Davud Məmmədov

Davud Məmmədov
Davud Məmmədov
Azərbaycan SSR məişət xidməti və yerli istehsal naziri
	30 mart 1963 – 11 iyun 1963
Əvvəlki	vəzifənin adı dəyişdirilib
Sonrakı	Nəbibə Həsənova
Azərbaycan SSR yerli sənaye naziri
	31 dekabr 1958 – 28 mart 1963
Əvvəlki	Qurban Xəlilov
Sonrakı	vəzifənin adı dəyişdirilib
Şəxsi məlumatlar
Doğum tarixi	21 fevral 1910
Doğum yeri	Yelizavetpol, Yelizavetpol quberniyası, Rusiya imperiyası;
Vəfat tarixi	bilinmir
Təltifləri

Davud Cəbrayıl oğlu Məmmədov (21 fevral 1910, Yelizavetpol – bilinmir) — Azərbaycan-sovet dövlət xadimi, Azərbaycan SSR yerli sənaye naziri (1958–1963).

Həyatı

Davud Məmmədov 1910-cu ildə hazırkı Gəncə şəhərində xırda qulluqçu ailəsində anadan olmuşdur. 1928-ci ildə orta məktəbi bitirərək Tiflis Politexnik İnstitutuna daxil olmuş, sonra isə Bakıdakı Azərbaycan Neft İnstitutuna keçərək həmin institutu 1933-cü ildə mühəndis-mexanik ixtisası üzrə bitirmişdir. Davud Məmmədov təhsil aldığı illərdə S. M. Kirov adına mexaniki zavodda mühəndis vəzifəsində çalışmış, təhsilini tamamladıqdan sonra da burada qalaraq əvvəlcə mühəndis-texnoloq, sonra növbə rəisi və mexaniki sexin rəis müəvini işləmişdir.^[1]

1935-ci ildə Davud Məmmədov Sovet Ordusu sıralarına hərbi xidmətə çağırılmış, tərxis olunduqdan sonra yenidən işlədiyi zavoda qayıtmışdır. Burada texnoloji proseslər üzrə qrupun rəhbəri, 1939-cu ilin avqustunda isə zavodun baş mühəndisi olmuşdur. Bundan sonra o, rəhbər işə irəli çəkilərək "Azərneftmaş" trestinə müdir təyin edilmişdir.^[1]

Davud Məmmədov Sovet İttifaqının sifariş etdiyi qazıma avadanlığını texniki cəhətdən yoxlayıb qəbul etmək üçün 1946-cı ildə mütəxəssis qismində Amerika Birləşmiş Ştatlarına göndərilmiş, ezamiyyətdən qayıtdıqdan sonra bir müddət Leytenant Şmidt adına maşınqayırma zavoduna başçılıq etmiş, sonra isə yenidən "Azərneftmaş" trestinin müdiri olmuşdur.^[1] 1957–1958-ci illərdə Davud Məmmədov Azərbaycan SSR Xalq Təsərrüfatı Şurasının sədr müavini, sonra isə Azərbaycan SSR yerli sənaye naziri olmuşdur.^[2]

Davud Məmmədov "Lenin", "Qırmızı əmək bayrağı", "Şərəf nişanı" ordenləri və medallarla təltif edilmişdir. O, dəfələrlə Bakı və rayon zəhmətkeş deputatları sovetlərinə deputat seçilmişdir.^[1]

İstinadlar

↑ ¹ ² ³ ⁴ Давуд Ҹәбрајыл оғлу Мәммәдов // Азәрбајҹан ССР Али Совети депутатларынын тәрҹүмеји-һаллары. Бешинҹи чағырыш: 15 март 1959-ҹу ил. Бакы. 1960. С. 499.
↑ Məmmədov Davud Cəbrayıl oğlu // Naxçıvanda seçkilərin tarixi (1937–2002). Ensiklopedik toplu. Bakı: Qanun. 2003. səh. 162–163.

Xarici keçidlər

"Мамедов Давуд Джабраил-оглы" (rus). Подвиг народа. İstifadə tarixi: 29 dekabr 2021.

[dep5-1] ¹ ² ³ ⁴ Давуд Ҹәбрајыл оғлу Мәммәдов // Азәрбајҹан ССР Али Совети депутатларынын тәрҹүмеји-һаллары. Бешинҹи чағырыш: 15 март 1959-ҹу ил. Бакы. 1960. С. 499.

[nst-2] Məmmədov Davud Cəbrayıl oğlu // Naxçıvanda seçkilərin tarixi (1937–2002). Ensiklopedik toplu. Bakı: Qanun. 2003. səh. 162–163.

[1]

[2]