Fikrət Mirzəyev

Vikipediya, açıq ensiklopediya
Jump to navigation Jump to search
Fikrət Mirzəyev
Fikrət Mirzəyev.jpg
Doğum tarixi 2 dekabr 1950(1950-12-02)
Doğum yeri Bico kəndi, Ağsu rayonu
Vəfat tarixi 26 mart 2017(2017-03-26)
Vəfat yeri Ağsu şəhəri
Vəfat səbəbi xəstəlik
Dəfn yeri Ağsu şəhəri
Həyat yoldaşı Yeganə Xanlar qızı
Uşaqları Babək, Kamal, Günel, Şəbnəm
Atası Canalı Şiralı oğlu
Anası Ziba Hüseynbaba qızı
Təhsili
Fəaliyyəti müəllim
Mükafatları "Tərəqqi" medalı

Fikrət Mirzəyev — Azərbaycan Respublikasının əməkdar müəllimi

Təhsili[redaktə | əsas redaktə]

1950-ci ilin 2 dekabr tarixində Ağsu rayonunun Bico kəndində müəllim ailəsində anadan olmuşdur. İlk təlim və tərbiyəsini anası Ziba müəllimə və atası, Azərbaycanın məşhur maarifçi müəllimlərindən olmuş Canalı müəllimdən almışdır. 1957-ci ildə Bico kənd orta məktəbinin 1-ci sinfinə daxil olmuş və 1967-ci ildə həmin məktəbi yüksək qiymətlərlə bitirmişdir. Bir il Bakı şəhərində neft sənayesi sahəsində çalışdıqdan sonra – 1968-ci ildə Azərbaycan Dövlət Universitetinin (indiki Bakı Dövlət Universiteti) filologiya fakultəsinə qəbul olunmuşdur. Tələbəlik illərində həm ictimai, həm də elmi sahədə seçilmişdir. 1969-cu ildə Tiflisdə, 1970-ci ildə Şevçenko şəhərində keçirilən Tələbə Elmi Cəmiyyətlərinin konfranslarında müvafiq olaraq "Mirzə Fətəli Axundzadə və gürcü ziyalıları" və "Azərbaycan-Ukrayna ədəbi əlaqələri" mövzusunda oxuduğu məruzələr "I Dərəcəli Diplom"lara layiq görülmüşdür.

Tələbəlik illərində mətbuat səhifələrində 20-yə yaxın məqaləsi dərc edilmişdir. Xüsusilə, dilçiliklə bağlı yazıları daha çox maraq doğurmuşdur. Görkəmli alimlər Mir Cəlal Paşayev, Məmməd Cəfər, Əkbər Ağayev, Muxtar Hüseynzadə, Səlim Cəfərov, Əlövsət Abdullayev, Musa Adilov, Xəlil və Xalid Əlimirzəyevlər, Ağamusa Axundov, Tofiq Hacıyevdən dərs alan, hər zaman onların bir çoxu ilə məsləhətləşən F. Mirzəyev Tofiq Hacıyevin rəhbərliyi altında “Cəfər Cabbarlının leksikası” adlı diplom işində maraq doğuran sahələrə müdaxilə etmiş, yeni fikir-mülahizələrlə diqqət çəkmişdir.

Universitet Elmi Şurasının qərarı ilə aspiranturaya göndərilən F. Mirzəyevin sonrakı təhsili avtomobil qəzası nəticəsində aldığı ağır xəsarətlərə görə yarımçıq qalır...

Müəllimlik fəaliyyəti[redaktə | əsas redaktə]

Fikrət Mirzəyevin Ağsu şəhəri 1 saylı orta məktəbdəki dərsinə o zamanki təhsil naziri Misir Mərdanovun gəlişi zamanı çəkilmiş fotoşəkil

Sağaldıqdan sonra F. Mirzəyev atasının yolunu davam etdirərək ayrı-ayrı kəndlərdə maarifçi müəllim fəaliyyətinə başlamağa qərar verir. 1973-75-ci illərdə Ağsu rayonunun Padarçöl, 1975-83-cü illərdə Ərəbuşağı kəndlərində müəllim işləyir. Ərəbuşağı kəndində işləyərkən həmin kəndin orta məktəbindən 7 il ərzində 41 məzunun keçmiş SSRİ-nin müxtəlif ali məktəblərində oxumasına istiqamət vermişdir.

1983-cü ildə F. Mirzəyev işində göstərdiyi nailiyyətlərə görə irəli çəkilərək Ağsu şəhər 1 saylı orta məktəbə direktor müavini təyin edilmişdir. Burada vəzifədə işlədiyi 32 il ərzində “Gənc Müəllimlər Şurasının” sədri, “Rayon Olimpiada Komissiyası”nın, eləcə də, şəhər sovetinin üzvü kimi fəaliyyət göstərmişdir. Dəfələrlə iş təcrübəsi rayon və respublika səviyyəsində yayılmışdır. İllər ərzində onlarla yetirməsi rayon və respublika olimpiadalarının iştirakçısı və qalibi olmuşdur, TQDK-nın imtahanlarında maksimum nəticə göstərmiş, həmçinin orta məktəbi "Qızıl Medal"la bitirmişdir. O, ömrünün sonuna kimi həmin məktəbdə müəllim işləmişdir.

Müəllimlik fəaliyyəti dövründə respublikada dərslik və proqramların hazırlanması prosesində təklif və məsləhətlərlə çıxış etmişdir. Hər zaman konfrans və yarışmalarda fəal iştirakçı olmuş, yüksək nəticələr göstərmiş, təltif və mükafatlarla fərqləndirilmişdir.

Həyat yoldaşı və dörd övladının (2 oğlu, 2 qızı) hər biri müəllim peşəsini davam etdirir.

Fikrət Mirzəyev uzun sürən xərçəng xəstəliyindən sonra 2017-ci ilin 26 mart tarixində 66 yaşında Ağsu şəhərində dünyasını dəyişmiş və orada da dəfn edilmişdir.

Təltif və mükafatları[redaktə | əsas redaktə]

  • 1994-cü il – “Ali dərəcəli müəllim”
  • 2000-ci il – I Dərəcəli Diplom – Pedaqoji məruzələr
  • 2002-ci il – I Dərəcəli Diplom – Pedaqoji məruzələr
  • 2003-cü il – “İlin ən yaxşı müəllimi”, I Dərəcəli Diplom
  • 2005-ci il – “Qabaqcıl təhsil işçısı” döş nişanı[1]
  • 2007-ci il – “Qabaqcıl təhsil işçısı” döş nişanı
  • 2008-ci il – Azərbaycan müəllimlərinin XIII qurultayına nümayəndə
  • 2009-cu il – “Azərbaycan Respublikasının əməkdar müəllimi” [2]
  • 2010-cu il “Ən yaxşı müəllim” müsabiqəsinin qalibi.[3]

Fikrət Mirzəyev elmi-pedaqoji, bədii və publisistika sahəsində 70-dən artıq məqalənin müəllifidir. Onun özünün fəaliyyəti barədə də bir çox yazılar dərc edilmiş, haqqında “Müəllim ömrü” adlı televiziya verilişi hazırlanmışdır.

Çap olunmuş əsərlərindən[redaktə | əsas redaktə]

  1. Ədəbiyyat dərslərində xəritədən istifadə” “Birlik qəzeti”, dekabr 1975-ci il
  2. Tərəkəmə - “Birlik qəzeti”, may 1975-ci il
  3. Quluyev, yoxsa Quliyev – “Birlik qəzeti”, fevral 1975-ci il
  4. Adlarımızı qoruyaq – “Birlik qəzeti”, oktyabr 1975-ci il
  5. Rumıniya görüşləri - “Birlik qəzeti”, oktyabr 1979-cu il
  6. Üzeyir Hacıbəyovun ədəbi-bədii yaradıcılığı
  7. Cəfər Cabbarlının leksikası-rusizmlər
  8. Dilimizdə alınma sözlər
  9. Orta məktəbdə vətəndaş tərbiyəsi
  10. Bir ulduz da axıb keçdi - “Birlik qəzeti”, avqust 1990-cı il
  11. Ustad haqqında söz - “Azərbaycan müəllimi” - sentyabr-1992-ci il
  12. Heydər Əliyev şəxsiyyətinin öyrədilməsi təcrübəsindən – “Azərbaycan müəllimi”, oktyabr 1997-ci il
  13. Fənlərarası əlaqə təlimin keyfiyyətini yüksəldir
  14. Hansı daha düzgündür? - “Azərbaycan məktəbi” jurnalı, dekabr 1997-ci il
  15. Şərəflə yaşanmış ömür - “Azərbaycan müəllimi”- aprel-1999-cu il
  16. Anam niyə ağlayırmış – “Hər şey sizin üçün” qəzeti, fevral 2000-ci il
  17. Hacı Molla Babaş-Məsail kimdir?
  18. Bir ulduz da axıb keçdi
  19. Şagirdlərin sevimlisi
  20. Səyahət xatirəsi
  21. Rəhbərim - “Düşüncə”qəzeti, yanvar 2004-cü il

İstinadlar[redaktə | əsas redaktə]

  1. Azərbaycan Respublikasının Təhsil Nazirliyinin 2007-ci il 01 dekabr tarixli 11/631 nömrəli Əmri
  2. Azərbaycan Respublikası Prezidentinin 2009-cu il 30 sentyabr tarixli 504 nömrəli Sərəncamı
  3. Azərbaycan Respublikası Prezidentinin 2010-cu il 05 iyul tarixli 998 nömrəli Sərəncamı

Xarici keçidlər[redaktə | əsas redaktə]