Göybaftalı sovka

Vikipediya, açıq ensiklopediya
Jump to navigation Jump to search
Göybaftalı sovka
Blue Underwing (Catocala fraxini) (8384218652).jpg
Elmi təsnifat
Aləmi: Heyvanlar
Tip: Buğumayaqlılar
Sinif: Cücülər
Dəstə: Pulcuqlular
Fəsilə: Sovkalar
Cins: Catocala
Növ: Göybaftalı sovka
Elmi adı
Catocala fraxini (Linnaeus, 1758)

Göybaftalı sovka (lat. Catocala fraxini) — pulcuqqanadlılar dəstəsinin sovkalar fəsiləsinə aid kəpənək növü.[1]

Təsviri[redaktə | əsas redaktə]

Qanadları açılmış halda 85-106 mm-dir. Ön qanadları açıq boz olub, göyümtülə çalır. Eninə uzanan zolaqlar qara, yaxud tutqun bozdur, cütdür, dişlidir. Böyrəkşəkilli naxış göyümtül-boz, enli, qaramtıl-boz haşiyə ilə dövrələnmişdir. Yumru naxış çox zəif görünür və açıq-sarı rəngdədir. Qanadın saçaqları bozdur. Arxa qanadların əsası qaradır, enli göyrənglə, sonra enli qara rənglə haşiyələnmişdir. Qanadın kənarlarındakı saçaqlar ağdır.[2]

Yayılması[redaktə | əsas redaktə]

Mərkəzi və Şimali Avropada, Rusiyanın Avropa hissəsində, Qərbi Sibirdə, Qazaxıstanda, Uzaq Şərqdə, Şimali Çində, Qafqazda, Yaponiyada, Şimali Amerikada, Azərbaycanda isə Böyük və Kiçik Qafqazın dağlıq və Dağətəyi meşələrində və Lənkəranın Hirkan meşəsində təsadüf olunur. Kəpənəkləri may, iyun və oktyabrda uçur.

Həyat tərzi[redaktə | əsas redaktə]

Enliyarpaq, tuqay və dəniz sahili meşələrdə və parklarda. Yumurta mərhələsində qışlayır. Tırtılı maydan iyula qədər müxtəlif növ qovağın yarpaqları, göyrüş, tozağac, fıstıq, qarağac, palıd, ağcaqayın, qızılağac, ağcaqovaqla qidalanır. İyulda yarpaqların arasında yumşaq barama içərisində puplaşır. Kəpənəyi mayın axırından, oktyabrın axırına qədər uçur. Ağac qabığının yarıqlarına tək-tək, yaxud bir neçə yumurta qoyur.[3]

Sayı[redaktə | əsas redaktə]

Lokal şəkildə, həm də az miqdarda təsadüf edilir.

Məhdudlaşdırıcı amillər[redaktə | əsas redaktə]

Yaşadığı biotopların və meşələrin əkin üçün istifadə olunması, həvəskar kolleksiyaçılar tərəfindən toplanması.

Qorunması üçün məsləhət görülən tədbirlər[redaktə | əsas redaktə]

Yaşayış yerlərində yasaqlıq təşkil etmək, biologiyasını ətraflı öyrənmək, süni surətdə artıraraq təbiətə buraxmaq lazımdır.

İstinadlar[redaktə | əsas redaktə]

  1. Azərbaycan Qırmızı Kitabı. 1989 il
  2. Azərbaycan Qırmızı Kitabı, II cild, Bakı, 2013
  3. Ламперт К., Холодковский Н. Атлас Бабочек и гусениц Европы и отчасти Русско-Азиатских владений. С. Петербург, изд. А.Ф.Деврiена, 1913, с. 255 - 256;

Ədəbiyyat[redaktə | əsas redaktə]

  1. Azərbaycan Qırmızı Kitabı. 1989 il
  2. Azərbaycan Qırmızı Kitabı, II cild, Bakı, 2013
  3. Ламперт К., Холодковский Н. Атлас Бабочек и гусениц Европы и отчасти Русско-Азиатских владений. С. Петербург, изд. А.Ф.Деврiена, 1913, с. 255 - 256;
  4. Ключко З.Ф. Фауна Украiны. Совки. Квадрифiноiдного комплексу, т.16, вип. 6, Киiв: Наукова Думка, 1978, с. 174.