Cümşüd Hacıyev

Cümşüd Hacıyev
Cümşüd Məhəmməd oğlu Hacıyev
Doğum tarixi	5 may 1931 (1931-05-05)
Doğum yeri	Sarvan, Borçalı, Gürcüstan SSR
Vətəndaşlıq	Azərbaycan
Elm sahəsi	fəlsəfə
Elmi dərəcəsi	fəlsəfə elmləri namizədi
Elmi adı	dosent
Atası	Məhəmməd Hacı oğlu Hacıyev
Anası	Mileylə Söyün qızı Hacıyeva

Hacıyev Cümşüd Məhəmməd oğlu — filosof, müəllim, fəlsəfə elmləri namizədi, dosent.

Həyatı

Cümşüd Hacıyev 5 may 1931-cü ildə Gürcüstan SSR-in Sarvan kəndində (indiki Marneuli şəhəri)), Nayvəlilər ocağında anadan olub. Borçalının öndər şəxsiyyəti Nayvəlinin nəticəsi, filoloq alim Abbas Hacıyevin, filoloq Vəkil Hacılının, pedaqoq və ictimai xadim Tofiq Hacıyev (siyasətçi)in qardaşı, filoloq Asif Hacıyevin əmisidir.

1937-ci ildə Borçalı Türk Pedaqoji Texnikumunun nəzdindəki ibtidai məktəbin birinci sinfinə gedib, tanınmış müəllimə Kafiyə Almərdanovanın sinfində oxuyub. 1941-ci ildə ibtidai məktəbi qurtarıb, Sarvan kənd (indiki Marneuli şəhəri)) 1 saylı məktəbin 5-ci sinfinə getmişdir.

1945-ci ildə bu məktəbin 8-ci sinfini tamamladıqdan sonra Borçalı Pedaqoji Texnikumuna daxil olmuş və 1949-cu ildə texnikumu müvəffəqiyyətlə bitirmişdir. Texnikumda təhsil aldığı dövrdə ictimai işlərdə fəal iştirak etmiş, Tələbə Həmkarlar Təşkilatının Sədri olmuşdur. Texnikumun tələbəsi ikən Borçalı Rayon Partiya Komitəsinin nəzdində partiya tarixi üzrə təşkil olunmuş altı aylıq kurslarda oxumuşdur.

1949-cu ildə Bakı Dövlət Universitetinin Tarix fakültəsinə daxil olmuş və 1954-cü ildə bu fakültəni Fərqlənmə Diplomu ilə başa vurmuşdur. Fəal ictimaiyyətçi olmuş, 1954-cü ildə tələbə ikən Sov.İKP üzvlüyünə namizəd qəbul olunmuşdur.

Bakıda Universiteti bitirdiyi 1954-cü ildən Borçalıya qayıtmış və 1963-cü ilə qədər Gürcüstanda Marneuli rayon 2 saylı orta məktəbində müəllim işləmişdir. 1963-1966-cı illərdə Bakıda BDU-nun əyani aspiranturasında təhsil aldıqdan sonra ali təhsil sahəsində çalışmış, fəlsəfə və digər ictimai fənlərdən dərs demişdir.

Fəaliyyəti

Cümşüd Hacıyev BDU-nun tarix fakültəsini bitirdikdən sonra 1954-cü ildən 1963-cü ilə kimi Borçalıda indiki 2 saylı Sarvan orta məktəbində tarix, məntiq və ictimaiyyət fənlərindən dərs demişdir. 1956-cı ildə Sov.İKP-yə üzv qəbul edilmişdir. Savadlı və bacarıqlı müəllim kimi tanınmış, tarix üzrə rayon fənn komissiyasının sədri, məktəbin ilk partiya təşkilatının katibi olmuşdur.

1963-cü ilin payızında təhsilini davam etdirmək və elmi fəaliyyətlə məşğul olmaq üçün Bakıya köçmüş, 1963-1966-cı illərdə BDU-nun əyani aspiranturasında oxumuşdur. 1967-ci ilin aprelində fəlsəfə elmləri namizədi alimlik dərəcəsi almaq üçün "Şəhərlə kənd arasındakı mühüm fərqlərin aradan qaldırılmasının şəxsiyyətin hərtərəfli inkişafında rolu" mövzusunda dissertasiya müdafiə etmişdir.

1966-cı ilin oktyabrından 1967-ci ilin dekabrına kimi BDU-nun Fəlsəfə kafedrasında fəlsəfə kabinetinin müdiri vəzifəsində işləmişdir.

1967-ci ilin dekabrından 1969-cu ilin dekabrına kimi Fəlsəfə kafedrasında müəllim, 1969-1972-ci illərdə baş müəllim olmuşdur. 1972-ci ilin dekabrından Fəlsəfə kafedrasında dosent vəzifəsinə keçmişdir.

1974-cü ilin sentyabrından Xarici Dillər İnstitutunun (indiki Azərbaycan Dillər Universiteti) Fəlsəfə kafedrasında dosent kimi fəaliyyətə başlamışdır.

Elmi-pedaqoji fəaliyyəti ilə əlaqədar 1977-ci ildə Rostov Dövlət Universitetində, 1982-ci ildə Kiyev Dövlət Universitetində uzunmüddətli elmi ezamiyyətdə olmuşdur.

Tələbkar müəllim, prinsipial alim olan Cümşüd Hacıyev sosial-ictimai və fəlsəfi məsələlər, o cümlədən, dialektika, əksliklərin vəhdəti, kəmiyyət və keyfiyyət dəyişiklikləri, sufilik cərəyanı, fəlsəfə kursunun tədrisi məsələlərinə dair tədqiqatlar aparmış, bu sahədə elmi və elmi-metodik əsərləri dərc olunmuşdur.

Bədii ədəbiyyatın gözəl bilicisi olan Cümşüd Hacıyev müəyyən ədəbi məqalələrin də müəllifidir.

Bir sıra elmi və elmi-publisistik əsərləri, proqram və vəsaitləri çap olunmuşdur.

2007-ci ilin noyabr ayından təqaüddədir.

Həmçinin bax

• Nayvəlilər (Hacıyevlər)
• Nayvəli
• Rüstəm Hacıyev
• Cümşüd Hacıyev
• Abbas Hacıyev
• Vəkil Hacılı
• Baxış Hacıyev
• Tofiq Hacıyev
• Rafiq Hacıyev
• Asif Hacıyev

Xarici keçidlər

• nayveliler.tr.gg