib. Avropa ölkələrində müxtəlif kurs və təlimlərdə iştirak edib.

Bahəddin Həziyev hələ məktəb illərindən həvəskar jurnalistikaya maraq göstərmiş, yazıları "Araz" qəzetində və digər respublika mətbuatında dərc olunmuşdur. Tələbəlik dövründə "Molodyoj Azerbaydjana", "Bakinskiy raboçiy", "Odlar Yurdu" qəzetlərində məqalələri çıxmışdır.

1987-ci ildə antisovet ictimai təşkilat olan "Yurd" Birliyinin qurucu üzvlərindən olmuşdur. 1988–1991-ci illərdə Milli Azadlıq Hərəkatında fəal iştirak etmiş, 1990-cı il 20 Yanvar hadisələrindən sonra "Yurd" qəzetinin qeyri-leqal nəşrində iştirak etmişdir.

Yaradıcılığı və jurnalistika fəaliyyəti

Bahəddin Həziyev 1990-cı ildən peşəkar jurnalistikaya başlamışdır. İlk olaraq, Yazıçılar İttifaqı yanında Bədii Tərcümə və Ədəbi Əlaqələr Mərkəzinin "Xazar" jurnalında və eyni vaxtda "Turan" İnformasiya Agentliyində çalışıb.

1991–1994-cü illərdə "Azadlıq" qəzetində müxbir, şöbə müdiri, redaktor müavini vəzifələrində işləyib. Daha sonra "Çağ" adlı həftəlik qəzetin yaradıcısı və baş redaktoru olub. Həmin dövrdə Qarabağ müharibəsinin birinci fazasında hərbi müxbir kimi cəbhə bölgələrindən reportajlar hazırlayıb.

1996–2003-cü illərdə ABŞ-ın "Azad Avropa/Azadlıq" radiokorporasiyasında müxbir və şərhçi kimi fəaliyyət göstərmişdir. 2005-ci ildən "Bizim yol" qəzetinə, 2012-ci ilin iyun ayından isə "Bizimyol.info" saytına rəhbərlik edir. Hazırda "Bizimyol" MMC-nin baş direktorudur.

Ədəbi fəaliyyəti

Bahəddin Həziyev "Ölümcül həqiqətlər", "Göyün cazibə qüvvəsi" (avtobioqrafik povest) kimi kitabların, minlərlə məqalənin və yüzlərlə radio şərhin müəllifidir.Yazdığı publisistik və bədii əsərlər geniş oxucu auditoriyası tərəfindən maraqla qarşılanır. Onun "Qutu", "Ortalıq", "Kənar şəxslərin girişi qadağandır", "Vəhşi dənizin sahillərində" və digər esseləri müasir publisistikanın seçilən nümunələri hesab olunur.

Təltifləri

"Şəhid Ülvi Bünyadzadə adına" mükafatı — "Xəzər" jurnalı

"Jurnalistikanın inkişafında xidmətlərinə görə" mükafatı — "Azad söz" Jurnalistlər Birliyi

"Müstəqillik dövrünün jurnalisti" diplomu — "Azad söz" Jurnalistlər Birliyi

Almaniya Federativ Respublikasının Teodor Heus Akademiyasından sertifikat

Azərbaycan Mətbuat Şurasının Ali Media Mükafatı

Azərbaycan Jurnalistlər Birliyinin "Həsən bəy Zərdabi" mükafatı

Azərbaycan Respublikası Prezidentinin təşəkkürnaməsi

22 iyul 2010-cu il tarixli sərəncamla "Əməkdar Jurnalist" fəxri adı

Üzvlüyü

Azərbaycan Jurnalistlər Birliyinin üzvüdür.