Bakı Dövlət Universitetinin Quba mərkəzi

Vikipediya, açıq ensiklopediya
Keçid et: naviqasiya, axtar

Bakı Dövlət Universitetinin Quba mərkəzi (rəsmi adı: Bakı Dövlət Universitetinin Quba Tədris-Təcrübə və İstirahət Mərkəzi[1]) — Bakı Dövlət Universitetinin Azərbaycan Respublikasının Quba rayonunun İkinci Nügədi[2][3] kəndinin ərazisində yerləşən tədris-təcrübə və istirahət mərkəzi.[4][5] Əsasən BiologiyaCoğrafiya fakültələrinin tələbələri bu mərkəzdə təşkil olunan istehsalat təcrübəsində iştirak edirlər.[5]

Tarixi[redaktə | əsas redaktə]

Bu tədris-təcrübə və istirahət mərkəzinin əsası Azərbaycan SSR Nazirlər Sovetinin 10 iyul 1967-ci il tarixli Sərəncamına əsasən, Quba rayonunun Jdanov adına sovxozunun (indiki İkinci Nügədi kəndi) ərazisindən torpaq sahəsinin ayrılması ilə qoyulub.[6] Nazirlər Sovetinin sədri Ənvər Əlixanovun imzaladığı həmin Sərəncamda deyilir:[1]

"Kolxoz və sovxozların dövlət, ictimai və digər tələbatlar üçün torpaq sahələri ayrılmasına razılıq verdiyini nəzərə alaraq, ... Quba rayonu İcraiyyə Komitəsinə tapşırılsın ki, Jdanov adına sovxozun ərazisindən 8 hektar torpaq sahəsini S.M.Kirov adına Azərbaycan Dövlət Universitetinin Biologiya fakültəsi üçün tədris-təcrübə bazası təşkil etməkdən ötrü ayırsın".[1][6]

Beləcə rektor Mehdi ƏliyevBiologiya fakültəsinin dekanı Həbibə Qasımovanın rəhbərlik etdiyi nümayəndə heyəti 1967-ci ilin sentyabrında ilk dəfə bazanın ərazisinə qədəm qoydular.[1] Lakin bu ərazi təsəvvür edilən baza məfhumundan çox uzaq idi.[1] Yaşayış məntəqəsindən uzaq, yolsuz, baxımsız sıx meşə ərazisi, alma bağları və kolluqlar qonaqları düşünməyə vadar edir.[1] İnsan ayağı dəyməyən bu yerlərdə təcrübə dərslərini təşkil etmək üçün yalnız təbiətin bəxş etdiyi nemətlər var idi.[1] Rektorluq və dekanlıq bazaya yol açmaq, ərazidə heç olmazsa, çadır qurmaqdan ötrü şərait yaratmaq üçün düz 2 il çalışdı.[1]

Nəhayət, 1970-ci ilin yayında Biologiya fakültəsinin yeni dekanı Qara Mustafayev və bir qrup tələbə təzəcə salınmış cığırla gəlib alma ağaclarının altında qurulan çadırlarda ilk təcrübə keçdilər.[1] Beləliklə, "çadır-təcrübə praktikası" 1991-ci ilədək davam etdi.[1]

1989-cu ildə Xocalı şəhərinin inkişafı ilə əlaqədar həyata keçirilən Dövlət Proqramına uyğun olaraq, Rusiya Federasiyasından alınan taxta konstruksiyalı ikimərtəbəli binalardan biri Biologiya fakültəsinin o vaxtkı dekanı Akif Quliyevin şəxsi səyləri nəticəsində universitetə verildi.[1] Həmin 16 mənzilli, 47 otaqlı ev 1990-cı ilin sonlarında İkinci Nügədi kəndində qurulub başa çatdı.[1] 1991-ci ildən etibarən tələbələr, nəhayət, rahat otaqlarda yerləşərək təcrübə keçməyə başladılar.[1] Lakin bu təcrübələr uzun sürmədi.[1] Qarabağ müharibəsi dövründə burada məcburi köçkünlər məskunlaşmışdı;[4] Ermənilərin təcavüzü nəticəsində 1993-cü ildə Qubadlıdan qaçqın düşən 38 ailə müvəqqəti yaşamaq üçün bazada yerləşdirildi, bu "müvəqqətilik" 2012-ci ilə kimi davam etdi.[1] Təxminən 20 il ərzində tələbələrin təcrübə dərsləri həyata keçirilmədi.[1] Yalnız 2011-ci ilin sentyabrında yeni binanın inşasına başlanılmış və 2013-cü ilin sentyabrında başa çatdırılmışdır.[4] Tikinti işləri universitetin daxili imkanları hesabına aparılmışdır.[4]

Belə ki, 2007-ci ildən Qubanın Güləzi kəndində başlanan sürüşmənin yaratdığı problemləri həll etmək, həmin kəndi yeni əraziyə köçürmək məqsədilə dövlət tərəfindən rayonun Aşağı Atuc kəndi ərazisində 60 hektar torpaq sahəsi ayrıldı və həmin yerdə hər birinin həyətyanı sahəsi 8 sot olan 189 mənzil inşa olundu. 2012-ci il martın 6-da istifadəyə verilən həmin qəsəbənin sakinlərinin bir qismi də həyat şəraitini yaxşılaşdırmaq arzusu ilə müraciətlər edən BDU-nun tədris-təcrübə bazasında məskunlaşan məcburi köçkünlər idi.[1] Beləliklə bu hadisə bazanın yox, yeni tədris-təcrübə mərkəzinin tikintisinə şərait yaratmışdır.[1] Çünki həmin dövrdə BDU-nun Elmi Şurası "Biologiya fakültəsinin tədris-təcrübə bazası" adının dəyişdirilərək "Bakı Dövlət Universitetinin Tədris-təcrübə və istirahət mərkəzi" olması haqqında qərar qəbul etdi.[1]

Foye[redaktə | əsas redaktə]

Mərkəzin foyesində ümummilli lider Heydər Əliyevin büstü qoyulmuş, onun həyat və fəaliyyətini əks etdirən fotostend quraşdırılmışdır.[4] Binada "Bakı Dövlət Universitetinin tarixi" və "Tədris-təcrübə və istirahət mərkəzinin tarixi" adlı fotoguşələr də yaradılmışdır.[4]

Otel[redaktə | əsas redaktə]

400 nəfər üçün nəzərdə tutulan mərkəzdə universitetin müəllim və tələbələrinin istirahətinə hər cür şərait yaradılmışdır.[4] Burada həm professor-müəllim heyəti, həm də tələbələr üçün nəzərdə tutulmuş otaqlar ən müasir standartlara cavab verir.[4]

Konfrans zalları[redaktə | əsas redaktə]

Müxtəlif müzakirələrin aparılması və tədbirlərin keçirilməsi üçün burada konfrans zalları təşkil olunmuşdur.[4] Böyük akt zalında istənilən tədbirin keçirilməsi üçün hər cür şərait vardır.[4] Belə ki, burada müxtəlif tədbirlərin keçirilməsi üçün 30 nəfərlik konfrans zalı, 300 nəfərlik böyük akt zalı, professor-müəllim heyəti üçün nəzərdə tutulmuş 2-3 otaqdan ibarət 5 VİP mənzil var.[5]

Yeməkxana[redaktə | əsas redaktə]

Müəllim-tələbə heyəti 300 nəfərlik yeməkxananın xidmətlərindən istifadə edir.[4]

İdman[redaktə | əsas redaktə]

İdman zalları müasir avadanlıqla təchiz olunmuşdur.[4] Burada idmanın müxtəlif növləri ilə məşğul olmaq, həmçinin bir sıra yarışların keçirilməsi mümkündür.[4]

Mərkəzinin həyətində 2 idman stadionu (biri futbol, digəri voleybol və böyük tennis) yerləşir.[5]

Kitabxana[redaktə | əsas redaktə]

Mərkəzin əsas bölmələrindən biri də kitabxanadır.[4] Elektron formatda təşkil olunan kitabxanada müxtəlif mövzulara aid yüzlərlə ədəbiyyat toplanmışdır.[4]

Laboratoriya[redaktə | əsas redaktə]

Tədris-təcrübə və istirahət mərkəzində müxtəlif elmi[5] istiqamətlər üzrə laboratoriyalar təşkil olunmuşdur.[4] Bütün bunlar müəllim və tələbələrin daha yaxşı istehsalat təcrübəsi aparmalarına, yerli və beynəlxalq tədbirlərin keçirilməsinə yeni imkanlar yaradır.[4]

Açılışı[redaktə | əsas redaktə]

Azərbaycan Respublikasının Prezidenti İlham Əliyev Azərbaycanın birinci xanımı, Heydər Əliyev Fondunun prezidenti Mehriban Əliyevanın iştirakı ilə 18 sentyabr 2013-cü ildə mərkəzin açılışında iştirak etmiş və mərkəzin rəmzi açılışını bildirən lenti kəsmişdir.[4]

Həmçinin bax[redaktə | əsas redaktə]

İstinadlar[redaktə | əsas redaktə]

  1. 1,00 1,01 1,02 1,03 1,04 1,05 1,06 1,07 1,08 1,09 1,10 1,11 1,12 1,13 1,14 1,15 1,16 1,17 1,18 Acı taleyin xoşbəxt sonluğu. BAKI DÖVLƏT UNİVERSİTETİ QUBA TƏDRİS-TƏCRÜBƏ VƏ İSTİRAHƏT MƏRKƏZİNİN 45 İLLİK ACILI-SEVİNCLİ GÜNLƏRİ. "525-ci qəzet", 08.10.2013  (azərb.)
  2. Əlişah Atakişiyev və başqalarından, Quba, Azərbaycan. president.az, 18.07.2013  (azərb.)
  3. Bakı Dövlət Universitetinin Qubadakı tədris-təcrübə və istirahət mərkəzində elmi şuranın genişləndirilmiş iclası keçirilmişdir. azerbaijan-news.az, 05.07.2014  (azərb.)
  4. 4,00 4,01 4,02 4,03 4,04 4,05 4,06 4,07 4,08 4,09 4,10 4,11 4,12 4,13 4,14 4,15 4,16 4,17 İlham Əliyev Qubaya səfəri çərçivəsində Bakı Dövlət Universitetinin tədris-təcrübə və istirahət mərkəzinin açılışında iştirak etmişdir. president.az, 18.09.2013  (azərb.)
  5. 5,0 5,1 5,2 5,3 5,4 Rüfanə Günəş, "Mənim universitetim" layihəsi: Bakı Dövlət Universiteti. "Azərbaycan müəllimi" qəzeti, 14.03.2015, № 10.  (azərb.)
  6. 6,0 6,1 Azərbaycan SSR Nazirlər Sovetinin 10 iyul 1967-ci il tarixli, 388 nömrəli Sərəncamı

Xarici keçidlər[redaktə | əsas redaktə]