Dəmir Yolu və Metropoliten üzrə Bakı Dövlət Peşə Təhsil Mərkəzi

Dəmir Yolu və Metropoliten üzrə Bakı Dövlət Peşə Təhsil Mərkəzi
Dəmiryol PTM
Dəmir Yolu və Metropoliten üzrə Bakı Dövlət Peşə Təhsil Mərkəzi; Dəmiryol PTM
Əsası qoyulub	1923
Tabelik	Peşə Təhsili üzrə Dövlət Agentliyi
Direktor	Vakant
Tələbə sayı	800
Müəllim sayı	70
Ölkə	Azərbaycan
Şəhər	Bakı
Ünvan	Nəriman Nərimanov rayonu, Təbriz küçəsi 19
Sayt	demiryol.edu.az
	40°23′21″ şm. e. 49°51′10″ ş. u.HGYO

Dəmir Yolu və Metropoliten üzrə Bakı Dövlət Peşə Təhsil Mərkəzi və ya qısaca Dəmiryol PTM — Azərbaycan Respublikası Elm və Təhsil Nazirliyi yanında Peşə Təhsili üzrə Dövlət Agentliyinin tabeliyində fəaliyyət göstərən, dəmiryol nəqliyyatı və metropoliten sahələri üzrə ixtisaslı kadrlar hazırlayan dövlət peşə təhsili müəssisəsidir.

Tarixi

Dəmir Yolu və Metropoliten üzrə Bakı Dövlət Peşə Təhsil Mərkəzinin tarixi 1923-cü ildən başlayır. Belə ki, bu təhsil ocağı həmin ildən fabrik-zavod məktəbi kimi fəaliyyətə başlamışdır. 1941-ci ildən 1 nömrəli Dəmir Yolu Peşə Məktəbi, 1955-ci ildən 4 nömrəli şəhər Texniki Peşə Məktəbi, 1969-cu ildən 2 nömrəli Orta Texniki Peşə Məktəbi, 1996-cı ildən Dövlət Dəmir Yolu Liseyi adlandırılıb. 1969-cu ildən burada şagirdlərə həm də orta təhsil verilməyə başlanılıb.^[1]

Azərbaycan Respublikası Nazirlər Kabinetinin 11 oktyabr 2016-cı il tarixli 405 nömrəli Qərarına əsasən 2 nömrəli Bakı Peşə Məktəbi ilə birləşdirilmiş və onların bazasında Dəmir Yolu və Metropoliten üzrə Bakı Dövlət Peşə Təhsil Mərkəzi yaradılmışdır.^[2]

Mərkəzin yaradılmasında əsas məqsəd ölkənin strateji əhəmiyyətli nəqliyyat qovşaqları olan "Azərbaycan Dəmir Yolları" QSC və "Bakı Metropoliteni" QSC-nin artan kadr tələbatını ödəmək, həmçinin müasir texnologiyalara bələd olan mütəxəssislər yetişdirməkdir.

İxtisaslar

Dəmir Yolu və Metropoliten üzrə Bakı Dövlət Peşə Təhsil Mərkəzində tədris 10 istiqamət üzrə nəzəri və praktiki olaraq həyata keçirilir.^[3]

Elektrik qatarının maşinisti
Elektrovoz maşinisti
Teplovoz maşinisti
Metropolitenin stansiya növbətçisi
Vaqon baxıcısı-təmirçisi
Dəmiryol stansiyasının növbətçisi
Kontakt şəbəkəsinin elektrik montyoru
Yolun və süni qurğuların cari təmiri və saxlanması üzrə briqadir
Texniki xidmət məntəqələrində lokomotiv baxıcısı və təmiri-çilingər
İşarəvermə, mərkəzləşdirmə, bloklama qurğularının təmiri və xidməti elektrik montyoru

Maddi-texniki bazası

Mərkəzin infrastrukturu tələbələrin peşəkar vərdişlərə yiyələnməsi üçün zəruri avadanlıqlarla təchiz edilmişdir:

Simulyator otaqları: Maşinistlərin hazırlığı üçün real qatar idarəetmə simulyatorları.
Emalatxanalar: Çilingər, elektrik və montaj işləri üçün xüsusi təchiz olunmuş sexlər.
Laboratoriyalar: Avtomatika, telemexanika və rabitə sistemlərinin öyrənilməsi üçün laboratoriyalar.
İdman zalı və kitabxana.