Eynal Əliyev

Vikipediya, açıq ensiklopediya
Jump to navigation Jump to search
Eynal Əliyev
Doğum tarixi 8 oktyabr 1923(1923-10-08)
Doğum yeri Əmircan, Bakı şəhəri
Vəfat tarixi 14 noyabr 2016
Vəfat yeri Bakı şəhəri
Milliyyəti azərbaycanlı
Mükafatları "Azərbaycan Respublikasının Əməkdar hüquqşünası"

Eynal Əliyev — "Azərbaycan Respublikasının Əməkdar hüquqşünası"; ədliyyə pokovniki.

Eynal Hacı oğlu Əliyev 1923-cü il oktyabr ayının 8-də Bakının Əmircan kəndində neftçi ailəsində anadan olmuşdur. 1941-ci ildə orta təhsilini başa vurduqdan sonra o, Aazərbaycan Tibb Universitetinə daxil olmuş, lakin Böyük Vətən müharibəsinin başlanması ilə əlaqədar 1942-ci ildə könüllülər sırasında cəbhəyə getmiş, bununla əlaqədar, ali tibb təhsilini almaq arzusu yarımçıq qalmışdır. O, 1943-cü ilin axırlarında ağır xəstəliyinə görə ordu sıralarından tərxis olunmuşdur.

Eynal Əliyev 1944-cü ildə BDU-nun hüquq fakültəsinə daxil olmuş, lakin prokurorluq orqanlarında kadr çatışmazlığı səbəbindən təhsilini başa vurmamış, sonuncu kursdan - 1947-ci il oktyabr ayının 6-da Lenin (indiki Sabunçu-İ.A.) rayonuna prokuror köməkçisi vəzifəsinə təyin olunmuşdur. O, 1948-ci ildə hüquq fakültəsini bitirdikdən sonra Bakı şəhərinin Əzizbəyov (indiki Xəzər-İ.A.), Oktyabr (indiki Yasamal-İ.A.) rayonlarında prokuror, Bakı şəhər prokurorluğunda istintaq şöbəsinin prokuroru, 1969-1974-cü illərdə Qaradağ rayon prokuroru, 1975-1988-ci illərdə Azərbaycan Respublikası Prokurorluğunda şöbə rəisi, Məhkəmə qərarlarının qanuniliyinə nəzarət idarəsinin böyük prokuroru vəzifələrində çalışmışdır. 1989-cu ilin avqust ayında siyasi repressiya qurbanlarının təmizə çıxarılması işi ilə əlaqədar İstintaq nəzarət idarəsi nəzdində yaradılmış şöbədə böyük prokuror vəzifəsinə təyin edilmiş və 2000-ci ildə təqaüdə çıxmışdır. O, hüquq üzrə fəlsəfə doktorudur.

Eynal Əliyev 50 il, başqa sözlə, yarım əsr prokurorluq orqanlarında qüsursuz xidmət etmişdir. O, peşəkarlığı və əməksevərliyi ilə həmişə fərqlənmiş, onun bu cəhəti dövlət tərəfindən yüksək qiymətləndirilmişdir. Belə ki, ona "Azərbaycan Respublikasının Əməkdar hüquqşünası" fəxri adı verilmiş, bir çox orden və medallarla, həmçinin, keçmiş SSRİ Baş Prokurorluğu tərəfindən "SSRİ Prokurorluğunun fəxri işçisi" döş nişanı ilə təltif edilmiş, Azərbaycan Respublikası Prokurorluğunun rəhbərliyi tərəfindən dəfələrlə xidməti qaydada fərqləndirilmişdir.

Eynal Əliyev 2016-cı il noyabr ayının 14-də 93 yaşında dünyasını dəyişmişdir.

Kitabları[redaktə | əsas redaktə]

  • "Azərbaycan SSR-də XX əsrin siyasi repressiya qurbanları" (2003).
  • "Xatirələr...düşüncələr...mülahizələr" (2008).

Mənbə[redaktə | əsas redaktə]