Füzuli İmrəliyev

Füzuli İmrəliyev
Şəxsi məlumatlar
Doğum yeri	Beyləqan, Azərbaycan
Vətəndaşlığı	Azərbaycan
Hərbi fəaliyyəti
Mənsubiyyəti	AR DTX
Qoşun növü	Daxili Qoşunlar
Xidmət illəri	1999— h. h.
Rütbə	Polkovnik
Döyüşlər	Vətən müharibəsi  • Kəlbəcər döyüşləri  • Cəbrayıl döyüşləri  • Füzuli döyüşləri  • Xocavənd döyüşləri  • Şuşa döyüşləri
Təltifləri

Füzuli Şiraslan oğlu İmrəliyev — Azərbaycanın Daxili İşlər Nazirliyinin Daxili Qoşunlarının polkovniki, "Kobra" Xüsusi Təyinatlı Dəstəsinin Komandiri, Vətən müharibəsi qazisi, Vətən Müharibəsi Qəhrəmanı.

Həyatı

Füzuli İmrəliyev Beyləqan şəhərində anadan olub. Əslən isə Cəbrayıl rayonundandır.

Hərbi xidməti

Baş leytenant Füzuli İmrəliyev Azərbaycan Prezidenti İlham Əliyevin 11 mart 2008-ci il tarixli Sərəncamına əsasən "Hərbi xidmətlərə görə" medalı ilə təltif edildi.

Polkovnik-leytenant Füzuli İmrəliyev Azərbaycanın Daxili İşlər Nazirliyinin Daxili Qoşunlarının "Kobra" Xüsusi Təyinatlı Dəstəsinin Komandiri olmuşdur.

Vətən müharibəsi

Azərbaycanın Daxili İşlər Nazirliyinin Daxili Qoşunlarının polkovnik-leytenantı olan Füzuli İmrəliyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Kəlbəcər, Cəbrayıl, Füzuli, Xocavənd istiqamətlərində, Daşaltının azad edilməsində və Şuşanın azadlığı uğrunda gedən döyüşlərdə xüsusi qəhrəmanlıq göstərmişdir. Döyüşlər zamanı Ermənistan Silahlı Qüvvələrinin canlı qüvvələrinin və texnikasının məhv edilməsində fərqlənib. Füzuli İmrəliyev döyüşlər zamanı Şuşa istiqamətində yaralanmışdır.

Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 09.12.2020-ci il tarixli Sərəncamına əsasən Füzuli İmrəliyevə "Vətən Müharibəsi Qəhrəmanı" adı verildi.

Azərbaycan Respublikasının Kəlbəcər rayonun, Cəbrayıl rayonun, Füzuli rayonunun və Xocavənd rayonun ərazilərinin və Şuşa şəhərinin işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin sərəncamına əsasən Füzuli İmrəliyev "Kəlbəcərin azad olunmasına görə" medalı, "Cəbrayılın azad olunmasına görə" medalı, 25.12.2020-ci il tarixli sərəncamına əsasən "Füzulinin azad olunmasına görə" medalı ilə, 29.12.2020-ci il tarixli Sərəncamına əsasən isə "Şuşanın azad olunmasına görə" medalı ilə təltif edildi.