Buta Azərbaycan-Koreya Tələbə Təşkilatı

Vikipediya, açıq ensiklopediya
Jump to navigation Jump to search

Buta Azərbaycan-Koreya Tələbə Təşkilatı — Koreya Respublikasında təhsil alan azərbaycanlı tələbələrdən ibarət Azərbaycan diaspora təşkilatı.

Yaranma səbəbi və təşəbbüs qrupu[redaktə | əsas redaktə]

Qloballaşma prosesinin sürətlə getdiyi dövrdə Azərbaycanın beynəlxalq təhsil məkanına inteqrasiya sahəsindəki uğurlu siyasətinin nəticəsi olaraq azərbaycanlı gənclər dünyanın qabaqcıl ölkələrində təhsil almaq imkanı qazanırlar. Koreya Respublikası da bu ölkələr sırasındadır və 2009-cu ildən burada təhsil alan azərbaycanlıların sayı nəzərə çarpacaq dərəcədə artmaqdadır.

Sıralarının genişlənməsi Koreyada azərbaycanlı tələbələrin təşkilatlanması zərurətini yaratdı. Bu məsələni Koreyadakı azərbaycanlı tələbələrin müzakirə etməsi üçün internet forumu yaradıldı. Təşkilatlanma istiqamətində fikir mübadiləsi aparıldı və tələbələrin rəyləri öyrənildi.

Müzakirələrin sonunda Koreyada azərbaycanlı tələbələrin təşkilatının yaradılması üçün təşəbbüs qrupu yaradılması qərara alındı. Tələbələrin bu təşəbbüsünü Azərbaycanın Cənubi Koreya səfirliyi yüksək qiymətləndirdi və tələbələrin təşkilatlanmasında maddi və mənəvi dəstək oldu.

Təşkilatın təsis konfransı[redaktə | əsas redaktə]

8 mart 2009-cu ildə təşəbbüs qrupunun iclası keçirildi, yaradılacaq təşkilatın gələcək perspektivlərindən söhbət açıldı. Müvafiq olaraq nizamnamə layihəsi hazırlandı və təşkilatın təsis konfransının keçirilməsi üçün hazırlıq işlərinə başlandı.

21 mart 2009-cu ildə Cənubi Koreyanın paytaxtı Seul şəhərində təsis konfransı keçirildi və təşkilata rəmzi olaraq Azərbaycan xalqının milli xüsusiyyətlərini özündə əks etdirən "BUTA" adı verildi.

Fəaliyyət istiqamətləri[redaktə | əsas redaktə]

"BUTA" Azərbaycan-Koreya Tələbə Təşkilatı Cənubi Koreya Respublikasında Azərbaycanın diaspora fəaliyyətini təmin etmək istiqamətində fəaliyyət göstərir. Əsas fəaliyyət istiqamətləri Koreya Respublikasında təhsil alan azərbaycanlı tələbələrin təşkilatlanması, onlar arasında milli birliyin və həmrəyliyin möhkəmləndirilməsi, azərbaycan xalqının tarixi, müasir həyatı, sosial-iqtisadi inkişaf səviyyəsi, mədəniyyəti ilə bağlı məlumatların Koreya ictimaiyyətinə çatdırılmasından ibarətdir.

Hesabat 2010-2011[redaktə | əsas redaktə]

BUTA Azərbaycan-Koreya Tələbə Təşkilatının İdarə Heyətinin Hesabatı 29 Mart 2010 – 19 Mart 2011

8 May 2010 / "Təbliğat Aksiyası" keçirildi – Şuşanın işğalının 18-ci ildönümü ilə əlaqədar olaraq BUTA Azərbaycan-Koreya Tələbə Təşkilatı "təbliğat xarakterli aksiya" keçirdi. Aksiyanın əsas məqsədi, İnformasiya blokadasının aradan qaldırılması və Qarabağ barədə həqiqətlərin, erməni-Azərbaycan münaqişəsinin səbəbləri və nəticələrinin beynəlxalq ictimaiyyətin diqqətinə çatdırılması məqsədilə Heydər Əliyev Fondu tərəfindən hazırlanmış və dərc olunmuş «Qarabağ barədə həqiqət» məcmuəsinə daxil olan ingilis dilində məlumat kitabcalarını Koreyada azərbaycanlı tələbələrin təhsil aldığı universitetlərin kitabxanalarında yerləşdirməkdən ibarət idi. Əyani vəsaitlərin əldə olunmasında Azərbaycan Respublikasının Koreyadakı Səfirliyi "BUTA" Azərbaycan-Koreya Tələbə Təşkilatına köməklik göstərdi.Aksiya nəticəsində «Qarabağ barədə həqiqət» məcmuəsinə daxil olan ingilis dilində məlumat kitabcaları adları qeyd olunan Universitetlərin Kitabxanalarında yerləşdirildi: Busan Dövlət Universiteti, Kyonbuk Dövlət Universiteti,Gyeongsang Dövlət universiteti, Sunkyunkvan Universiteti, Cheongju Universiteti, Kyung Hee Universiteti, KAİST, Soongshil Universiteti.

29 May 2010 / Respublika günü qeyd olundu - BUTA Azərbaycan-Koreya Tələbə təşkilatı Sonbugk mədəniyyət mərkəzində Respublika günü münasibətilə bayram tədbiri keçirdi. Sonbuk mədəniyyət mərkəzində Azərbaycan guşəsi açıldı, ölkəmizlə bağlı broşurlar, kitablar, suvenirlər , BUTA AKTT-nin hazırladığı Azərbaycan haqqında məlumat kitabcaları yerləşdiridi. Tədbirdə ölkəmizin zəngin mədəniyyəti, qədim tarixi, dünyada iqtisadi və siyasi sahədə önəmli rola malik olması barədə geniş prezentasiya keçirildi. Mədəniyyət və Turizm nazirliyi tərəfindən hazırlanmış Azərbaycan haqqında tanıtım videoçarxı nümayiş etdirildi. Tələbələrin ifasında milli rəqslərimiz, mahnılarımız, musiqi alətləri ifa olundu.

11 İyun 2010 / Təşkilatın rəsmi internet səhifəsi hazırlanıb istifadəyə verildi – Saytda təşkilata aid ümumi məlumatlar – təşkilatın yaranama tarixi, strukturu, nizamnaməsini, illik iş planını, təşkilata aid xəbərlər, tədbirlərin elanı, koreyda təhsil almaq istəyən tələbələr üçün bölmə, Koreya universitetlərinin azərbaycanlı məzunları haqqında məlumatlar, video, fotolar, mətbuatda təşkilat haqqında dərc olunan yazılar bu kimi informasiyalar yer almışdır.

04 Sentyabr 2010 / BUTA Azərbaycan Futbol Komandası yaradıldı - Koreyada yaşayan müxtəlif ölkə nümayəndələrinin futbol komandaları arasında mütəmadi olaraq həril keçirilən çempionat keçirilir. BUTA Azərbaycan-Koreya Tələbə Təşkilatı digər ölkə nümayəndələrinin futbol komandasının olmasını, eyni zamanda bunun yerli və xarici tələbə təşkilatları, digər ictimai qurumlarla əməkdaşlığa müsbət təsiri olacağını və ən əsası çempionatda ölkəmizi təmsil etmək imkanlarını nəzərə alaraq, azərbaycanlı tələbələrdən ibarət BUTA Azərbaycan Futbol Komandasının yaradılması təşəbbüsünü göstərdi. Bu təşəbbüs Azərbaycanın Cənubi Koreyadakı Səfirliyi tərəfindən yüksək qiymətləndirildi və Səfirlik Koreyada təhsil alan tələbələrimizdən ibarət BUTA Azərbaycan Futbol Komandasının yaradılması və çempionatda iştirak etməsi üçün zəruri olan bütün maddi-mənəvi dəstəyini əsirgərmədi. BUTA Azərbaycan Futbol komandasının üzərində loqosu və Azərbaycan bayrağı olan futbol formaları hazırlandı, 04 Sentyabr 2010-cu il tarixdən etibarən turnirdə ölkəmizi təmsil etməyə başladı.

10 Oktyabr 2010 / Koreya Xarici Dillər Universitetində Azərbaycan Mədəniyyət Dərnəyi yaradıldı - Xarici Dillər Universitetinin Türk-Azərbaycan Dilləri Fakültəsində yaradılan "BUTA Azərbaycan Mədəniyyət Dərnəyi"- də əsasən təşkilatın üzvləri Zaur Səfərov və Çinarə tərəfindən Koreyalı tələbələrə Azərbaycanın milli rəqslərini öyrədilir. Dərnəkdə həmçinin ölkəmizin tarixi, mədəniyyəti, incəsənəti barədə məlumatları müxtəlif formatlı tədbirlər keçirməklə koreyalı tələbələrə aşılanır. Azərbaycan dilini öyrənən koreyalı tələbələr üçün dərnəkdə "danışıq dərsləri"nin təşkil olunması da nəzərdə tutulub. Koreyadakı Azərbaycan Səfirliyi, "BUTA Azərbaycan Mədəniyyət Dərnəyinə" dəstək olaraq Azərbaycan haqqında məlumat xarakterli materiallar vermiş, rəqs dərslərində istifadə olunması üçün milli paltarlarla təmin etmişdir.

13 Noyabr 2010 / BUTA AKTT ermənilərin saxtakarlıq cəhdinə qarşı etirazını bildirdi – 15-19 Noyabr 2010-ci il tarixdə YUNESKO-nun Qeyri-maddi mədəni irsi üzrə Komitəsinin 5-ci sessiyasında Ermənistanın irəli sürdüyü nominasiya sənədlərində Azərbaycanın maraqlarına zidd olan bir sıra saxta tarixi faktlar yer almışdı: Qədim Qafqaz Albaniyası dövrünə aid abidələr erməni abidələri kimi göstərilmiş, Azərbaycan Respublikasının tərkib hissəsi olan Dağlıq qarabağın adı müstəqil dövlətlər sırasında qeyd edilmiş, saxta ‘erməni soyqırımı" iddialarından bəhs olunmuşdur. Bu saxtakarlığa etiraz olaraq BUTA Azərbaycan-Koreya Tələbə Təşkilatı adından YUNESKO-nun Baş Direktoru Irina Bokovaya məktub göndərilmişdir. Məktubda ermənistanın nominasiya sənədlərinin Beynəlxalq Hüquq normalarını pozması və YUNESKO-nun fəaliyyət prinsiplərinə zidd olması diqqətə çatdırılaraq keçiriləcək iclasda "ermənistan xaçkarları" nominasiyasına baxılmasının dayandırılmasının zəruri olduğu bildirilmişdir.

19 Noyabr 2010 / "Odlar Yurdu" silsiləsindən ilk tədbir Kyungpook Dövlət Universitetində keçirildi – BUTA Azərbaycan-Koreya Tələbə Təşkilatı azərbaycanlı tələbələrin təhsil aldığı Cənubi Koreya universitetlərində "Odlar Yurdu" adlı Azərbaycanla bağlı silsilə prezentasiyalar keçirir. Bu sıradan ilk tədbir 19 Noyabr 2010-cu il tarixdə Kyungpook Dövlət Universitetində təşkil olundu. Təşkilatın üzvləri Anar Muradov və Gülçin Tağıyeva tədbirdə iştirak edən tələbə, müəllim heyətinə ölkəmizin qədim və müasir tarixi, incəsənəti, iqtisadiyyatı, milli sərvətləri, Dağlıq Qarabağ münaqişəsi haqqında geniş məlumat verildi. İştirakçılara Azərbaycanla bağlı video çarxlar göstərildi və BUTA AKTT-nin əyani vəsaitlər fondundan ayrılmış ölkəmiz haqqında ingilis və koraya dillərində müxtəlif jurnal, kitabca, broşurlar paylandı. BUTA AKTT "Odlar Yurdu" sislsilə prezentasiyaları keçirməkdə əsas məqsəd ölkəmizi tanıtmaq, Koreyadakı azərbaycanlı tələbələrin ictimai fəallığını artırmaq və təşkilatın işində yaxından iştirakını təmin etməkdən ibarətdir.

19 Noyabr 2010 / Koreyalı tələbələr Azərbaycan milli rəqsilə çıxış etdilər - 19 Noyabr 2010-cu il tarixdə Koreya Xarici Dillər Universitətində "Türk və Azərbaycan dilləri fakültəsi"nin təşkilatçılığı ilə tələbə və məzunlar üçün "Homecoming Day ‘’ mədəniyyət tədbiri keçirildi. BUTA Azərbaycan–Koreya Tələbə Təşkilatı nəznində Koreya Xarici Dillər Universitetində fəaliyyət göstərən Mədəniyyət Dərnəyinin koreyalı tələbələri Azərbaycanın "Naz eləmə" milli rəqsi ilə tədbirdə uğurla çıxış etdilər.

04 Dekabr 2010 / BUTA AKTT-nin rəsmi internet səhifəsi "MİLLİ NET 2010" müsabiqədə ikinci yeri qazandı - 01 oktyabr 2010-cu il tarixdə başlanan BUTA AKTT-nin də qatıldığı Milli İnternet Mükafatı uğrunda müsabiqəyə 04 dekabrda yekun vuruldu. BUTA Azərbaycan-Koreya Tələbə Təşkilatının rəsmi internet səhifəsi (www.buta.kr) İctimai-sosial saytlar noniminasiyası üzrə 2-ci yerə layiq görüldü və müsabiqənin diplomu ilə təltif olundu. Milli Net-Milli İnternet Mükafatı Azərbaycan İnternet Forumu tərəfindən təsis edilən peşəkar internet mükafatıdır. Bu mükafat hər il sosial, mədəni, elmi, iqtisadi, hüquqi və s. sahələrdə fəaliyyət göstərən, Azərbaycan dilində tərtib olunan milli internet resurslarına və internet layihələrinə müsabiqə üsulu ilə təqdim edilir.

14 Dekabr 2010 / BUTA Azərbaycan futbol komandasının oyunçusu turnirdə birinci oldu – 03 sentyabr 2010-da başlayan və BUTA Azərbaycan futbol komandasının da iştirak etdiyi Seulda keçirilən ənənəvi futbol çempionatı 14 Dekabr 2010-da başa çatdı. Çempionatın bu dəfəki qalibi OUTKASTS komandası oldu. Amma bununla belə çempionat BUTA Azərbaycan Futbol komandası üçün yaddaqalan oldu. Komandanın üzvü Mikayıllı Nazim çempionatın ən yaxşı oyunçusu adına layiq görülüb. Mikayıllı Nazim komandanın keçirdiyi oyunlarda vurduğu 10 qolla digər rəqiblərini geridə qoyub və turnirin ən yaxşı oyunçusu olaraq kubokla təltif olundu.

28 fevral 2011 / Xocalı Faciəsinə həsr olunmuş tədbir keçirildi – Azərbayacan Respublikasının Koreyadakı Səfirliyi və BUTA Azərbaycan-Koreya Tələbə Təşkilatı 28 Fevral 2011-ci il tarixdə Kyung Hee Universitetində "Xocalıya ədalət" beynəlxalq kampaniyası çərçivəsində faciənin 19-cu il dönümünə həsr olunmuş tədbir keçirdi. Tədbirdə iştirak edən Səfirliyin 2-ci Katibi Vaqif Cəfərov və BUTA AKTT-nin İdarə Heyətinin üzvü Vüsal Məmmədov Xocalı Faciəsi barədə tədbir iştirakçılarına geniş məlumat verdilər. Koreyalıların və digər ölkə nümayəndələrinin iştirak etdiyi tədbirdə Xocalı faciəsini əks etdirən foto sərgi təşkil olundu, faciənin tanınması üçün imzatoplama kampaniyası həyəta keçirildi, iştirakçılara faciə haqqında kitabcalar paylandı.

Yuxarıda qeyd olunanlarla yanaşı BUTA AKTT-nin bir illik fəaliyyət dövründə təşkilatın idarə heyətinin iclasları keçirilib, təşkilata aid sənədlər arxivləşdirilib, əyani vəsaitlər fondu yaradılıb, təşkilatın rəsmi internet səhifəsi daim yenilənib, email ünvanına daxil olan məktublar cavablandırılıb, tədbirlər haqqında məlumatlar yayımlanması üçün mətbuata göndərilib və bu kimi digər prosedur məsələlər də gərəkən qaydada tam məsuliyyətlə həyata keçirilmişdir. Hesabatı BUTA AKTT-nin Ali Orqanı – Ümuni Yığıncağa təqdim etdi: Eltay Aslanov BUTA Azərbaycan-Koreya Tələbə Təşkilatının Sədri, Koreya Respublikası, Seul Şəhəri / 19 Mart 2011-ci il

Mənbə[redaktə | əsas redaktə]

Xarici keçidlər[redaktə | əsas redaktə]